Read Kilivila MADIU 8 Bible Online

MADIU 8 - Kilivila bible

MADIU 8

¹Bogwa leibusi metoya wa koya, e saina tobobawa ibokulaisi matauna.

²Taitala tokagwaiguya[80] imakaia itapopula kaikela ikavagina omatala, ikaibiga, kawala, “Tomoya, kidamwa magim, gagabila bukumdidavaigu bamigileu.”[81]

³E ivitukoli yamala, ikabikoni matauna,[82] kawala, “Magigu goli; bukumigileu.” E nanakwa kala kagwaiguya italogusa, e imigileu wala.

⁴E Yesu iluki matauna, kawala, “Ka, kulagi, taga kuluki availa, mitaga kula, kuvitulokaim baisa tolula,[83] e kukwabilula makawala Mosese la Karaiwaga, e tomota bigisaisi bisimokwitasi.”[84]

⁵E bogwa iviloubusi mapilana Kapaneum[85] ibodi taitala tokwabilia kasi tokugwa[86] lakatutala iyokakapisi baisa matauna;

⁶ikaibiga, kawala, “Tomoya! Ulo touwata togolia ikanukwenu wa bwala saina kala mmayuyu.”

⁷E Yesu iluki matauna, kawala, “Ki, bawa bakatumovi matauna?”

⁸E tokwabilia ivitakauloki, kawala, “Tomoya, gala ibodaigu bukusuvi ogu bwala; mitaga kukwaraiwaga e ulo touwata bibwaina.

⁹Paila odabagu agu tokwaraiwaga leisisuaisi, e yeigu akakaraiwaga tokwabilia. Kidamwa baluki taitala, kawagu, ‘Kula’, matauna bila; baluki taiyuwela, ‘Kuma’, matauna bima; baluki ulo touwata, ‘Kuvagi baisa’, e bivigaki makawala.”

¹⁰Tutala Yesu ilagi matauna itutu wowola, e iluki matausina iiyeikulaisi matauna, kawala, “Kululuwaisi baisa; gala abubani dubumi makawala baisa olumoulela Isireli.

¹¹E alukwaimi, bidubadu bimaisi metoyasi obomatu toyo okwaibwaga, e bikamsi deli Eberaam toyo Aisake toyo Yekobe oKaraiwogala Labuma.

¹²Mitaga matausina bibodi bisuvisi[87] Labuma Karaiwogala Yaubada bilavi bilosi okoukweda wa dudubila; baisa biuvalamsi deli bipulummosilasi sainela.”

¹³Yesu iluki tokwabilia, kawala, “Kula; makawala bogwa kudubumi makawala bavigaki paila yoku.” E wa tuta matutowena touwata ibwaina.

¹⁴E Yesu bogwa isuvi ola bwala Pita, igisi Pita yawala ikanukwenu kala katoula yuviyavi wowola.

¹⁵Yesu ikabikoni yamala minana, kala katoula isolovi, e minana itokaia ikamovi matauna.

¹⁶E bogwa eikoyavi, imiakaisi matauna bidubadu tomota availa availa baloma gaga[88] eisikailasi; e iyabi baloma ola biga, e ikatumovi komwaidosi tokwatoula;

¹⁷kidamwa la biga Aisea tovitoubobuta gala bisala, kawala, “Matauna ikau iligaiwa kada katoulasi toyo kada leliasi.”

¹⁸Yesu igisi saina tobobawa itoulaisi matauna, e ikaraiwaga la toligalega bitapelasi mapilana ewaiwa.

¹⁹E taitala toninitalapula paila Karaiwaga[89] imakaia iluki matauna, kawala, “Tovituloki, babokulaim; ambaisa ambaisa bukula, e yeigu deli.”

²⁰E Yesu iluki matauna, kawala, “Ugiwagi isim kasi nobwala, deli mauna nayoyowa isim kasi nigwa, mitaga yeigu Latula Tomota[90] gala isim kabagu.”

²¹E toligalega taiyuwela iluki matauna, kawala, “Tomoya kutagwala ikugwa bala babaku tamagu.”[91]

²²Mitaga Yesu iluki matauna, kawala, “Kubokulaigu; kuligaiwa tomata,[92] e bibakwaisi kasi tomata titoulesi.”

²³E Yesu isila wa waga deli la toligalega.

²⁴E ka, utuyagila kwaiveka itokaia obolita, mapaila kaisai ilupulupula wa waga; mitaga matauna immasisi wala.

²⁵E imakaiasi matauna ivigulaisi, kawasi, “Tomoya, kukolaidasi, tadoumsiga.”

²⁶E iluki matausina, kawala, “Avaka paila kukokolasi? Wo yokomi! Saina pikekita mi dubumi.” E itokaia ibuyoyu yagila toyo bolita; e iniwavilakutukutu.

²⁷E itutu uwosi, kawasi, “Wa! Avai tau matauna, paila yagila toyo bolita ikabikuwolaisi matauna?”

²⁸Bogwa imakaia mapilana ewaiwa osi valu mina Gadara.[93] Mapilana valu tomota ibakwaisi si tomata wa lagi. E taiyu tauwau isunapulasi metoya wa lagi makwaisina[94] e ibodaisi Yesu. Saina mina gigasisi, paila baloma gaga isikailasi matausina. Mapaila gala availa igagabila bisuki wa keda makadana.

²⁹E ka, iwaiweyasi, kawasi, “Avaka bukuvigakaima,[95] yoku Latula Yaubada? Lokuma baisa bukuyogagaima igau gala iboda ma tuta[96] ke?”

³⁰Saina yuwoveka bunukwa ikikabubunasi sita kaduwonaku.

³¹E baloma gaga iyokakapisisi baisa matauna, kawasi, “Kidamwa kuyabaima, kuwitalaima bakasikaila bunukwa mayuwona.”

³²E iluki matausina, kawala, “Kulosi.” E isilavaisi matausina isikailasi bunukwa minasina; e ka, mayuwona komwaidona isakaulasi otagegala koya ikayabusisi obolita idoumsi.

³³E toyamata bunukwa isakaulasi, ilosi ovalu, ilivalaisi vavagi komwaidona deli avaka ikaloubusi baisa matausina kasitaiyu toninagowa.

³⁴E valu komwaidona iulilavaisi valu mwada bibodaisi Yesu; e bogwa igisaisi matauna, iyokakapisisi baisa matauna kidamwa bisilavi si valu.