Read Kilivila MADIU 9 Bible Online

MADIU 9 - Kilivila bible

MADIU 9

¹Yesu isila wa waga itapela[97] ilokaia ola valu tatoula.[98]

²E ka, imiakaisi matauna taitala togolia, ikanukwenu okabala. Yesu igisi si dubumi,[99] e iluki togolia, kawala, “Bodagu, bitalaguva lopom; m mitugaga aligaiwa.”

³E ka, mimilisi toninitalapula paila Karaiwaga[100] inanamsasi taitala baisa taitala, “Tau matauna ibigigagi Yaubada.”

⁴Mitaga Yesu inikoli si nanamsa, e ikaibiga, kawala, “Avaka paila kuninanamsasi vavagi gaga makawala?

⁵Avakaga gagabila, baluki, ‘M mitugaga aligaiwa’, kaina ‘Kutokaia, kuloula’?

⁶Mitaga bavitulokaimi bukunikolaisi yeigu Latula Tomota[101] isim ulo karaiwaga baisa ovalu watanawa kidamwa baligaiwa mitugaga.” Mapaila iluki togolia, kawala, “Kutokaia, kukwatupwi m moi, e kula om bwala.”

⁷E itokaia ila ola bwala.

⁸Mitaga tobobawa igisaisi makwaina, e ikokolasi,[102] iyakawolaisi Yaubada paila matauna bogwa isaiki karaiwaga makawala baisa tomota.

⁹E Yesu iulilavi baisa, e ililoula igisi taitala tau yagala Madiu, isili okabopokala.[103] E iluki matauna, kawala, “Kubokulaigu.” E itokaia ibokuli matauna.

¹⁰Igau Yesu isili ola bwala Madiu[104] ikamkwamsi, e ka, bidubadu tokougugula pokala toyo tomitugaga[105] imaisi isilaisi deli Yesu toyo la toligalega.

¹¹Parisi igisaisi baisa, e ilukwaisi la toligalega, kawasi, “Avaka paila mi tovituloki ikamkwamsi deli tokougugula pokala toyo tomitugaga?”

¹²Mitaga ilagi makwaina e ikaibiga, kawala, “Tobubwaila gala magisi toyuvisa, mitaga tokwatoula wala magisi.

¹³Kulosi bukunevisi biga makwaina kala vituloki, ‘Yeigu gala magigu lula, mitaga magigu wala mitakwai.’ Paila yeigu lama gala badou tomitukwaibwaila bimakaiagusi mitaga tomitugaga.”

¹⁴Wa tuta matutona Yoni la toligalega imakaiasi Yesu, kawasi, “Avaka paila yakamaisi toyo Parisi kapusoposumasi, mitaga m toligalega gala ipusoposumasi?”

¹⁵E Yesu iluki matausina, kawala, “Kidamwa tovaivau isisu deli sala, sala gala bivalamsi ke? Mitaga igau tuta bima, tomota bilauwaisi tovaivau, e sala biposumasi wa tuta matutona.

¹⁶“Kidamwa kwama yabogwa iponana, e taitala magila biyaimi, gala biyaimi metoya yaima yavau; paila yaima kaipagala bikokisi kwama e ponana biponinaveka.

¹⁷Gala taitala ivigogu wainivau olukwava yabogwa.[106] Kidamwa makawala, lukwava bikokisi, waini bitalagila, e lukwava bikodidaimi. Mitaga wainivau bivigogwaisi olukwava yavau, e vavagi kwaiyu bikanuvagasi bwaina wala.”

¹⁸Ililivala makawala baisa matausina, e ka, taitala tokwaraiwaga[107] isuvi, ikavagina omatala, kawala, “Latugu vivila makateki leikaliga; mitaga kuma kusaili yamam baisa minana, e minana bimova.”

¹⁹E Yesu itokaia ibokuli matauna, deli la toligalega.

²⁰E natana vivila isisu, kala katoula buyavila ititalagila,[108] katoula makwaina isisu kweluwotala kwaiyu taitu.

²¹E minana inanamsa onanola, “Kidamwa bakabikoni kala kwama wala, babwaina namwaidogu.” E mapaila ilokaia otapwala Yesu e ikabikoni kaipagala[109] kala kwama.

²²Mitaga Yesu itovila igisi minana, ikaibiga, kawala, “Ve! Bitalaguva lopom; m dubumi bogwa iyomovaim.” E metoya wa tuta matutona vivila minana ibwaina namwaidona.

²³Yesu ima ola bwala matauna tokwaraiwaga, e igisi toyuvisi loloni deli tobobawa ivanigonigwasi,[110]

²⁴e ikaibiga, kawala, “Kusunapulasi, paila vilakapugula minana gala ikaligimolila, mitaga immasisi wala.” E igigilaisi matauna.

²⁵Mitaga bogwa iyabaisi tobobawa isunapulasi, Yesu isuvi matabudona. Iyosi yamala, e minana vilakapugula itokaia.

²⁶E bulogala baisa ikaligiaki mapilana ovalu komwaidona.

²⁷Yesu iulilavi metoya baisa, e taiyu tokwau iiyeikulaisi matauna, ikawotasi ikaibigasi, kawasi, “Kunokapisaima, yoku Latula Debida.”[111]

²⁸E tutala isuvi wa bwala, matausina tokwau imakaiasi matauna; e Yesu iluki matausina, kawala, “Ki, kudubumaisi gagabila bavagi baisa?” Ilukwaisi matauna, kawasi, “Tomoya, mitaga.”

²⁹Mapaila ikabikoni mitasi, ikaibiga, kawala, “Bavigakaimi makawala mi dubumi.”

³⁰E imitalala mitasi. E Yesu ikakikili matausina, kawala, “Kuyamatasi taga taitala binikoli baisa.”

³¹Mitaga ilosi ilivalasi e butula matauna ikaligiaki mapilana ovalu komwaidona.

³²Isusunapulasi kasitaiyu, e tomota imiakaisi matauna taitala tokutabu deli baloma gaga isikaila matauna.

³³E Yesu bogwa iyabi baloma gaga, matauna tokwatoula ilivala; e tobobawa itutu uwosi, ikaibigasi, kawasi, “Gala kwaitala tuta tagisaisi makawala baisa olumoulela Isireli.”

³⁴Mitaga Parisi ikaibigasi, kawasi, “Iiyabi baloma gaga paila uula si guyau baloma gaga ikatupewoli.”[112]

³⁵E Yesu ititavina komwaidona valu vilouvakaveka toyo viloukikekita. Iuvituloki osi bwala tapwaroru, ikikamituli Bulogala Bwaina paila Labuma Karaiwogala, ikatumovi komwaidona lelia toyo katoula.

³⁶Mitaga tutala igigisi tobobawa, inokapisi matausina paila iwaki silaveva deli ibutugeyaisi makawala sipi gala isim kasi toyamata.

³⁷E iluki la toligalega, kawala, “Mokwita bagula ikabinai sainela, mitaga totayoyuwa gala ibawasi.

³⁸Mapaila kunigadaisi tolibagula biwitali totayoyuwa bilosi ola bagula paila la tayoyuwa.”