Read Kilivila MAKA 1 Bible Online

MAKA 1 - Kilivila bible

MAKA 1

¹Baisa Bulogala Bwaina paila Yesu Keriso, Yaubada Latula.

²Kala vitouula makawala Aisea tovitoubobuta leigini, “Yaubada kawala, ‘Ka, awitali ulo touwata bilobogwa omatam, matauna bikatubiasi m keda.’

³Taitala idoudou oviloupakala, ‘Kukwatubiasaisi la keda Guyau, kukiduwosisiaisi la keda.’”

⁴Yoni Tobapitaisi ivalapula[1] oviloupakala[2] e ikamituli, kawala, “Kuninavilasi e babapitaisaimi, e Yaubada biligaiwa mi mitugaga.”

⁵Komwaidosi mapilana Yudia, deli komwaidosi mina Yerusalem ilokaiasi matauna, ikamitulaisi si mitugaga e Yoni ibapitaisi matausina wa Waya Yoridani.

⁶Yoni kala kakapula iwoliki unuunula kameli; palitula[3] yatala kanuvinela bulumakau; e kʹala, kilili toyo kitorina.

⁷Ikamituli, kawala, “Taitala iyeikulaigu imaima, matauna ikalisauwaigu, katubukolela kaikela kala sipu gala ikwanaigu bakululu bataneku.[4]

⁸Yeigu labapitaisaimi metoya wa sopi; mitaga matauna bibapitaisaimi metoya baisa Baloma Tobumaboma.”

⁹E tuta makwaina Yesu isilavi Nasaredi[5] mapilana Galili[6] ima, e Yoni ibapitaisi matauna mapilana Yoridani.

¹⁰E tutala Yesu ivalaguva metoya wa sopi, nanakwa igisi labuma ikivi deli Baloma Tobumaboma italakapusi makawala bubuna baisa matauna.[7]

¹¹E, kaigila metoya wa labuma ima, kawala, “Yoku Latugu Tombwailigu,[8] saina kuyomwasalaigu.”

¹²E nanakwa Baloma Tobumaboma iviyelu nanola saina peula, e ila oviloupakala.[9]

¹³Baisa isisu oviloupakala ikaluwovasi e Setani[10] itamnabi matauna; deli mauna ugiwagi isisu e anelosi ipilasaisi matauna.

¹⁴Leikatupipaisi Yoni,[11] oluvi Yesu iviloubusi mapilana Galili, ikamituli Bulogala Bwaina paila Yaubada, kawala.

¹⁵“Tuta bogwa leima. Yaubada la Karaiwaga[12] bogwa ivakatitaikina;[13] kuninavilasi, kudubumaisi Bulogala Bwaina.”

¹⁶Iuvayali okawolawala milaveta Galili,[14] igisi taiyu topoula, Saimoni sola bodala Anideru ipwapoulasi obolita.

¹⁷Yesu iluki matausina, kawala, “Kubokulaigusi, bavigakaimi kasi topoula tomota.”

¹⁸E nanakwa isilavaisi si wota, ibokulaisi matauna.

¹⁹Itowada tuvaila, igisi ituwoli kasitaiyu Sebedi litula, Yemesa sola bodala Yoni, isisuaisi wa waga, iyayaimasi si wota.[15]

²⁰E nanakwa idou matausina bibokulaisi. Mapaila isilavaisi tumasi Sebedi wa waga toyo matausina la touwata,[16] e ibokulaisi matauna.

²¹Iviloubusisi Kapaneum;[17] e wa yam sabate[18] Yesu isuvi wa bwala tapwaroru iuvituloki.[19]

²²Itutu uwosi tomota la vituloki; paila ivituloki gala makawala toninitalapula mina Yudia si Karaiwaga[20] mitaga ivituloki matausina makawala isim la karaiwaga.

²³Tuta makwaina taitala tau isuvi osi bwala tapwaroru eisikaila baloma gaga;[21]

²⁴iwaiweya, kawala, “Avaka bukuvigakaimasi,[22] yoku Yesu guma Nasaredi?[23] Ki, lokuma bukuyabaimasi? Yeigu anikolaim, yoku Yaubada la Tokabomi.”

²⁵Yesu ikatilakai baloma, kawala, “Desi kukwapatu, kusilavi matauna.”

²⁶Baloma gaga iiyagi matauna sainela; iwaiweya e isilavi matauna.

²⁷Komwaidosi saina itutu uwosi, ikatupoisi taitala baisa taitala, kawasi, “Avaka baisa? Vituloki kwaivau, ke? Matauna isim la karaiwaga kidamwa bikaraiwogi baloma gaga, e ikabikaulasi wala.”

²⁸Mapaila iyoyu bulogala Yesu ikaligiaki komwaidona mapilana Galili.

²⁹Isilavi bwala tapwaroru, e isaitaula isuvi osi bwala Saimoni toyo Anideru. Deli Yemesa sola Yoni isuvisi.

³⁰Mitaga Saimoni yawala ikanukwenu, kala katoula yuviyavi wowola; e nanakwa ilukwaisi Yesu paila minana.

³¹Imakaia iyosi yamala e ivisimiliwoli minana; e kala katoula isolovi, e minana ikamovi matausina.

³²Igau ikoyavi, bogwa isalili kalasia,[24] imiakaisi matauna komwaidosi availa availa ikatoulasi, kaina baloma gaga eisikailasi uwosi.

³³Mapilana valu[25] tomotala komwaidosi isigugulasi okoukweda.

³⁴Bidubadu ikatumovi kasi katoula avai katoula avai katoula, deli iyabi bidubadu baloma gaga[26] isunapulasi; e Yesu gala itagwala baloma gaga bilivalasi avaka, paila bogwa ikatetasi availa matauna.[27]

³⁵E ikikivi visiga Yesu itokaia isunapula, ila ovilouwokuva e baisa inigada.

³⁶Saimoni deli sala iyeikulaisi matauna;

³⁷e bogwa ibanaisi, ilukwaisi matauna, “Komwaidosi inineivaimsi.”

³⁸Mitaga Yesu iluki matausina, kawala, “Bitalokaiasi tuwoli valu katitaikina. Ibodi bakamituli baisa matausina tuvaila; paila baisa uula asunapula lama.”

³⁹Ititavina Galili viloumwaidona, ikikamituli osi bwala tapwaroru, deli iiyabi baloma gaga.[28]

⁴⁰Taitala tokagwaiguya[29] imakaia iyokakapisi baisa matauna; itapopula kaikela ikavagina, iluki matauna, kawala, “Kidamwa magim, gagabila bukumdidavaigu bamigileu.”[30]

⁴¹Yesu saina inokapisi matauna[31] e ivitukoli yamala, ikabikoni matauna[32] e iluki, kawala, “Magigu goli; bukumigileu.”

⁴²E nanakwa matauna kala kagwaiguya italogusa, e imigileu wala.

⁴³E nani iwitali bila e deli ikakikili matauna, kawala,

⁴⁴“Ka, kulagi, taga kuluki availa; mitaga kula, kuvitulokaim baisa tolula,[33] kukwabilula paila kam kikila makawala Mosese la Karaiwaga, e tomota bigisaisi bisimokwitasi.”

⁴⁵Mitaga tau matauna ila ililivala wala vavagi makwaina, butula ikaligiaki ambaisa, mapaila gala gagabila Yesu bivalapula ovalu, mitaga isiwa ovilouwokuva wala; e tomota imakaiasi matauna metoyasi ambaisa ambaisa.