Read Kilivila MAKA 10 Bible Online

MAKA 10 - Kilivila bible

MAKA 10

¹Yesu isilavi baisa, ila ovalu Yudia,[130] deli mapilana Yoridani ewaiwa;[131] tobobawa ilokaiasi isigugulasi omatala e makawala la bubunela iuvituloki matausina.

²Parisi imakaiasi mwada biwakolaisi matauna, e ikatupoiyaisi matauna, kawasi, “Ki, ibodi Mosese la Karaiwaga kidamwa taitala tau bivaipaka?”

³Yesu ivitakauloki matausina, kawala, “Avaka Mosese ikaraiwogaimi?”

⁴Ikaibigasi, kawasi, “Mosese itagwala taitala bigini vaipaka kala ginigini, e bivaipaki minana.”

⁵Mitaga Yesu iluki matausina, kawala, “Mosese igini karaiwaga makwaina paila yokomi, paila uula saina kasai ninami.

⁶Mitaga tokinabogwa ibubuli valu, ibubuli tomota, tau deli vivila.

⁷Baisa uula tau bisilavi tamala inala, bivakouli la kwava,[132]

⁸e kasitaiyu bivigaki uwosi makawala taitala. Mapaila gala tuvaila si sisu bilivisisi makawala taiyu tomota, paila uwosi makawala taitala tomota wala.

⁹Mapaila taga tomota bitanekwaisi avaka Yaubada bogwa eisipu.”

¹⁰Igau wa bwala la toligalega ikatumikaisi matauna ammakawala makwaisina vavagi.

¹¹Iluki matausina, kawala, “Avai tau bivaipaki la kwava e bivaivau nayuwela, matauna bogwa eikailasi.

¹²E kidamwa minana bivaipaki la mwala[133] e bivaivau taiyuwela, eikailasi wala.”

¹³Imiakaisi gugwadi baisa Yesu, kidamwa bikabikoni magudisina; mitaga la toligalega ibuyoyaisi matausina.

¹⁴Mitaga tutala Yesu igisi, e imwau nanola, iluki toligalega, kawala, “Ibodi gugwadi bimakaiagusi; taga kusilibodaisi matausina; paila Yaubada la Karaiwaga tomotala makawala magudisina.

¹⁵Kululuwaisi baisa, availa gala bikamiabi Yaubada la karaiwaga makawala gwadi, gala goli bisuvi baisa.”

¹⁶Ikopwi, e ikabikoni magudisina deli ibigibwaili mwada Yaubada binokapisi baisa taitala taitala.

¹⁷Yesu bogwa ivitouula bililoula, e taitala isakaula imakaia matauna, ikavagina omatala, ikatupoi matauna, kawala, “Tovituloki, saina bwaina yoku. Avaka ibodi bavagi kidamwa bayosi momova kwekanigaga?”

¹⁸Yesu iluki matauna, kawala, “Avaka paila kudokaigu saina bwaina? Gala isisu taitala tobwaila, mitaga Yaubada kalamwaleta.

¹⁹Yoku kunikoli karaiwaga makwaisina:[134] ‘Taga kukwatumata, taga kukwailasi, taga kuveilau, taga kutabinona, taga kusepuloki, kutemmali tamam deli inam.’”

²⁰Matauna iluki Yesu, kawala, “Tovituloki, makwaisina vavagi komwaidona bogwa lavigilabi igau tokekita yeigu e lagaila.”

²¹Yesu igigisi e iyebwaili matauna; iluki matauna, kawala, “Ibodaim wala kwaitala vavagi kukwatumkulovi; kula, kugimoli m guguwa komwaidona, e kukwau mapusi kusaiki tonamakava, e bukuyosi m veiguwa wa labuma; e kumaga bukubokulaigu.”

²²Mitaga idavila migila paila biga makwaina, e ila, saina ikiuta nanola goli; paila saina bidubadu la guguwa.

²³Yesu imitavila, iluki la toligalega, kawala, “Saina kasai kidamwa matausina saina bidubadu si guguwa mwada bisuvisi ola Karaiwaga Yaubada.”

²⁴Saina itutu uwosi la toligalega paila la biga. Mitaga Yesu tuvaila iluki matausina, kawala, “Gugwadi, Yaubada la Karaiwaga kala suvi saina kasai.[135]

²⁵Igagabila kidamwa natana kameli bisupwani oponanela vasia, mitaga ikasai kidamwa taitala tau saina bidubadu la guguwa mwada bisuvi ola Karaiwaga Yaubada.”

²⁶Saina itutuvakau uwosi e ikatupoiyaisi taitala baisa taitala, kawasi, “Mitaga availa bibani katumova?”

²⁷Yesu imitakavati matausina, e ikaibiga, kawala, “Baisa tomota gala igagabila bivagaisi, mitaga kidamwa baisa Yaubada, gala makawala tomota - paila komwaidona vavagi igagabila baisa Yaubada.”

²⁸Pita ikawota iluki matauna, kawala, “Ka, yakamaisi bogwa kaligaiwaisi vavagi komwaidona e lakabokulaimsi.”

²⁹Yesu ikaibiga, kawala, “Kululuwaisi baisa. Availa bogwa isilavi la bwala, tuwala, bodala, luleta, veyala, litula kaina baleku paila yeigu deli paila Bulogala Bwaina,

³⁰e matauna bibani wa tuta matutona lakatutala, bwala, tuwʹala, budala, lulʹeta, inʹala, litula, baleku, e deli tuvaila lamadada; e tutala igau bima bibani momova kwekanigaga.

³¹Mitaga bidubadu ikugwasi bivabodasinim; e tovabodanim bikugwasi.”

³²Ililoulasi, bilokaiasi Yerusalem. Saina itutu uwosi toligalega, mapaila Yesu ilobogwa; e matausina ibokulaisi ikokolasi tuvaila. Tuvaila ivakouli matausina tailuwotala taiyu titoulesi, ivitouula biluki matausina igau avaka bisunapula baisa matauna,

³³e ikaibiga, kawala, “Ka, bitawaisi Yerusalem; e bikasalaigusi yeigu Latula Tomota baisa tolula kasi tokugwa toyo toninitalapula paila Karaiwaga; e bikaraiwagasi bakaliga, e bikasalaigusi baisa matausina gala mina Yudia;[136]

³⁴matausina biyosokanaigusi, bigiusailigusi, bilogumtaigusi, bikatumataigusi; e yam kwaitolu oluvi batokaia bamovavau goli.”

³⁵Yemesa sola Yoni, matausina litula Sebedi, imakaiasi Yesu, ilukwaisi matauna, kawasi, “Tovituloki, magima avaka bakanigadaim bukuvagi paila yakama.”

³⁶Yesu ikatupoi matausina, kawala, “Avaka magimi bavigakaimi?”

³⁷Ilukwaisi matauna, kawasi, “Kidamwa bukusili om takaikaia walakaiwa kutugwalaima bakasili taitala om kwakata, taitala om kikiwama.”[137]

³⁸Mitaga Yesu iluki matausina, kawala, “Gala kunikolaisi avaka kuninigadaisi. Ki, kudokaisi gagabila bukumomsi viga mkwelana igau bamom? Kaina bukubapitaisasi makawala yeigu igau babapitaiso?”

³⁹Ilukwaisi matauna, kawasi, “Baisa gagabila wala.” Yesu iluki matausina, kawala, “E mokwitala bukumomsi viga mkwelana[138] igau bamom, deli bukubapitaisasi makawala yeigu igau babapitaiso.[139]

⁴⁰Mitaga gala gagabila yeigu banagi availa bisili ogu kwakata kaina ogu kikiwama; mitaga availa availa Yaubada bogwa leinagi bisilaisi wala ambaisa eikatubiasi kabasi.”

⁴¹Tutala matausina tailuwotala ilagaisi biga, isegibuluwaisi Yemesa sola Yoni.

⁴²E Yesu idou matausina bimakaiasi, iluki matausina, kawala, “Kunikolaisi kidamwa matausina mwada kasi tokwaraiwaga mina watanawa isisiguyausi matausina, deli tuvaila si gweguya ikikaraiwogaisi matausina.

⁴³Mitaga yokomi gala makawala; mitaga availa magila bitomgwaga, matauna budami.

⁴⁴E availa magila bisisu kami tokugwa matauwena bitugwali la momova komwaidona biwotitalaimi komwaidomi.

⁴⁵Paila yeigu Latula Tomota goli ama gala paila tomota biwotitalaigusi, mitaga bawotitali matausina, e batugwalaigu okaliga kaimapusi[140] tomota bidubadu.”

⁴⁶Imakaiasi Yeriko;[141] Yesu bogwa bisilavi Yeriko deli la toligalega toyo saina tobobawa, e taitala tokwau isisu osiusiula keda. Matauna Timio latula yagala Batimio e toninigada matauna.

⁴⁷E tutala ilagi kidamwa Yesu guma Nasaredi[142] leima, ikawota, kawala, “Yesu, yoku Latula Debidʹa![143] Kunokapisaigu.”

⁴⁸Bidubadu ibuyoyaisi matauna, ilukwaisi bikapatu; mitaga ikawotavau saina minimani, kawala, “Latula Debidʹe! Kunokapisaigu.”

⁴⁹Yesu itom, ikaibiga, kawala, “Kudouwaisi bima.” Idouwaisi tokwau, e ilukwaisi matauna, kawasi, “Kumwasawa; kutokaia, matauna ididouwaim.”

⁵⁰Matauna ilavi kanunuva, iyuweitaula, ilokaia Yesu.

⁵¹Yesu ikatupoi matauna, kawala, “Avaka magim bavigakaim?” Tokwau iluki Yesu, kawala, “Guyau, magigu bimitalala matagu.”

⁵²Yesu iluki matauna, kawala, “Kula, m dubumi bogwa iyomovaim.” E wa tuta matutona imitalala matala, e ibokuli Yesu wa keda.