Read Kilivila MAKA 2 Bible Online

MAKA 2 - Kilivila bible

MAKA 2

¹Igau gala ikalubobawa, Yesu iviloubusivau Kapaneum, e iyoyu butula kidamwa isisu wa bwala.[34]

²Bidubadu isigugulasi, e tomota ivakasauwaisi bwala toyo okoukweda goli. Yesu ikamituli Bulogala Bwaina baisa matausina,

³e ka, mimilisi imiakaisi matauna taitala togolia, taivasi tokeula.

⁴Gala sitana igagabila bilokaiasi Yesu paila uula tobobawa. Mapaila ikibolusi katuva walakaiwa ambaisa kibubotala matauna; bogwa ikibolusi ponana[35] iloyasi kabala togolia.

⁵Yesu igisi si dubumi,[36] e iluki togolia, kawala, “Bodagu,[37] m mitugaga aligaiwa.”

⁶Mitaga mimilisi toninitalapula paila Karaiwaga deli isilomlasi baisa, inanamsasi oninasi,

⁷“Avaka paila matauna ilivala makawala? Ibigigagi Yaubada; availa ibodi biligaiwa mitugaga, mitaga Yaubada kalamwaleta?”

⁸E nanakwa Yesu titoulela inikoli kidamwa ikiumsi inanamsasi makawala, e iluki matausina, kawala, “Avaka paila kunanamsasi makawala?

⁹Avakaga gagabila, baluki matauna togolia, kawagu, ‘M mitugaga aligaiwa,’ kaina ‘Kutokaia, kukwatupwi m moi, e kuloula’?

¹⁰Mitaga bavitulokaimi e bukunikolaisi yeigu Latula Tomota[38] isim ulo karaiwaga baisa ovalu watanawa, kidamwa baligaiwa mitugaga.” Mapaila iluki togolia, kawala,

¹¹“Mwa! Kutokaia, kukwatupwi m moi, e kula om bwala.”

¹²E itokaia, e nanakwa ikatupwi la moi isunapula omitasi komwaidosi. Mapaila saina itutu uwosi sainela, iyakawolaisi Yaubada, kawasi, “Gala kwaitala tuta tagisaisi makawala.”

¹³Isunapula tuvaila iuvayali okawolawa; tobobawa komwaidona ilokaiasi itoulaisi matauna; e iuvituloki matausina.

¹⁴Oluvi iulilavi igisi Libai[39] Alipio latula, isili okabopokala.[40] Yesu iluki matauna, kawala, “Kubokulaigu.” E itokaia ibokuli matauna.

¹⁵Igau Yesu isili ola bwala Libai[41] ikamkwamsi. E bidubadu tokougugula pokala toyo tomitugaga[42] isilaisi deli Yesu toyo la toligalega; paila bidubadu ibokulaisi matauna.

¹⁶Mimilisi toninitalapula paila Karaiwaga, matausina Parisi,[43] igisaisi Yesu ikamkwamsi deli tomitugaga toyo tokougugula pokala. E ilukwaisi la toligalega, kawasi, “Avaka paila matauna ikamkwamsi deli tokougugula pokala toyo tomitugaga?”

¹⁷Yesu ilagi baisa e iluki matausina, kawala, “Tobubwaila gala magisi toyuvisa mitaga tokwatoula wala magisi. Yeigu lama gala badou bimakaiagusi tomitukwaibwaila, mitaga tomitugaga.”

¹⁸Kwaitala tuta si toligalega Yoni toyo Parisi ipusoposumasi. Tomota imaisi ikatupoiyaisi Yesu, kawasi, “Avaka paila la toligalega Yoni deli si toligalega Parisi ipusoposumasi, mitaga m toligalega gala ipusoposumasi?”

¹⁹Yesu iluki matausina, kawala, “Kidamwa tovaivau isisu deli sala, sala gala biposumasi ke? Gala wala. Tutala tovaivau isisu, sala gala biposumasi.

²⁰Mitaga igau tuta bima, tomota bilauwaisi tovaivau; e sala biposumasi wa tuta matutona goli.

²¹“Kidamwa kwama yabogwa iponana, e taitala magila biyaimi, gala biyaimi metoya yaima yavau; kidamwa ivagi makawala, yaima yavau kaipagala bikokisi yabogwa, e ponana biponinaveka.

²²Gala taitala ivigogu wainivau olukwava yabogwa;[44] kidamwa ivagi makawala, waini bikovi miyana, e waini bitamwau, e lukwava deli. Mitaga ibodi wainivau bivigogwaisi olukwava yavau.”

²³Yesu ivawalai obigulela witi yamla sabate; ililoulasi, e la toligalega igudaisi waitunela witi.

²⁴Parisi ilukwaisi matauna, kawasi, “Ki, avaka paila gala ivagaisi[45] makawala Mosese la Karaiwaga?[46] Paila matauna ikikili yam sabate.”

²⁵Iluki matausina, kawala, “Kaina gala lokukwalawasi avaka Debida ivagi tutala gala kala kalaga e ikamolu, matauna deli matausina kala tobwakuli ke?

²⁶Paila Debida isuvi ola bwala Yaubada,[47] e ikoma kaula kwaibumaboma leisemakavaisi baisa Yaubada. Ivagi baisa ola tuta Abiata[48] tolula toveka. Mosese la karaiwaga ibodi tolula wala bikamsi; mitaga Debida leikoma e tuvaila isaiki kala tobwakuli ikamsi.”

²⁷E iluki matausina, kawala, “Yaubada ibubuli sabate paila tomota kasi pilasi, galaga ibubuli tomota paila sabate kala pilasi;

²⁸mapaila yeigu Latula Tomota guyoula sabate goli.”