Read Kilivila MAKA 3 Bible Online

MAKA 3 - Kilivila bible

MAKA 3

¹Tuvaila Yesu isuvi wa bwala tapwaroru, e isisu baisa taitala tau yamala kwayamata.

²E mimilisi mwada bitabinakaisi Yesu. E iwayausaisi matauna, kaina biyomovi matauna wa yam sabate.

³Iluki matauna tau yamala kwayamata, kawala, “Kuma baisa.”

⁴Ikatupoi matausina, kawala, “Avaka ibodi Mosese la Karaiwaga paila yam sabate? Bitamitukwaiisi kaina bitayogagaisi? Bitayomovaisi kaina bitakatumataisi?” Mitaga ikapatusi.

⁵Igigisi matausina deli la ninamwau siligaga, e deli ikaikai nanola paila saina kasai ninasi. Iluki matauna, kawala, “Kuvitukoli yamam.” Ivitukoli e ka, kwayamomova.

⁶Mapaila Parisi isunapulasi, e nanakwa ikikeiwalasi deli mimilisi metoya Erodi ola boda[49] paila Yesu, ammakawala bivigakaisi kidamwa bikatumataisi matauna.

⁷Yesu ilokaia olumata milaveta Galili[50] deli la toligalega, e saina tobobawa ibokulaisi matauna. Baisa mina Galili,[51] mina Yudia,[52]

⁸mina Yerusalem, mina Idumia,[53] deli matausina metoyasi Yoridani mapilana ewaiwa, deli katitaikina Taia toyo Saidoni.[54] Leilagaisi bulogala avaka bogwa ivagi, e mapaila imakaiasi matauna.

⁹Iluki la toligalega kidamwa bikatubiasaisi kaitala waga kaikekita paila matauna, paila tobobawa kaina bitopitukwaisi matauna, bikopwailisi wowola.

¹⁰Bidubadu bogwa leikatumovi, mapaila komwaidosi matausina kasi lelia isisu ikosaikikinasi, mwada bikabikonaisi matauna.

¹¹Tutala matausina eisikailasi baloma gaga igisaisi matauna ikavaginasi omatala, idouwaisi, kawasi, “Yoku Yaubada Latula.”

¹²E Yesu saina iluluki baloma gaga taga bikayayaisi availa matauna.[55]

¹³Imwena wa koya, e idou bimakaiasi matauna availa magila. Imakaiasi matauna,

¹⁴e inagi tailuwotala taiyu e idoki matausina aposetolo.[56] Iluki matausina, kawala, “Lanagaimi kidamwa bukusikailigusi. E igau bawitalaimi kidamwa bukukwamatulasi,

¹⁵deli kidamwa bisim mi karaiwaga bukuyabaisi baloma gaga.”[57]

¹⁶E inagi baisa makawala. Saimoni matauna idoki yagala Pita;

¹⁷Sebedi latula Yemesa, toyo bodala Yoni, kasitaiyu idoki igasi Bowanagi, e kidamwa takivilaisi, Inala Pilapala;

¹⁸Anideru, Pilipi, Batolomiu, Madiu, Tomasi, Alipio latula Yemesa, Tadiusa, Saimoni guma Kenani,[58]

¹⁹e Yudasa Isikariota,[59] matauna igau tokwasesila.

²⁰Yesu isuvi ola bwala.[60] Tobobawa ilokaiasi isigugulasi tuvaila, mapaila gala gagabila Yesu deli la toligalega bikamsi.

²¹E Yesu veyala[61] bogwa ilagaisi, ilokaiasi mwada bikatupipaisi matauna, paila ikaibigasi, kawasi, “Matauna ikanagowa.”

²²Toninitalapula paila Karaiwaga metoyasi Yerusalem leimaisi ikaibigasi, kawasi, “Bielisibuli[62] eisikaili matauna, e iiyabi baloma gaga paila uula matauna baloma gaga si guyau ikatupewoli matauna.”

²³Mapaila Yesu idou matausina bimakaiasi matauna, iluki matausina bigavisaiki,[63] kawala, “Ammakawala Setani biyabi Setani?

²⁴Kidamwa kabokwaraiwaga ipoisivisisi, e iuvataisi, kabokwaraiwaga makwaina gala bitotu.

²⁵Kidamwa bwala ikovisi, e iuvataisi, bwala makwaina gala gagabila bitotu.

²⁶E kidamwa Setani biuvatai baisa titoulela, bogwa ikovisi e gala bitotu. E bogwa biwokuva.

²⁷“Gala taitala bisuvi ola bwala topeula biveilau la guguwa mitaga ikugwa biyuwolibogwi topeula oluviga biveilau metoya ola bwala.

²⁸“Kululuwaisi baisa! Yaubada biligaiwa tomota si mitugaga komwaidona, deli avai bigigaga ibigigagaisi Yaubada.

²⁹Mitaga Yaubada gala biligaiwa la mitugaga availa bibigigagi Baloma Tobumaboma, gala avai tuta goli. La mitugaga gala biwokuva, bikanigaga.”

³⁰Yesu ilivala makawala paila uula mimilisi leikaibigasi, kawasi, “Baloma gaga isikaila matauna.”

³¹Imaisi Yesu inala, budala;[64] itotusi okoukweda, iwitalaisi biga baisa Yesu mwada bimakaia matausina.

³²Tobobawa isiulaisi Yesu, e ilukwaisi matauna, kawasi, “Ka, inam deli budamwa itotusi okoukweda, magisi wala yoku.”

³³E Yesu ivitakauloki, kawala, “Availa inagu e availa budagwa?”

³⁴E imitibilibili baisa matausina isiulaisi, ikaibiga, kawala, “Ka! Baisaga inagu budagwa.

³⁵Paila availa bivagi nanola Yaubada, matauna wala bodagu, luguta, e inagu.”