Read Kilivila MAKA 6 Bible Online

MAKA 6 - Kilivila bible

MAKA 6

¹Yesu isilavi mapilana, imakaia ola valu tatoula,[78] e la toligalega ibokulaisi matauna.

²E osabate ivitouula la vituloki[79] wa bwala tapwaroru; e bidubadu ilagaisi itutu uwosi, kawasi, “Wa! Ammetoya matauna ibani komwaidona vavagi makwaisina? Ammakawala kala mimilakatila nanola isakaisi matauna? Ammakawala vavagi siligaga ivagi matauna?

³Ki, matauna tokwaliai bwala, e Meri latula,[80] deli budala Yemesa, Yosesi, Yudasa, Saimoni? E luleta isikailidasi baisa kadai?” E mapaila ipakaisi matauna.

⁴Yesu iluki matausina, kawala, “Tomota itemmalaisi tovitoubobuta,[81] mitaga ola valu tatoula, kaina baisa veyala tatoula, kaina ola bwala tatoula, gala wala.”

⁵Gala gagabila kwaitala vavagi siligaga bivagi baisa, mesinaku yamala ikabikoni taivila wala tokwatoula, iyomovi matausina.

⁶Itutu wowola Yesu paila gala idubumaisi. Ititavina ovalu mapilasina katitaikina, iuvituloki.

⁷E idou matausina tailuwotala taiyu bimakaiasi matauna, ivitouula iwitali matausina bilosi taiyu taiyu, isaiki matausina si karaiwaga biyabaisi baloma gaga.[82]

⁸Iluki matausina, kawala, “Taga sitana avaka bukukwauwaisi paila mi kwaidadina mesinaku kaitukwa wala; gala kami kalaga, gala kauya, gala mani okami kauya;[83]

⁹bukusipwaisi katubukolela kaikemi; mitaga taga bukusikomasi yayu kwama.”[84]

¹⁰Iluki matausina, kawala, “Avai bwala bivaulaimi, bukusisuaisi baisa igau oluvi bukusilavaisi mapilana valu.

¹¹E kidamwa avai valu gala bikamiabaimi, e gala bilagaimi, ka, tutala bukusilavaisi kukwatusisapaisi pwaipwaia okaikemi;[85] baisa kabutuvatusi omitasi tomota.”

¹²E toligalega ilosi ikamitulaisi kidamwa ibodi tomota bininavilasi.

¹³Iyabaisi bidubadu baloma gaga;[86] ivaputumaisi bidubadu tokwatoula e iyomovaisi matausina.

¹⁴Kini Erodi[87] ilagi vavagi makwaisina; paila Yesu bulogala bogwa ikaligiaki ambaisa ambaisa. E mimilisi ikaibigasi, kawasi, “Yoni Tobapitaisi bogwa eitokaia imovavau; mauula peula makwaisina iuvagaisi avaka olumoulela matauna.”

¹⁵Mitaga mimilisi kawasi, “Matauna Ilaitia[88] wala.” E mimilisi kawasi, “Matauna tovitoubobuta, makawala taitala tovitoubobuta tobubogwa.”

¹⁶Mitaga tutala Erodi ilagi ikaibiga, kawala, “Matauwena Yoni, bogwa lakapituni kaiyola, - ka, bogwa leitokaia.”

¹⁷Paila Erodi leiwitali mimilisi eiyosisi Yoni, e ivisuyaisi wa bwala katupipi. Paila uula Erodi bogwa ivaisabu Erodiasa minana la kwava bodala Pilipi.[89]

¹⁸E tuta tuta Yoni leiluki Erodi, kawala, “Saina toyogegedu yoku bukuvaisabu la kwava bodam.”

¹⁹Erodiasa saina kala leiya baisa Yoni, magila wala bikatumati matauna. Mitaga gala gagabila,

²⁰paila Erodi ikukoli Yoni, inikoli matauna tomitukwaibwaila toyo tobumaboma, mapaila iyusi ikoli matauna. Yoni la biga iyomwasali Erodi, mitaga avai tuta bililagi matauna saina iwouwouya nanola.[90]

²¹Mitaga Erodiasa ibani kala tuta, ola yam kaloubusi Erodi. Yam makwaina Erodi ivagi kamkwam baisa guyousola deli kasi tokugwa tokwabilia deli tommoyela Galili.

²²Tutala minana Erodiasa latula isuvi e ikikaiwosi omitasi, iyomwasali nanola Erodi toyo matausina deli ikamkwamsi. E kini iluki minana vilakapugula, kawala, “Kunigadaigu avaka magim e basakaim.”

²³Ikatotila baisa minana, kawala, “Omatala Yaubada, avaka kunigadaigu, makwaina basakaim, kaina biboda mabila valu akaraiwaga.”

²⁴Minana isunapula ikatupoi inala, kawala, “Avaka banigadi?” Ikaibiga, kawala, “Pwanetala Yoni Tobapitaisi.”

²⁵E vilakapugula minana isakaula baisa kini, inigadi, kawala, “Magigu nani kusakaigu Yoni Tobapitaisi pwanetala wa kaboma.”

²⁶Kini saina ikiuta nanola, mitaga paila la biga katotila omatala Yaubada, tuvaila paila sala deli ikamkwamsi, gala gagabila bikoulovi minana.

²⁷E nanakwa iwitali taitala tosikwawa, iluki bimai pwanetala Yoni. Ila ikapituni kaiyola matauna wa bwala katupipi,

²⁸imai pwaneta wa kaboma, isaiki vilakapugula; e minana isaiki inala.

²⁹Tutala Yoni la toligalega ilagaisi baisa, imaisi ilupaisi tomata, ivisililaisi wa laka.

³⁰Aposetolo[91] ikaimilavausi[92] baisa Yesu, ilukwaisi matauna komwaidona avaka leivagaisi deli leivitulokaisi.

³¹Saina bidubadu tomota ilovivilasi omitasi e gala ibanaisi tuta paila bikamsi. Mapaila Yesu iluki matausina, kawala, “Kaina bitalosi ovilouwokuva e kadamwaletasi bitasisuaisi bukuvaiwasisi sitana.”

³²Mapaila isilasi wa waga kasimwaleta e ilokaiasi ovilouwokuva.

³³Mitaga bidubadu igisaisi matausina ilosi, e ivitoyaisi matausina;[93] e tomota isakaulasi metoyasi ovalu komwaidona e ilobogwasi.

³⁴Yesu itobusi e igisi tobobawa sainela, e saina inokapisi matausina, paila mabudona makawala sipi gala isim kasi toyamata. Mapaila ivitouula ivituloki matausina vavagi bidubadu.

³⁵Igau yam bogwa biwokuva, la toligalega imakaiasi matauna, ikaibigasi, kawasi, “Baisa mapilana vilouwokuva wala, e yam bogwa biwokuva.

³⁶Kuwitali matausina bilosi ovalu katitaikina deli okidodina bigimwalasi kʹasi.”

³⁷Mitaga Yesu ivitakauloki matausina, kawala, “Yokomi kusakaisi matausina sitana avaka bikamsi.” Ikatupoiyaisi matauna, kawasi, “Ki, ammakawala? Bakalosi bakagimwalasi kaula mapula lakatuyu kina,[94] bakasakaisi matausina sitana avaka bikamsi?”

³⁸E Yesu ikatupoi matausina, kawala, “Kwaivila beredi kuiyosisi? Kulosi kunevisi.” E bogwa ibanaisi ikaibigasi, kawasi, “Kwailima, deli nayu yena.”

³⁹Yesu iluki la toligalega bikatuvaisi boda bisigugulasi omnumonuvau.

⁴⁰Isilaisi mimilisi mayuwosina tailakatutala, mimilisi tailuwolima.[95]

⁴¹E Yesu ikau kwailima beredi makwaisina deli nayu yena, ikounakaila gawata inokagutoki baisa Yaubada, ikimimisi beredi, isaiki toligalega bipataisi baisa tomota. Tuvaila yena minasina Yesu ikimimisi e la toligalega isakaisi baisa komwaidosi.

⁴²E komwaidosi ikamsi ikomatasi.

⁴³Ikatuyoulaisi kasi kobwaga beredi deli yena luwotala yuwa peta ikasewasi.

⁴⁴E matausina tauwau tokwam beredi kasi bawa tailakatuluwolima tauwau.

⁴⁵E nanakwa ikaraiwogi la toligalega bisilasi wa waga, bitapelasi bilobogwasi mapilana ewaiwa,[96] baisa Betisaida; paila igau Yesu bitali tobobawa bilosi.

⁴⁶Bogwa itali matausina imwena wa koya kidamwa binigada.

⁴⁷E bogwa ikoyavi, waga idowala olopola bolita, mitaga matauna kalamwaleta isisu okawolawa.

⁴⁸Igigisi matausina ikwaikuyuvasi sainela isomatasi veiga, paila yagila ikatuyumali. E obulubuvisiga imakaia matausina ililoula wa gorina. Mwada bivaligili[97] matausina,

⁴⁹mitaga tutala igisaisi matauna ililoula wa gorina idokaisi matauna kosa, e saina iukuwakulasi.

⁵⁰Paila komwaidosi igisaisi matauna, e saina ikubukubu luposi. Mitaga Yesu nanakwa iluki matausina, kawala, “Bitalaguva lupomi, yeigula; taga kukokolasi.”

⁵¹Isila wa waga deli matausina e yagila imata. E saina itutu uwosi sainela.

⁵²Gala bikatetasi paila beredi makwaisina, paila ninasi saina kasai.

⁵³Bogwa italaguvasi eimaisi ovalu Genesareta[98] iwakopaisi si waga olumata.

⁵⁴Bogwa itobusisi, e nanakwa tomota ivitoyaisi matauna,

⁵⁵ititavinasi nanakwa okatuposulala komwaidona; e ambaisa ilagaisi Yesu isisu, baisa ikauwaisi kabasi komwaidosi tokwatoula.

⁵⁶E ambaisa ambaisa Yesu iviloubusi, kaina ovalu viloukikekita kaina ovalu vilouvakaveka, kaina obuliyamata, isailisi si tokwatoula obikubaku, iyokakapisisi baisa matauna kidamwa bikabikonaisi kaina kaipagala kala kwama[99] wala; e availa availa ikabikonaisi miyana ibwainasi wala.