Read Kilivila LUKA 17 Bible Online

LUKA 17 - Kilivila bible

LUKA 17

¹E iluki la toligalega, kawala, “Mokwita kabokwapusi bimaisi; mitaga wo! tau matauna uula bimaisi!

²Ibodi sainela kidamwa bisipwaisi kwaitala uyuwa kwaiveka okaiyola e bilavaisi obolita, mitaga gala ibodi matauna bivakapusii taitala matausina tokikekita.

³Kuyamataimi. “Kidamwa bodam kaina tuwam[173] bisula, kubuyoyu matauna; kidamwa bininavila, bukuligaiwa la mitugaga matauna.

⁴Kidamwa bivagi sula baisa yoku biboda sivalima sivayu wa yam kwaitala, e sivalima sivayu bimakaiam bikaibiga, kawala, ‘Bogwa laninavila’, ibodaim bukuligaiwa la mitugaga.”

⁵E aposetolo ilukwaisi Tomoya, kawasi, “Ma dubumaisi kukwatumkulovi!”

⁶E Tomoya ivitakaula, kawala, “Kidamwa mi dubumi kala kwaiveka makawala waitunela mwaiya, gagabila bukulukwaisi makaina yaku, kawami, ‘Kukoulaim kulavaim obolita’, e bikabikuwolaimi.

⁷“Kaina taitala mi towotetila ibigubagula kaina iiyamati sipi. Igau bima metoya obuyagu, ki, bukuluki matauna, kawami, ‘Nani kuma kukwam’?

⁸Gala goli. Bukuluki matauna, kawami, ‘Kusulu kʹagu, e kukwatulova, kuyeyai kʹagu, kumai. Bakam, bamom; oluviga yoku.’

⁹Ammakawala, bukunokagutoki baisa m towotetila paila ikabikuwoli karaiwaga kaina gala?

¹⁰Makawala goli yokomi. Kidamwa bogwa lokuvigimkulovaisi avaka kami karaiwaga, bukukwaibigasi, kawami, ‘Yakidasi da wotetilasi sitana wala; paila bogwa tavagaisi makawala kada karaiwagasi wala.’”

¹¹E tutala ililoula ilokaia Yerusalem, ivakana okaligeisi Sameria toyo Galili.

¹²Tutala iviloubusi kwaitala valu, tailuwotala tokwagwaiguya ibodaisi matauna. Itotusi sita ewaiwa,

¹³e ikapinivekasi, ikaibigasi, kawasi, “Yesu, Guyau, kunokapisaimasi.”

¹⁴Tutala igisi, iluki matausina, kawala, “Kulosi, kuvitulokaimi baisa tolula.”[174] Mapaila ilosi. Ililoulasi, e ka, bogwa imigileusi.[175]

¹⁵E taitala matausina, tutala igisi leibwaina, ikaimilavau e deli kaigala kaigaveka iiyakawoli Yaubada.

¹⁶Ikavagina omatala Yesu, inokagutoki; e matauna guma Sameria.

¹⁷E Yesu ikawota, kawala, “Ki, gala akatumigileu tailuwotala? Mitaga ambaisa matausina tailima taivasi?

¹⁸Gala taitala isisu bikaimilavau biyakawoli Yaubada, mitaga matauna togilagala wala ke?”

¹⁹E iluki matauna, kawala, “Kutokaia, kula; m dubumi bogwa iyomovaim.”

²⁰Parisi ikatupoiyaisi matauna avai tuta Yaubada la Karaiwaga bima. Yesu ivitakauloki matausina, kawala, “Gala bigisaki matila bitakateta Yaubada la Karaiwaga bimaima.

²¹Gala bitakaibigasi, ‘Ka, baisa emaima!’ kaina ‘Ka, baisa ewaiwa!’ Paila ka, Yaubada la Karaiwaga isisu olumoulemi.”[176]

²²Iluki toligalega, kawala, “Igau tuta bima bukupikwakusi bukugisaisi kwaitala ulo yam yeigu Latula Tomota, mitaga gala bukugisaisi makwaina.

²³E tomota bilukwaimi, kawasi, ‘Ka, baisa ewaiwa!’ kaina ‘Ka, baisa emaima!’ Taga kulosi, kaina bukubokulaisi matausina.

²⁴Paila yeigu Latula Tomota agu gigisa ogu yam[177] makawala kavikavila kidamwa bikavila e bititapi labuma metoya okwaibwaga baisa obomatu.

²⁵Mitaga ikugwa ibodi matauna bibani kala mmayuyu bidubadu, e tubwa matubona bipakaisi matauna.

²⁶Makawala ola tuta Nowa,[178] makawala goli yeigu Latula Tomota ogu tuta.

²⁷Ikamkwamsi imomomsi, iveivaisi, ipukupakusi, ee, yam makwaiwena Nowa isila ola waga, e leima dadoya, komwaidosi idoumlabasi.

²⁸Makawala goli ola tuta Lota,[179] ikamkwamsi, imomomsi, igigimwalasi, imipumapusi, isupusopusi, iiyoudilasi,

²⁹mitaga wa yam makwaina Lota isilavi Sodom, e kova kovalululu toyo salipa maiinela saina peuluvagasi ididabwalisi makawala kuna metoya wa labuma, e komwaidosi idoumlabasi.

³⁰E makawala bikaloubusi wa yam makwaina yeigu Latula Tomota bayoumatila.

³¹“Wa yam makwaina, matauna isisu obuneyova[180] deli la guguwa olopola bwala, gala ibodi bikau makwaisina. Makawala matauna isisu obuyagu gala ibodi bikaimilavau.

³²Kululuwaisi la kwava Lota.[181]

³³Availa mwada biyusi tatoula, matauna bitamwau; e availa bikitumou tatoula, matauna bimova goli.

³⁴Alukwaimi, wa bogi makwaina taiyu tauwau ikanuvadulisi bikanukwenusi okabasi kwaitala; Yaubada bikau taitala e taitalaga bikanam.

³⁵Nayu vivila bitutusi kasi witi bimila pwarawa; Yaubada bikau natana e natalaga bisim.”[182]

³⁷Ikatupoiyaisi matauna, kawasi, “Tomoya, ambaisa?” Iluki matausina, kawala, “Ambaisa tomata bikanukwenu, baisa mluveka[183] bitogugulasi mwada bikamsi.”