Read Kilivila LUKA 2 Bible Online

LUKA 2 - Kilivila bible

LUKA 2

¹Wa yam makwaisina Sisa Ogusita[18] ikaraiwaga kidamwa bisonukulasi komwaidosi mina watanawa.

²Makwaina sonukula sivatala ola tuta Kwiriniusi mina Siria[19] si tokwaraiwaga.

³E komwaidosi ilosi biginisi yagasi, taitala taitala baisa ola valu tatoula.

⁴E Yosepa isilavi Nasaredi mapilana Galili ilokaia Yudia ola valu Debida, yagala Bedeliem,[20] paila matauna Debida dalela mokwita.

⁵Mwada bigini yagala toyo Meri yagala, e minana bogwa eipaku bivaisi. E minawena bogwa isuma.

⁶Mesisikaisi baisa, e tuta matutona bitapoi yamala.

⁷E ivilulu la kuluta tau;[21] e ikapoli magudiwena e isaili okasi kaiwaga bulumakau, paila gala si kabosisu wa bwala kwaidadina.

⁸Mapilana valu toyamata sipi isisuaisi osaivau, iyamataisi si sipi wa bogi.

⁹E la anelosi Guyau iyoumatila baisa matausina e Guyau la guyugwayu ivisigili matausina; e ikokolasi sainela.

¹⁰Anelosi iluki matausina, kawala, “Taga kukokolasi. Paila ka, amiakaimi Bulogala Bwaina biyomwasali sainela tomota komwaidosi;

¹¹paila yam lagaila kami Tokwatumova, matauna Keriso Guyau, leikaloubusi ola valu Debida.[22]

¹²Baisa bikibuboti kala kamokwita baisa yokomi; bukubanaisi pwapwawa bogwa ikapolaisi, e ikanukwenu okasi kaiwaga bulumakau.”

¹³E nani iyoulapulasi labuma kala boda tobobawa deli matauna anelosi iyakawolaisi Yaubada, kawasi,

¹⁴“Kala tulaula Yaubada walakaiwa sainela wa labuma e watanawa bitalaguva luposi matausina iyomwasalaisi Yaubada.”[23]

¹⁵Tutala anelosi isilavaisi matausina ilokaiasi labuma, toyamata sipi ibigatonasi kawasi, “Bitalosi Bedeliem, bitagisaisi avaka bogwa ikaloubusi, makawala Guyau leilukwaidasi.”

¹⁶E nani ilosi, ibanaisi Meri toyo Yosepa, toyo pwapwawa ikanukwenu okasi kaiwaga bulumakau.

¹⁷Bogwa igisaisi, oluvi ilivalaisi avaka anelosi leiluki matausina paila gwadi magudiwena.

¹⁸E komwaidosi ilagaisi baisa itutu uwosi paila toyamata sipi si bigatona.

¹⁹Mitaga Meri vavagi komwaidona itaku onanola, ininanamsi.

²⁰E toyamata sipi ikaimilavausi, e ikikabwailisi Yaubada iyakawolaisi goli paila vavagi komwaidona avaka leilagaisi leigisaisi, makawala anelosi leiluki matausina.

²¹E bogwa leiboda kwailima kwaitolu yam paila kala bobu.[24] Ivabwaisi yagala Yesu, makawala anelosi leilukibogwi minana igau gala bisuma.

²²E bogwa leiwokuva yamla si kikila[25] makawala la Karaiwaga Mosese, Yosepa sola Meri imaiyaisi magudina Yerusalem, kidamwa bisakaisi matauna baisa Guyau.

²³Makawala la Karaiwaga Guyau kala ginigini, “Si kuluta tauwau[26] bikabomaisi baisa Guyau.”

²⁴E bilulasi makawala ola Karaiwaga Guyau, “nayu bubuneroro kaina nayu bubuna natubovau.”

²⁵E taitala tau yagala Simioni isisu Yerusalem, tomitukwaibwaila deli totapwaroru mokwita matauna, e itulotula kasi tokwala Isireli, e Baloma Tobumaboma isikaili matauna.

²⁶Baloma Tobumaboma ivituloki matauna gala bikaliga igau matutona bigisibogwi Guyau la Mesaia.[27]

²⁷E Baloma Tobumaboma ivakadi matauna wa Bwala Kwebumaboma; e tamala inala imaiyaisi magudina Yesu kidamwa bivigakaisi magudina makawala Mosese la Karaiwaga.

²⁸Simioni ikopwi magudiwena, iyakawoli Yaubada, kawala,

²⁹“E Guyau[28] lagaila kutanekwaigu yeigu m touwata, makawala m biga katotila.

³⁰Italaguva lopogu, paila agisaki matagu m kwatumova.

³¹Bogwa kukwatubiasi omitasi tomota komwaidosi,

³²lumalama bititapi si keda matausina gala mina Yudia, deli bivigaki kasi katububula m tomota Isireli.”

³³Magudina tamala deli inala[29] itutu uwosi paila avaka matauna ilivala.

³⁴E Simioni ikabwaili matausina, iluki Meri gwadi inala, kawala, “Gwadi magudiwena Yaubada leinagi, kidamwa bidubadu mina Isireli bikapusisi kaina bitokaiasi paila uula matauna. Magudiwena Yaubada la kabutuvatusi, baisa tomota bidubadu bitakilaisi matauna,

³⁵e mapaila biyomitali si nanamsa kwekikiwola. E yoku, bukubani valam makawala kaiyala ibubasaim.”

³⁶E isisu natana navitoubobuta yagala Ana, Panuela latula, dalela Asera. Minana numoya, isisu sola la mwala kwailima kwaiyu taitu wala,

³⁷e ikwabuya paila taitu kweluwolima kweluwotolu kwaivasi.[30] Minana gala bisilavi Bwala Kwebumaboma, mitaga yumyam bugibogi ititapwaroru deli la pusoposuma[31] toyo ninigada.

³⁸E wa tuta matutona ima inokagutoki baisa Yaubada, ilivala paila magudina baisa komwaidosi itutulaisi mwada Yaubada bitaneku Yerusalem.

³⁹E bogwa ivagaisi vavagi komwaidona makawala la Karaiwaga Guyau, ikaimilavausi Galili osi valu tatousi yagala Nasaredi.

⁴⁰E monagwadi ikatusaili itowonaku e ipeula. Ikabitam sainela deli Yaubada imitukwaii matauna vavagi bidubadu.

⁴¹E taitu kwaitala kwaitala tamala inala melokaisi Yerusalem paila Luvapela[32] Pakala.

⁴²E tutala Yesu kala taitu kweluwotala kwaiyu, ilosi makawala kasi gulogula.

⁴³E paka bogwa leiwokuva ikikaimilavausi; e gwadi Yesu isiwa Yerusalem, mitaga tamala inala gala inikolaisi.

⁴⁴Idokaisi isisu osi boda, mapaila ikalatalasi ililoulasi, e inevisi magudiwena oluwalaisi veisia deli lubesia.

⁴⁵Mitaga gala ibanaisi matauna, e ikaimilavausi Yerusalem, inainevisi matauna.

⁴⁶E bogwa ikalatolusi ibanaisi matauna wa Bwala Kwebumaboma isiwalai tovituloki ililagi matausina deli ikikatupoi matausina;

⁴⁷e komwaidosi ilagaisi matauna saina itutu uwosi sainela paila la kateta toyo la vitakaula.

⁴⁸E tutala igisaisi matauna itutu uwosi; e inala iluki matauna, kawala, “Latugu, avaka paila kuvigakaima makawala? Kugisi tamam deli yeigu lakaninevaim deli ma nokubukubu paila yoku.”

⁴⁹Iluki matausina, kawala, “Avaka paila kuninevaigusi? Ki, gala kunikolaisi ibodaigu basisu ola bwala Tamagu?”[33]

⁵⁰Mitaga gala ikatetasi avaka eikaibigi.

⁵¹E ikaimilavau deli matausina ilosi Nasaredi, ikabikuwoli matausina. E inala vavagi komwaidona makwaisina itaku onanola.

⁵²E Yesu iyouloveka la kabitam toyo itowonaku; tuvaila Yaubada deli tomota ikabwailisi matauna.