Read Kilivila LUKA 20 Bible Online

LUKA 20 - Kilivila bible

LUKA 20

¹E kwaitala yam ivituloki tomota wa Bwala Kwebumaboma e ikamituli Bulogala Bwaina. E tolula kasi tokugwa deli toninitalapula paila Karaiwaga deli kaidadala valu[205] imakaiasi,

²ilukwaisi matauna, kawasi, “Kulukwaimasi avai karaiwaga kuvagi vavagi makwaisina. Availa isakaim karaiwaga makwaina?”

³Ivitakauloki matausina, kawala, “Yeigu tuvaila bakatupoiyaimi kwaitala katupoi; bukulukwaigusi,

⁴Yoni kala karaiwaga paila bapitaiso metoya baisa Yaubada kaina metoya baisa tomota?”

⁵Ititamapusi titoulesi, kawasi, “Kidamwa bitakaibigasi, ‘Metoya baisa Yaubada’, matauna bikaibiga, ‘Avaka paila gala kudubumaisi Yoni?’

⁶Mitaga kidamwa bitakaibigasi, ‘Metoya baisa tomota’, e tomota komwaidosi bikabidikunaidasi, paila idokaisi Yoni tovitoubobuta.”[206]

⁷Ivitakaulasi, kawasi, “Gala kanikolaisi bapitaiso makwaina kala karaiwaga ammetoya leima.”

⁸E Yesu iluki matausina, kawala, “Yeigu makawala goli gala balukwaimi avai karaiwaga avagi vavagi makwaisina.”

⁹Ivitouula biluki tomota bigavisaiki[207] makwaina. “Taitala tau ibiguli bigulela waini, e ikabutu makwaina baisa tobigubagula, ila ituwoli valu tuta kaduwonaku.

¹⁰Igau kala kweluva tayoyuwa iwitali touwata baisa tobigubagula, kidamwa bisakaisi matauna sitana kaiuwala bagula makwaina; mitaga tobigubagula iwawaiyasi matauna, iyabaisi inanota wala.

¹¹Tuvaila iwitali touwata taiyuwela; matauwena tuvaila iwawaiyasi, iyogagaisi, iyabaisi inanota wala.

¹²Tuvaila iwitali touwata taitolula; matauwena ikatubuyavaisi iyabaisi.

¹³E tolibagula ikaibiga, kawala, ‘Avaka bavagi? Bawitali latugu tombwailigu;[208] kaina bitemmalaisi matauna.’

¹⁴Mitaga tutala igisaisi latula, tobigubagula ikaibigasi titoulesi, kawasi, ‘Matauna kaikeyala; takatumataisi matauna, kidamwa bitayoulisi da bagulasi.’

¹⁵E ilavaisi matauna otokeda bigulela waini, ikatumataisi. “Mapaila avaka tolibagula bivigaki matausina?

¹⁶Matauna bima, bikatumati matausina tobigubagula, bisaiki bigulela waini tuwoli tomota.” Tutala ilegasi makwaina, tomota ikaibigasi, kawasi, “Wa! Ammakawala!”

¹⁷Mitaga igigisi matausina, ikaibiga, kawala, “E ammakawala ginigini makwaina wa Buki Pilabumaboma? ‘Dakuna itakilaisi tokwaliai bwala, makwaina ivigaki makawala lipumatala.’

¹⁸Availa availa bikapusi wa dakuna makwaina bikatumimisi; mitaga kidamwa dakuna bikapusi baisa availa, bikatumkumku matauna.”

¹⁹E toninitalapula paila Karaiwaga deli tolula kasi tokugwa ikimalalasi mwada biyosisi matauna wa tuta matutona. Paila inikolaisi leilivala kasi bigavisaiki makwaina. Mitaga ikukolaisi tomota.

²⁰Iuwayausasi avai tuta bibodi. Iwitalaisi mimilisi ilokaiasi Yesu, bivitokaisi mwada toduwosisia, e biligalegasi avai biga bikapeili Yesu; mwada biyosisi matauna bikasalaisi baisa mina Roum si Tokwaraiwaga, kidamwa biyosi bikaraiwogi.

²¹Ikatupoiyaisi matauna, kawasi, “Tovituloki, kanikolaisi baisa avaka kulilivala deli kuuvituloki duwosisia wala; e makawala wala nanom baisa tomota komwaidosi, paila kuuvituloki kala mokwita la keda Yaubada.

²²E ammakawala? Ibodi da Karaiwagasi bitapokalasi baisa Sisa[209] kaina gala?”

²³Mitaga Yesu inikoli si vitoki, e iluki matausina, kawasi,

²⁴“Kumiakaigusi kwaitala mani.[210] Availa kaikobula deli yagala isisu baisa?” Ikaibigasi, kawasi, “Sisa.”

²⁵Mapaila Yesu iluki matausina, kawala, “E, bukusakaisi Sisa avaka la vavagi Sisa, deli bukusakaisi Yaubada avaka la vavagi Yaubada.”

²⁶E gala igagabila biyosisi matauna metoya ola biga omitasi tomota; itutu uwosi paila la biga, e ikapatusi.

²⁷Imakaiasi matauna mimilisi Sadusi.[211] Matausina si vituloki kidamwa tomata gala bitokaiasi bimovavausi.

²⁸Ikatupoiyaisi matauna, kawasi, “Tovituloki, Mosese leigini paila yakidasi la karaiwaga kidamwa taitala tau tuwala ikaliga, mitaga kubuyala minana latula gala. Ibodi matauna bivaiya minana, kidamwa bisim dalela tuwala.

²⁹E, isisu taitala tau deli budala tailima taitala. Matauna kuluta ivaiya, e ikaliga gala pesila.

³⁰E matauna isakaili makawala wala;

³¹e moluluwala ivaiya minana, e makawala goli komwaidosi tailima taiyu ikaligasi gala pesisi.

³²Oluvi vivila minawena tuvaila ikaliga.

³³Mapaila igau tutala tomata bitokaiasi bimovavausi, avai tau minana la kwava? Paila matausina tailima taiyu bogwa leivaiyasi minana.”

³⁴E Yesu iluki matausina, kawala, “Mina watanawa iveivaisi.

³⁵Mitaga matausina Yaubada idoki ibodi bitokaiasi bimovavausi e bisuvisi walakaiwa - e, matausina gala iveivaisi.

³⁶Paila gala igagabila bikaligasi tuvaila; paila matausina makawala anelosi. Matausina ikaloubusisi walakaiwa metoya tomata si movavau, mapaila matausina litula Yaubada.

³⁷Mitaga Mosese goli ivituloki kidamwa tomata bitokaiasi bimovavausi, mapilawena ilivala paila makaina kai ilululu. Paila wa tuta matutona idoki Guyau matauna Eberaam la Yaubada, Aisake la Yaubada, Yekobe la Yaubada.[212]

³⁸Metoya baisa bitagisi matauna si Yaubada tommomova; kidamwa Yaubada la tomota bikaligasi baisa ovalu watanawa, isisuaisi tommomova omatala Yaubada; paila komwaidosi imovasi uulela matauna.”

³⁹E mimilisi toninitalapula paila Karaiwaga ivitakaulasi, kawasi, “Tovituloki, bogwa kukwabuboti.”

⁴⁰Paila imwau udosi bikatupoiyaisi matauna avai katupoi.

⁴¹Mitaga iluki matausina, kawala, “Ammakawala tomota ikaibigasi kidamwa Mesaia[213] dalela Debida?[214]

⁴²Paila titoulela Debida ikaibiga Sam ola buki, kawala, ‘Matauna Guyau iluki ulo Guyau, Kusili ogu kwakata,[215]

⁴³igau bavigakaim bukukwalisau[216] kam tilaula.’

⁴⁴Kidamwa giyoubogwa Debida idoki Mesaia matauna Guyau, ammakawalaga Mesaia bitadoki dalela Debida?”

⁴⁵E otaigasi tomota komwaidosi iluki la toligalega, kawala,

⁴⁶“Kuyamataimi paila matausina toninitalapula paila Karaiwaga, matausina magisi bililoulasi kasi kwama yauwonaku; iyebwailisi tomota bibodaisi deli kasi taimamila obikubaku. Ininagaisi kala sisu walakaiwa wa bwala tapwaroru, deli buneyova kala kaisisu wa lapula;

⁴⁷matausina iyoulisi kwabuya si bwala, e si nigada ivagaisi saina kasai mwada tomota bigisaisi; matausina kasi mipuki saina kwaiveka.”