Read Kilivila LUKA 22 Bible Online

LUKA 22 - Kilivila bible

LUKA 22

¹E katitaikina ola tuta Beredi Gala Deli Kala Yisi Pakala, idokaisi Luvapela[220] pakala.

²E tolula kasi tokugwa toyo toninitalapula paila Karaiwaga inainevisi ammakawala bikatumataisi matauna. Mitaga ikukolaisi tomota.

³E Setani isikaila Yudasa idokaisi Isikariota,[221] matauna taitala matausina tailuwotala taiyu.

⁴Matauna ila, ililivalasi deli tolula kasi tokugwa toyo kumatoula[222] matausina ammakawala bikasali Yesu baisa matausina.

⁵E imwasawasi, ikatotilasi bisakaisi matauna mani.

⁶E itagwala inainevi avai tuta bibodi bikasali matauna baisa matausina tutala tobobawa gala deli bisisuaisi.

⁷Yamla makwaina Beredi Gala Deli Kala Yisi Pakala, si bubunela bikatumataisi minasina lam lulela Luvapela Pakala.

⁸Mapaila Yesu iwitali Pita sola Yoni, ikaibiga, kawala, “Kulosi, kukwatubiasaisi Luvapela Pakala paila yakidasi, kidamwa bitakamsi.”

⁹Ilukwaisi matauna, kawasi, “Ambaisa magim bakakatubiasi paka?”

¹⁰Iluki matausina, kawala, “Ka, tutala bukusuvisi ovilouveka,[223] bukubodasi taitala tau ikokeula lukwavala sopi.[224] Kubokulaisi matauna kusuvisi bwala makwaina ambaisa bisuvi,

¹¹e kulukwaisi tolibwala, kawami, ‘Tovituloki ilukwaim, Am matabudona baisa bakam Luvapela Pakala deli ulo toligalega?’

¹²E bivitulokaimi tabudotala tabudoveka walakaiwa bogwa leikatubiasi. Baisa bukukwatubiasaisi.”

¹³E ilosi, ibanaisi makawala bogwa leiluki matausina; e ikatubiasaisi Luvapela Pakala.

¹⁴Igau tutala paka, Yesu ikamkwamsi deli aposetolo.

¹⁵Iluki matausina, kawala, “Saina akaliyeia sainela ikugwa bakam Luvapela Pakala makwaina deli yokomi, e oluvi baboda mmayuyu;

¹⁶paila alukwaimi gala tuvaila bakam makwaina mitaga igau avai tuta paka makwaina bibani kala kamokwita ola Karaiwaga Yaubada.”

¹⁷Ikau viga, inokagutoki baisa Yaubada, ikaibiga, kawala, “Kukwauwaisi, kupataisi oluwalaimi;

¹⁸paila alukwaimi, metoya wa tuta makwaina gala tuvaila bamom kaiuwala waini igau tutala Yaubada la Karaiwaga bima.”

¹⁹E ikau beredi, inokagutoki baisa Yaubada, ikimimisi e isaiki matausina, e ikaibiga, kawala, “Baisa wowogu,[225] asaiki paila yokomi. Baisa bukuvagaisi agu kwaboluluwai.”

²⁰E kamkwam bogwa leiwokuva isaiki matausina makwelana viga makawala, kawala, “Viga makwelana baisa Yaubada la kabutuvau buyavigu ikibuboti[226] kala kamokwita e ibubusi paila yokomi.

²¹“Mitaga ka! yamala matauna bikasalaigu isisu deli yeigu okabokamkwam.

²²Paila yeigu Latula Tomota bakaliga makawala goli agu naga. Mitaga wo! matauna bikasali Latula Tomota.”

²³E ivitouulasi bititamapusi taitala baisa taitala, avai tau baisa matausina bivagi vavagi baisa.

²⁴Itokaia kominimani oluwalaisi matausina, availa matausina bidokaisi bisiligaga.

²⁵Yesu iluki matausina, kawala, “Si giyouvakaveka mina watanawa ikikaraiwogaisi matausina, e tomota idokaisi si gweguya tolilalasi.[227]

²⁶Mitaga yokomi gala makawala; mitaga availa isiligaga oluwalaimi, ibodi bivigaki titoulela budami, e availa kami tokugwa, matauwena makawala taitala towotetila.

²⁷Paila avaka kudokaisi? Availa ikalisau, matauna isili ikamkwam kaina matauna iwotetila? Ki, matauna isili ikamkwam? Mitaga yeigu asisu oluwalaimi makawala taitala towotetila.

²⁸“Mitaga yokomi kusikailigusi ogu tuta mwau.

²⁹E makawala Tamagu isakaigu ulo koni bayosi karaiwaga, tuvaila makawala asakaimi mi koni bukuyosisi karaiwaga.

³⁰E bukukwamsi bukumomsi metoya ogu tebeli ogu Kwaraiwaga; e bukusilaisi otakaikaia bukutoyakalasi baisa dalesi Isireli dalaluwotala dalayu.

³¹“Wo! Saimoni, Saimoni, ka! Setani leinigadaimi, kidamwa bikilaimi makawala witi.[228]

³²Mitaga bogwa lanigada paila yoku mwada m dubumi gala bimama. E yoku, tutala lokuninavila, ibodi bukukwatupewoli budamwa.”

³³Iluki matauna, kawala, “Tomoya, igagabila bawokaiam wa bwala katupipi deli okaliga.”

³⁴Yesu ikaibiga, kawala, “Pita alukwaim, igau rekorekwa gala bisola lagaila, mitaga bukusivatolu bukuyakalaigu.”

³⁵Yesu iluki matausina, kawala, “Tutala awitalaimi e kulosi gala kami kauya, kaina kami kalaga, kaina kaikemi katubukolela, sitana kuposumasi ke?” Ikaibigasi, kawasi, “Gala wala.”

³⁶Iluki matausina, kawala, “Mitaga tuta baisa, matauna isim kala kauya, bikau, e makawala kala kalaga. E matauna gala isim la puluta,[229] bigimoli kala kakapula e bimapu kaitala la puluta.

³⁷Alukwaimi paila Buki Pilabumaboma kala ginigini makwaina, ‘Leikalumgolaisi matauna deli tomitugaga.’ E ginigini makwaina ibodi bibani kala kamokwita metoya baisa yeigu. Paila avaka avaka Buki Pilabumaboma leigini paila yeigu gala avaka bisala.”

³⁸E ikaibigasi, kawasi, “Ka, tomoya! kayosisi kaiyu puluta.” Iluki matausina, kawala, “Desi.”

³⁹Isunapula, e makawala la bubunela ilokaia Koya Umilela Olibe; e toligalega ibokulaisi matauna.

⁴⁰Tutala iviloubusi mapilana, iluki matausina, kawala, “Kunigadasi taga bukubodasi tamnabi.”

⁴¹Itowada kala maloula kaina avaka ibodi bitalavi dakuna. E itapopula kwetutula inigada, ikaibiga, kawala,

⁴²“Tamagu, kidamwa kunagi makawala, kukwau makwelana viga[230] metoya omatagu; taga gala bavagi makawala avaka magigu mitaga bavagi makawala avaka magim.”

⁴³(E anelosi[231] iyoumatila baisa matauna metoya wa labuma, ikatupewoli matauna.

⁴⁴E ininigada peula deli kala mmayuyu sainela; e kala kapukwapula ibubusi opwaipwaia kala gigisa makawala buyavi lutukwela kwaiveka.)

⁴⁵Tutala itomalaula metoya ola nigada, imakaia toligalega ibani matausina immasisisi uula paila kasi kaikai.

⁴⁶E iluki matausina, kawala, “Avaka paila kummasisisi? Kutokaiasi kunigadasi taga bukubodasi tamnabi.”

⁴⁷Ililivala, e tobobawa imaisi, e matauna idokaisi Yudasa, taitala matausina tailuwotala taiyu, ikugwai matausina. E ima otalila Yesu, mwada biviyuwoli matauna.[232]

⁴⁸Mitaga Yesu iluki matauna, kawala, “Wo! Yudasa, bukukwasalaigu yeigu Latula Tomota ovayaula ke?”

⁴⁹E tutala matausina isikailisi matauna igisaisi avaka bikaloubusi, ikaibigasi, kawasi, “Tomoya, bakawaiyasi wa puluta ke?”

⁵⁰E taitala matausina iwaiya la towotetila tolula toveka, ikapituni taigala opilakakata.

⁵¹Mitaga Yesu ikaibiga, kawala, “Desi!” Ikau taigala matauna iluvisasu.

⁵²E Yesu iluki tolula kasi tokugwa toyo kumatoula metoyasi wa Bwala Kwebumaboma toyo kaidadala valu, matausina imakaiasi biyosisi matauna, kawala, “Lokumaisi deli puluta toyo lewa makawala baisa tolibulebu ke?

⁵³Yumyambwata asikailimi wa Bwala Kwebumaboma, mitaga gala kukiulaigusi; mitaga tuta baisa yokomi mi tuta, deli dudubila kala peula[233] la tuta.”

⁵⁴Iyosisi matauna, ivakoulisi imiakaisi matauna ola bwala Tolula Toveka; e Pita ililoula oluvi iyeikuli matauna.

⁵⁵Ivigadaisi kova omatala bwala isidailisi gulotala, e Pita isiwala.

⁵⁶E natana nawotetila igisi matauna isili omatala kova. Imitakavati matauna, e ikaibiga, kawala, “Tau matauna tuvaila isikaili matauwena.”

⁵⁷Mitaga iyakala ikaibiga, kawala, “Vilo! Gala anikoli matauwena.”

⁵⁸Igau gala imomwa taitala igisi matauna, ikaibiga, kawala, “Mwa! Yoku goli taitala matausina.” Mitaga Pita ikaibiga, kawala, “Mwa! Yeigu gala.”

⁵⁹E kwaitala momwa bogwa leiwokuva taitolula ikominimani, kawala, “Mokwitala tau matauna isikaili matauwena goli; paila matauna guma Galili.”

⁶⁰Mitaga Pita ikaibiga, kawala, “Wo, mwa! Gala anikoli avaka kulivala.” Ililivala, e nanakwa rekorekwa igela.

⁶¹E Tomoya itovila igigisi Pita; e Pita iluluwai la biga Tomoya ammakawala eiluki matauna, kawala, “Igau lagaila gala bisola rekorekwa bukusivatolu bukuyakalaigu.”

⁶²E isunapula ivalam ivilumgaga.

⁶³E matausina leiyosisi Yesu ikikatudeuwaisi iwawaiyasi matauna;

⁶⁴itapapaisi matala, ikatupoiyaisi, kawasi, “Kuvitoubobuta! availa leiwaim ke?”

⁶⁵E deli bidubadu biga tuvaila ilulukwaisi ibigigagaisi matauna.

⁶⁶Igau iyuwoula kalasia kaidadala valu isigugulasi, matausina tolula kasi tokugwa deli toninitalapula paila Karaiwaga. Ivakoulisi matauna osi sigugula.[234] E ikaibigasi, kawasi,

⁶⁷“Kidamwa yoku matauna Mesaia, bukulukwaimasi.” Mitaga iluki matausina, kawala, “Kidamwa balukwaimi gala bukudubumaisi;

⁶⁸e kidamwa bakatupoiyaimi, gala bukumapwaisi ulo biga.

⁶⁹Mitaga metoya wa tuta matutowena yeigu Latula Tomota basili ola kakata[235] Yaubada Topeuligaga.”

⁷⁰E komwaidosi ikaibigasi, kawasi, “Ki, yokula Yaubada Latula?” Iluki matausina, kawala, “Yokomila kukwaibigasi kidamwa yeigu matauna.”[236]

⁷¹E ikaibigasi, kawasi, “Avai kamatula tuvaila magidasi? Paila titouledasi leitalagaisi metoya owodola titoulela.”