Read Kilivila LUKA 23 Bible Online

LUKA 23 - Kilivila bible

LUKA 23

¹Togugula komwaidona matausina itokaiasi ivakoulisi matauna omatala Pailato.

²Ivitouulasi itabinakaisi matauna, ikaibigasi, kawasi, “Lakabanaisi tau matauna iyogagi ma tomotasi; isilibodi bakapokalasi baisa Sisa, e ikaibiga kidamwa matauna titoulela taitala giyouveka yagala Keriso.”

³Pailato ikatupoi matauna, kawala, “Ki, yoku si giyouveka mina Yudia?” Yesu ivitakauloki matauna, kawala, “Yokula lokukwaibiga.”[237]

⁴Pailato iluki tolula kasi tokugwa toyo tobobawa, kawala, “Gala avaka kala pakula matauna labani.”

⁵Mitaga ikominimanisi sainela, kawasi, “Iteya ninasi tomota la vituloki! Ivitouula ivituloki mina Galili,[238] e imakaia Yudia[239] ivigimkulovi oda valusi baisa.”

⁶Tutala Pailato ilagi makwaina, ikatupoi kaina matauna guma Galili.

⁷E tutala inikoli kidamwa matauna metoya ola kabokwaraiwaga Erodi,[240] iwitali matauna bila baisa Erodi, paila matauwena isisu Yerusalem wa tuta matutona.

⁸E tutala Erodi igisi Yesu, saina imwamwasila nanola; paila tuta kaduwonaku magila bigisi matauna, paila bogwa ilagi bulogala, e ipikwaku bigisi matauna bivagi avai vavagi siligaga.

⁹E ikikatupoi matauna tuta kaduwonaku, mitaga gala avaka bimapu.

¹⁰Tolula kasi tokugwa toyo toninitalapula paila Karaiwaga itotusi otalila, saina minimani itabinakaisi matauna.

¹¹E Erodi toyo la tokwabilia ikatudeuwaisi e ikaluwouwaisi matauna; oluvi ivisikomaisi matauna okakapula yaminabwaita, ikaimilivauwaisi matauna baisa Pailato.

¹²E metoya wa yam makwaina Erodi toyo Pailato ikalubailasi; paila omitibogwa leiuvataisi kasitaiyu.

¹³E Pailato idou tolula kasi tokugwa toyo tokwaraiwaga toyo tomota bisigugulasi,

¹⁴e iluki matausina, kawala, “Lokumiakaigusi tau matauna makawala taitala iyogagi tomota. Mapaila bogwa lakatupoi omitami, e ka! gala avaka kala pakula labani paila avaka lokutabinakaisi matauna.

¹⁵E, Erodi makawala wala, paila ikaimilivau matauna baisa yakamaisi. Ka, gala leivagi avaka bibodi kaliga matauna.

¹⁶Mapaila bawaiya e bataneku matauna.”[241]

¹⁷

¹⁸Mitaga komwaidosi idouwaisi kaigitinidesi, kawasi, “Matauna kuligaiwa. Kutaneku Baraba baisa yakamaisi.”

¹⁹Paila mimilisi tokowolova eitokaiasi ipakaisi valu kala karaiwaga; e tokwabilia eiyosisi matauna Baraba eisailisi wa bwala katupipi. E tokwatumata matauna.

²⁰E Pailato ilivala baisa matausina tuvaila, mwada bitaneku Yesu.

²¹Mitaga minimani idouwaisi, kawasi, “Matauna kukwatukorosi, kukwatukorosi!”

²²E sivitolula ikatupoi matausina, kawala, “Avaka dimlela? Avai mitugaga leivagi? Gala abani kwaitala la sula avaka bibodi kaliga, mapaila bawaiya e bataneku matauna.”

²³Mitaga saina minimani ikapinivekasi idousi sainela kidamwa bikatukorosi matauna. E kaigasi ikalisau.

²⁴Pailato ikaraiwaga ibodi bivagaisi makawala si nigada.

²⁵Itaneku matauna bogwa leisailisi wa bwala katupipi paila kowolova deli katumata, uula inigadaisi matauna; mitaga Yesu ikasali kidamwa bivagaisi makawala ninasi.

²⁶Taitala Saimoni guma Sairini[242] imaima metoya okidodina. E tutala ivakoulisi Yesu iyosisi matauna isailisi korosi ovilavala matauna, kidamwa bikeula bibokuli Yesu.

²⁷Tobobawa sainela ibokulaisi matauna, toyo vivila iuvalamsi ikavinavinasi paila matauna.

²⁸Mitaga Yesu itovila iluki minasina, kawala, “Wo! yokomi vilemi Yerusalem, taga kuvalamsi paila yeigu, mitaga kuvalamsi paila yokomi titoulemi, toyo litumia.

²⁹Paila ka! wa yam makwaisina eimaimaisi tomota bikaibigasi, kawasi, ‘Bimwasawasi minasina nakaliga, toyo minasina gala bisumasi, toyo minasina gala bivanunusi.’

³⁰Wa tuta matutowena bivitouulasi bilukwaisi koya kwevakaveka, kawasi, ‘Kukwapusisi bukutumaimasi,’ e baisa koya kwekikekita, ‘Kukubolaimasi.’

³¹Paila kidamwa bivagaisi vavagi baisa wa kai kaigeyata, avaka bivigakaisi wa kai kaimatutila?”[243]

³²Ivakoulisi taiyu tuvaila tolibulebu kidamwa bikatumataisi deli matauna.

³³E bogwa iviloubusisi mapilana baleku idokaisi Pwaneta,[244] baisa ikatukorosaisi matauna, toyo matausina tolibulebu, taitala ola kakata, taitala ola kikiwama.

³⁴E Yesu[245] ikaibiga, kawala, “Tamagu kuligaiwa si mitugaga; paila gala inikolaisi avaka iuvagaisi.” E ikowobobutasi kidamwa bivilaisi kala kwama.

³⁵Tomota itotusi igigisaisi; mitaga tokwaraiwaga ikatudeuwaisi matauna, ikaibigasi, kawasi, “Eikatumovi tomota ituwoli. Kidamwa matauna la Mesaia Yaubada, e Yaubada kala tonaga, ibodi bikatumovi titoulela.”

³⁶E tokwabilia tuvaila ikatudeuwaisi matauna, imaisi mwada bisakaisi waini pwayuyu,

³⁷ikaibigasi, kawasi, “Kidamwa yoku si giyouveka mina Yudia, kukwatumovaim titoulem.”

³⁸Tuvaila isisu kala ginigini walakaiwa odabala,[246] “Matauna si Giyouveka mina Yudia.”

³⁹E taitala matausina tolibulebu leikatukorosaisi ividali matauna, kawala, “Ki, yokula Mesaia? Kukwatumovaim titoulem toyo yakama.”

⁴⁰Mitaga taiyuwela ibuyoyu sola, ikaibiga, kawala, “Ki, gala kukukoli Yaubada? Paila kada kamwaga e matauwena kala kamwaga makawala goli.

⁴¹E yakida goli kada mipuki duwosisia; paila takakau avaka ibodi mapula da mitugaga. Mitaga matauwena gala avaka gaga leivagi.”

⁴²E ikaibiga, kawala, “Yesu, kululuwaigu kala tuta bukuyosi m Kwaraiwaga.”

⁴³E Yesu iluki matauna, kawala, “Kululuwai baisa, lagaila wala bitasisu kadataiyu mapilana Paradaisi.”[247]

⁴⁴Bogwa itowota kalasia, e valu komwaidona idudubila igau ila itobala kalasia.

⁴⁵E wa tuta matutona kalasia gala visigala. Deli Bwala Kwebumaboma kala taboda karekwa[248] itavisiki yayu.

⁴⁶Oluvi Yesu iwaiweya, e ikaibiga, kawala, “Tamagu, bilomagu asaiki oyamam.” E bogwa ilivala makawala, itugwali bilomala ikaliga.

⁴⁷Tutala kumatoula igisi avaka ikaloubusi iyakawoli Yaubada, kawala, “Mokwitala matauna tobwaila goli.”

⁴⁸E komwaidona tobobawa leisigugulasi kidamwa bigigisasi, tutala igisaisi avaka ikaloubusi, ikaimilavausi iwawaiyasi vitakosi.

⁴⁹E komwaidosi sala deli minasina vivila leibokulaisi matauna metoyasi mapilana Galili,[249] itotusi kaduwonaku igigisaisi vavagi makwaisina.

⁵⁰E isisu taitala tau yagala Yosepa metoya mpana si valu mina Yudia yagala Alimatia.[250] E togugula matauna, tobwaila deli tomitukwaibwaila.

⁵¹Gala itagwala paila togugula[251] ninasi toyo si vavagi, e iuwayausa paila Yaubada la Karaiwaga.

⁵²Tau matauna ilokaia Pailato inigadi wowola Yesu.

⁵³E ivabu minana ikapoliki omwaikapula yapupwakau yaminabwaita; e ibaku wa laka leikeli metoya odakuna, baisa gala taitala ibakubogwisi.

⁵⁴E yam makwaina Yamla Katubaiasa, e sabate[252] eivitouula.[253]

⁵⁵Vivila minasina leimaisi deli matauna metoyasi mapilana Galili, ibokulaisi e igisaisi laka deli ammakawala ibakwaisi wowola.

⁵⁶E ikaimilavausi ikatubiasaisi bulami ituwoli ituwoli maiina simasimina. Wa yam sabate ivaiwasisi makawala Karaiwaga makwaina.