Read Kilivila LUKA 24 Bible Online

LUKA 24 - Kilivila bible

LUKA 24

¹Obulubuvisiga Sunday minasina vivila ilosi wa laka, ilauwaisi bulami leikatubiasaisi.

²E ibanaisi dakuna bogwa ikanuwada metoya wa laka.

³Mitaga tutala isuvisi gala ibanaisi wowola.

⁴Saina ininayuwasi paila baisa, e ka! taiyu tauwau itotusi otalisi minasina, kasi kwama yaguyugwayu sainela.

⁵Ikokolasi, ikululusi, e migisi opwaipwaia, e tauwau ilukwaisi minasina, kawasi, “Veve! Avaka paila kunainevisi tomomova oluwalaisi tomata?

⁶Gala isisu baisa. Bogwa eitokaia imovavau. Kululuwaisi ammakawala ilukwaimi tutala isisu Galili,

⁷kawala, ‘Ibodi bikasalaigusi yeigu Latula Tomota oyumasi tomitugaga, bikatukorosaigusi, e yam kwaitolula batokaia bamovavau goli.’”

⁸E vivila iluluwaisi la biga,

⁹ikaimilavausi metoyasi wa laka, isalaisi komwaidona vavagi makwaisina baisa matausina tailuwotala taitala deli baisa sesia komwaidosi.

¹⁰Minasina ilivalasi makawala baisa aposetolo[254] igasi Meri Magidalini sola Yowana toyo Meri Yemesa inala toyo mimilisi tuvaila.

¹¹Mitaga idokaisi biga mabigasina bigimakava wala; e gala idubumaisi minasina.

¹²Mitaga[255] Pita itokaia, isakaula ila wa laka. Ikululu itadoyai olumoulela, e igisi karekwa yapupwakau yaminabwaita e gala avaka tuvaila. E isilavi ikaimilavau ola bwala, e itutu wowola paila avaka bogwa leikaloubusi.

¹³E yam makwaiwena taiyu matausina ililoulasi bilosi ovalu yagala Emeiyusa, kala maloula metoya mapilana Yerusalem katupoluwotala katupotala katupwaila keda (11 km).

¹⁴Ibibigatonasi paila komwaidona vavagi makwaisina leikaloubusisi.

¹⁵Tutala ililivalasi ititamapusi, Yesu titoulela ima otalisi ividuli matausina.

¹⁶Mitaga itaboda ninasi e gala bivitusaisi matauna.

¹⁷E iluki matausina, kawala, “Avaka kubigitonaisi tutala kuliloulasi ke?” E itomwaisi, igibugibu migisi.

¹⁸Taitala matausina yagala Kiliopasa ivitakauloki matauna, kawala, “Ki, yoku tosisula Yerusalem, e kammwaleta gala kunikoli avaka ikaloubusisi baisa yam makwaisina?”

¹⁹Ikatupoi matausina, kawala, “Avai vavagi?” Ilukwaisi matauna, kawasi, “Paila Yesu guma Nasaredi,[256] matauna tovitoubobuta topeula ola vavagi deli ola biga omatala Yaubada toyo omitasi tomota komwaidosi.

²⁰E kama tolulasi kasi tokugwa toyo kama tokwaraiwagasi ikasalaisi kidamwa bikamwagasi bikatumataisi, e ikatukorosaisi matauna.

²¹Mitaga yakamaisi kapikwakusi mwada matauna bikoli Isireli. E ka! tuvaila vavagi makwaina bogwa leikaloubusi e lagaila goli yam kwaitolula.

²²Tuvaila, mimilisi vivila metoyasi oma bodasi ilivalasi mimilisi vavagi e saina itutu wowomasi sainela. Paila bulubuvisiga ilosi wa laka,

²³mitaga gala ibanaisi wowola; e ikaimilavausi ikamitulaisi kidamwa bogwa leigisaisi anelosi ilukwaisi kidamwa bogwa leimova.

²⁴E mimilisi baisa yakamaisi ilosi wa laka, ibanaisi makawala vivila si biga, mitaga matauna gala igisaisi.”

²⁵E Yesu iluki matausina, kawala, “Wo toninagowa yokomi, saina kasai mi dubumi paila komwaidona avaka avaka tovitoubobuta leilivalaisi.

²⁶Ki, kaina ibodi wala matauna Mesaia ikugwa bilumkoli mayuyu makwaisina e bisuvi okala kalugologusa saina guyugwayu kadai?”

²⁷Ikatumiki Buki Pilabumaboma[257] baisa matausina, e ivitouula metoya baisa Mosese deli tovitoubobuta[258] komwaidosi; e ivituloki matausina avai ginigini isisu paila matauna titoulela.

²⁸E katitaikina iviloubusisi okadumalaga; e matauna mwada bisaitaula.

²⁹Mitaga ikaliyeiasi baisa matauna, kawasi, “Tasimwaisi, paila bogwa eikoyavi e yam bogwa biwokuva.” E isuvi isikaili matausina.

³⁰Osi tuta kamkwam, ikau kaula, inokagutoki baisa Yaubada, ikimimisi isaiki matausina.

³¹E matausina imitalala mitasi, ivitusaisi matauna; e omitasi itamwau.

³²E ibigatonasi, kawasi, “Igau ilukwaida wa keda, e ikatumiki Buki Pilabumaboma baisa yakida, saina iyuviyavi nanoda kadai?”

³³E tuta matutona wala itokaiasi, ikaimilavausi Yerusalem; e ibanaisi matausina tailuwotala taitala bogwa isigugulasi toyo sesia,

³⁴ikikaibigasi, kawasi, “Mokwitala Tomoya bogwa leitokaia, e leiyoulapula baisa Saimoni.”

³⁵E kasitaiyu isolasi paila avaka ikaloubusi wa keda, deli ammakawala ivitusaisi matauna tutala ikimimisi kaula.

³⁶Ililivalasi, e Yesu titoulela itowala e iluki matausina, “Bitalaguva lupomi.”

³⁷Mitaga inokubukubusi sainela, ikokolasi, e idokaisi igisaisi kosa.

³⁸E iluki matausina, kawala, “Avaka paila ikubukubu lupomi? Avaka paila kuninayuwasi?

³⁹Kugisaisi yamagu toyo kaikegu, yeigula goli asisu; kukwabikonaigusi e bukugisaisi; paila kosa gala isim vilionela deli tutuwanela, makawala kugisaisi isim baisa yeigu.”

⁴⁰Bogwa ilivala makawala, e ivituloki matausina yamala toyo kaikela.

⁴¹Mitaga gala bidubumaisi goli paila si mwasawa, deli itutu uwosi. Mapaila inigadi matausina, kawala, “Ki, sitana avaka isisu bakam?”

⁴²Isakaisi matauna bubotala yena nagubugwabu,[259]

⁴³e ikau, ikam omitasi.

⁴⁴Oluvi iluki matausina, kawala, “Vavagi makwaisina bogwa lalukwaimi tuta matutona lasikailimi. Paila bogwa lakaibiga kidamwa avaka avaka Mosese la Karaiwaga deli tovitoubobuta deli Sam[260] leiginisi paila yeigu gala bisala goli.”

⁴⁵E itapuloki ninasi kidamwa bikatetasi Buki Pilabumaboma.

⁴⁶E iluki matausina, kawala, “Buki Pilabumaboma kala ginigini isisu, kidamwa iboda matauna Mesaia bibani mmayuyu, e yam kwaitolula bitokaia bimovavau.

⁴⁷Tuvaila kidamwa bukuvigakaimi wodola Mesaia e bukukwamitulaisi mabigana paila ninavila toyo mitugaga kala ligaiwa baisa komwaidosi mina watanawa; e bukuvitouulasi Yerusalem.

⁴⁸E yokomi kala tosola vavagi makwaisina.

⁴⁹E ka! bogwa bawitali baisa yokomi avaka Tamagu eikatotila;[261] mitaga ibodi bukutulotulasi ovilouveka,[262] igau peula makwaina metoya wa labuma bibusi baisa yokomi.”

⁵⁰E ivakouli matausina ilosi otalila Bedani;[263] e yamala ikoulaila, ibigibwaili matausina.

⁵¹E tutala eibigibwaili isilavi matausina e ila walakaiwa[264] wa labuma.

⁵²E ikavaginaisi matauna,[265] e ikaimilavausi Yerusalem, e saina imwasawasi.

⁵³E yumyambwata isisuaisi wa Bwala Kwebumaboma, iyakawolaisi Yaubada.