Read Kilivila LUKA 3 Bible Online

LUKA 3 - Kilivila bible

LUKA 3

¹Tuta matutona Taibiria[34] Sisa la karaiwaga taitu kweluwotala kwailimala, Ponitio Pailato[35] ikaraiwogi Yudia, Erodi[36] guyoula Galili, e bodala Pilipi[37] guyoula Ituria toyo Tirakoniti, e Lisania guyoula Abilene;

²tuvaila, Anasa deli Kaiapa[38] tolula tovakaveka.[39] Tuta matutona la biga Yaubada imakaia Yoni latula Sekaraia oviloupakala.[40]

³E matauna ilokaia viluwela Yoridani komwaidona, e ikamituli, kawala, “Kuninavilasi e babapitaisaimi e Yaubada biligaiwa mi mitugaga.”

⁴Makawala Aisea tovitoubobuta leigini ola buki, “Taitala idoudou oviloupakala, kawala, ‘Kukwatubiasaisi la keda Guyau, kukiduwosisiaisi la keda.

⁵Sakalela komwaidona bivakasauwaisi, komwaidona koya kwevakaveka toyo kwekikekita bibusisi, doudogala keda bikiduwosisiaisi, pitupitula keda bikatudubunaisi.

⁶E tomota komwaidosi bigisaisi la katumova Yaubada.’”

⁷Mapaila tobobawa imaisi mwada matauna bibapitaisi, e iluki matausina, kawala, “Tubula mitugaga yokomi! Availa ilukwaimi bukusakaulasi metoya omi sula mapula igau Yaubada bimai?

⁸Kuvagaisi avaka bivituloki mi ninavila. Taga kukwaibigasi oninami, ‘Matauna Eberaam tabudasi’. Paila alukwaimi, gagabila Yaubada bikau dakuna makwaisina bivigaki tubula Eberaam.[41]

⁹Baisa tuta kema eikatubiasaisi mwada biteyasi kai ouula; mapaila avai kai gala biuwa kaiuwala bwaina, biteyasi bilavaisi bila wa kova.”

¹⁰E tobobawa ikatupoiyaisi matauna, kawasi, “Avaka bakavagaisi?”

¹¹Ivitakauloki matausina, kawala, “Matauna isim kala kwama yayu, ibodi bisaiki matauna gala kala kwama; e matauna isim kʹala, ibodi bipati makawala.”

¹²Tuvaila tokougugula pokala[42] imaisi mwada matauna bibapitaisi e ikatupoiyaisi matauna, kawasi, “Tovituloki, avaka bakavagaisi?”

¹³E iluki matausina, kawala, “Taga bukukwauwaisi bikalisau avaka ikaraiwogaisi paila yokomi.”

¹⁴Tokwabilia[43] tuvaila ikatupoiyaisi matauna, kawasi, “E ammakawamasi avaka bakavagaisi?” E iluki matausina, kawala, “Taga kulebwaisi metoya baisa availa, tuvaila taga kutabinakaisi availa; e taga bukutakumdusi paila kami mapu.”

¹⁵Tomota itulotulasi ivivinagaiyaisi e komwaidosi inanamsasi paila Yoni, kaina matauna Mesaia.

¹⁶Yoni ivitakauloki komwaidosi, kawala, “Yeigu abapitaisaimi metoya wa sopi; mitaga taitala eimaima ikalisauwaigu, katubukolela kaikela kala sipu[44] gala ikwanaigu bataneku; matauna bibapitaisaimi metoya baisa Baloma Tobumaboma e deli kova.

¹⁷Iyosi la kabokila[45] oyamala, kidamwa bikatukili witi kalagila deli kanuvinela; la witi bikedidagi ola bwaima — mitaga kanuvinela bigabu wa kova gala bimata.”

¹⁸Mapaila ituwoli biga ituwoli biga ikamituli Bulogala Bwaina baisa tomota.

¹⁹Mitaga ibuyoyu guyau Erodi paila Erodiasa la kwava bodala,[46] e paila komwaidona avai mitugaga avai mitugaga Erodi leivagi.

²⁰E Erodi ikalisuwoli la vavagi gaga komwaidona, paila isaili Yoni wa bwala katupipi.

²¹E ikugwa tomota komwaidosi ibapitaisasi oluvi Yesu ibapitaiso. Ininigada, e labuma ikivi,

²²e Baloma Tobumaboma imila mauna makawala bubuna, italakapusi baisa matauna; e kaigila metoya wa labuma ima, kawala, “Yoku Latugu Tombwailigu; saina kuyomwasalaigu.”

²³E tutala Yesu ivitouula la paisewa, kala taitu kaina iboda kweluwotolu, matauna tamala (idokaisi makawala) Yosepa, eisekaili tamala Ilai,

²⁴eisekaili tamala Madati, eisekaili tamala Libai, eisekaili tamala Meliki, eisekaili tamala Yanai, eisekaili tamala Yosepa,

²⁵eisekaili tamala Matadia, eisekaili tamala Emosi, eisekaili tamala Neum, eisekaili tamala Esili, eisekaili tamala Nagai,

²⁶eisekaili tamala Maadi, eisekaili tamala Matadia, eisekaili tamala Semini, eisekaili tamala Yoseki, eisekaili tamala Yoda,

²⁷eisekaili tamala Yoanani, eisekaili tamala Risa, eisekaili tamala Serubabela, eisekaili tamala Sealitieli, eisekaili tamala Neri,

²⁸eisekaili tamala Meliki, eisekaili tamala Adi, eisekaili tamala Kosam, eisekaili tamala Elimadam, eisekaili tamala Eri,

²⁹eisekaili tamala Yosuwa eisakaili tamala Eliesa, eisekaili tamala Yorim, eisekaili tamala Madati, eisekaili tamala Libai,

³⁰eisekaili tamala Simioni, eisekaili tamala Yuda, eisekaili tamala Yosepa, eisekaili tamala Yonam, eisekaili tamala Eliakim,

³¹eisekaili tamala Meleya, eisekaili tamala Mena, eisekaili tamala Matada, eisekaili tamala Nadani, eisekaili tamala Debida

³²eisekaili tamala Yese, eisekaili tamala Obedi, eisekaili tamala Bwasa, eisekaili tamala Salimoni, eisekaili tamala Nasoni,

³³eisekaili tamala Aminadaba, eisekaili tamala Adimini, eisekaili tamala Ani, eisakaili tamala Esironi, eisakaili tamala Peresi, eisekaili tamala Yuda,

³⁴eisekaili tamala Yekobe, eisekaili tamala Aisake, eisekaili tamala Eberaam, eisekaili tamala Tira, eisekaili tamala Nayo,

³⁵eisekaili tamala Serugi, eisekaili tamala Reu, eisekaili tamala Pelegi, eisekaili tamala Eba, eisekaili tamala Sela,

³⁶eisekaili tamala Kainana, eisekaili tamala Apakisadi, eisekaili tamala Sem, eisekaili tamala Nowa, eisekaili tamala Lameki,

³⁷eisekaili tamala Metusela, eisekaili tamala Inoki, eisekaili tamala Yaredi, eisekaili tamala Maalaleeli, eisekaili tamala Kainani,

³⁸eisekaili tamala Inosi, eisekaili tamala Seti, eisekaili tamala Adam, e matauna tamala Yaubada.