Read Kilivila LUKA 4 Bible Online

LUKA 4 - Kilivila bible

LUKA 4

¹E Baloma Tobumaboma isividuli Yesu, e ikaimilavau metoya Waya Yoridani. E Baloma Tobumaboma iviyelu nanola Yesu ilau matauna oviloupakala;

²e oviloupakala ikaluwovasi Diabolo[47] itamnabi matauna. E wa yam makwaisina ipusoposuma oluvi ikamolu.

³Diabolo iluki matauna, kawala, “Kidamwa yoku Yaubada Latula, kukwaraiwogi dakuna makwaina bimila kaula.”

⁴E Yesu ivitakauloki matauna, kawala, “Buki Pilabumaboma kala ginigini isisu, ‘Gala kaula wala bimovasi tomota.’”

⁵E ivaligai matauna walakaiwa, ikavitusi baisa matauna watanawa kala kabokwaraiwaga komwaidona okwaitala tuta.

⁶E Diabolo iluki matauna, kawala, “Baisa yoku karaiwaga makwaina komwaidona basakaim deli kasi katububula; paila komwaidona bogwa isakaigu, e baisa availa magigu basaiki makwaina.

⁷Mapaila kidamwa bukutemmalaigu bogwa basakaim komwaidona.”

⁸E Yesu ivitakauloki matauna, kawala, “Buki Pilabumaboma kala ginigini isisu, ‘Bukutemmali Guyau m Yaubada, e matauna kalamwaleta bukuwotitali.’”

⁹E ilau matauna Yesu ilosi Yerusalem, isaili matauna odabala Bwala Kwebumaboma, iluki matauna, kawala, “Kidamwa yoku Yaubada Latula, kukokuwa.

¹⁰Paila Buki Pilabumaboma kala ginigini isisu, ‘Bikaraiwogi la anelosi paila yoku, biyamataimsi,’

¹¹deli, ‘Oyumasi bikauwaimsi, taga biwaiya kaikem dakuna.’”

¹²E Yesu ivitakauloki matauna, kawala, “Buki Pilabumaboma ilivala, ‘Taga bukuwakoli Guyau m Yaubada.’”

¹³E Diabolo la tamnabi komwaidona bogwa ivinaku, e isilavi matauna paila igau avai tuta bibodi.

¹⁴E Yesu ikaimilavau mapilana Galili e Baloma Tobumaboma la peula eisikaili matauna, e bulogala matauna ikaligiaki valu komwaidona.

¹⁵E iuvituloki[48] osi bwala tapwaroru, komwaidosi iyakawolaisi matauna.

¹⁶E imakaia Nasaredi makwaina valu baisa ikaitubwa, e makawala la bubunela wa yam sabate isuvi wa bwala tapwaroru. Itokaia bikalawa[49] Buki Pilabumaboma;[50]

¹⁷e isakaisi matauna la buki tovitoubobuta Aisea. Buki mpana iulaim, ibani mavilela mavilana kala ginigini isisu,

¹⁸“Guyau la Baloma isikailigu, ibulamaigu kidamwa bakamituli Bulogala Bwaina baisa tonamakava. Leiwitalaigu bakamituli kasi katuyuvisa tokwatupipi deli tokwau mitasi bimitalala, matausina eibodaisi karaiwaga mwau bataneku,

¹⁹e bakamituli kala taitu Guyau mwada bikoli la tomota.”

²⁰Ikatubodi buki, ikaimali baisa tolibaku, e isili. E komwaidosi matausina wa bwala tapwaroru itobu mitasi baisa matauna.

²¹Ivitouula iluki matausina, kawala, “Lagaila goli ginigini makwaina gala bisala otaigami.”

²²E komwaidosi ikamitulaisi paila matauna deli itutu uwosi paila la biga saina bwainigaga ililivala; e ikaibigasi, kawasi, “Ki, matauna Yosepa latula?”

²³Iluki matausina, kawala, “Adoki bukulukwaigusi bigivakala makwaina, ‘Toyuvisa kukwatumovaim titoulem; avaka kalagaisi lokuvagi Kapaneum bukuvagi baisa tuvaila om valu tatoum.’”

²⁴Ikaibiga, kawala, “Kululuwaisi baisa - gala taitala tovitoubobuta ikabwailisi ola valu tatoula.

²⁵“Mitaga kulagaisi baisa, bidubadu kwabuya isisuaisi Isireli ola tuta Ilaitia, waigigi kala tuta kala kaduwonaku kwaitolu taitu nalima natana tubukona, e molusaula iviloubusi ovalu komwaidona.

²⁶Mitaga Yaubada gala iwitali Ilaitia bilokaia availa mitaga kubuyala Sarepata mapilana Saidoni wala.

²⁷E bidubadu tokwagwaiguya[51] isisuaisi Isireli Ilaisa tovitoubobuta ola tuta e gala taitala ikatumigileu mitaga Nemani wala, tolela Siria.”

²⁸Bogwa ilagaisi vavagi makwaisina, komwaidosi matausina wa bwala tapwaroru saina igibuluwasi.

²⁹E itokaiasi itupaisi matauna osisunela valu, ibiaisi matauna wa koya makwaina eibudaisi si valu odadana mwada bilavaisi matauna watanawa.

³⁰Mitaga Yesu isugigai matausina, e ila.

³¹E ibusi Kapaneum,[52] viluwela Galili. Wa yam sabate ivituloki matausina.

³²E itutu uwosi la vituloki, paila ililivala makawala isim la karaiwaga.

³³Wa bwala tapwaroru taitala tau isisu eisikaila baloma gaga e iwaiweya deli kaigala kaigaveka, kawala,

³⁴“Aa! Avaka bukuvigakaima,[53] yoku Yesu guma Nasaredi?[54] Ki, lokuma bukuyabaima? Yeigu anikolaim, yoku Yaubada la Tokabomi.”[55]

³⁵Yesu ikatilakai baloma, kawala, “Desi kukwapatu, kusilavi matauna.” E bogwa ilavi matauna oluwalaisi matausina, baloma isilavi matauna, e gala goli iyogagi matauna.

³⁶E komwaidosi saina itutu uwosi, ikatumikisi taitala baisa taitala, “Ammakawala biga mabigana? Matauna isim la karaiwaga toyo peula paila ikaraiwogi baloma gaga e isilavaisi.”

³⁷Mapaila iyoyu bulogala Yesu ikaligiaki komwaidona mapilana katitaikinela.

³⁸Yesu itokaia e isilavi bwala tapwaroru, e isaitaula isuvi ola bwala Saimoni. E Saimoni yawala ikatoula yuviyavi wowola sainela; iyokakapisisi baisa matauna paila minana.

³⁹E itotu ikululuki minana, ibuyoyu katoula makwaina e isolovi minana kala katoula; nanakwa itokaia ivakoma matausina.

⁴⁰E kalasia isaku pilatala,[56] matausina iyosisi si tokwatoula, avai katoula avai katoula, komwaidosi imiakaisi Yesu; e isaili yamala baisa taitala taitala, ikatumovi matausina.

⁴¹E baloma gaga isilavaisi bidubadu tokwatoula, iwaiweyasi, kawasi, “Yoku Yaubada Latula.” Mitaga ibuyoyu matausina, gala itagwala bilivalasi avaka, paila inikolaisi matauna Mesaia.

⁴²Bogwa eiyam, Yesu isilavi baisa ila ovilouwokuva. E tobobawa ininevaisi matauna; bogwa imakaiasi, mwada biyusaisi matauna kidamwa taga bisilavi matausina.

⁴³Mitaga Yesu iluki matausina, kawala, “Ibodaigu bakamituli Bulogala Bwaina paila Yaubada la Karaiwaga[57] baisa tuwoli valu tuvaila; baisa uula leiwitalaigu.”

⁴⁴E ikikamituli osi bwala tapwaroru mina Yudia.[58]