Read Kilivila LUKA 6 Bible Online

LUKA 6 - Kilivila bible

LUKA 6

¹Kwaitala yam sabate ivawalai obigulela witi;[74] e la toligalega igudaisi waitunela witi, oyumasi imtumtusi, ikamkwamsi.

²E mimilisi Parisi ikaibigasi, kawasi, “Avaka paila gala kuvagaisi[75] makawala Mosese la Karaiwaga? Paila matauna ikikili yam sabate.”

³E Yesu ivitakauloki, kawala, “Kaina gala lokukwalawasi avaka Debida ivagi tutala ikamolu, matauna deli kala tobwakuli?

⁴Paila isuvi ola bwala Yaubada,[76] e ikau kaula kwaibumaboma leisemakavaisi baisa Yaubada. Matauna ikoma, e tuvaila isaiki kala tobwakuli ikamsi. Mitaga gala ibodi Mosese la Karaiwaga availa bikam, paila tolula wala kʹasi.”

⁵E iluki matausina, kawala, “Yeigu Latula Tomota[77] guyoula sabate.”

⁶E sabate[78] kwaiyuwela isuvi kwaitala bwala tapwaroru e ivituloki; e isisu taitala tau yamala kakata kwayamata.

⁷E toninitalapula paila Karaiwaga toyo Parisi[79] mwada bitabinakaisi Yesu. E, iwayausaisi matauna, kaina biyomovi availa wa yam sabate.

⁸Mitaga inikoli si nanamsa e iluki matauna yamala kwayamata, kawala, “Kuma kutoli baisa.” E itokaia itoli.

⁹Yesu iluki matausina, kawala, “Kwatulaisi? Avaka ibodi Mosese la Karaiwaga paila yam sabate? Bitamitukwaiisi kaina bitayogagaisi? Bitayomovaisi kaina bitakatumataisi?”

¹⁰E igigisi matausina komwaidosi, e iluki matauna,[80] kawala, “Kuvitukoli yamam.” Ivagi makawala, e ka, kwayamomova.

¹¹Mitaga igibuluwasi sainela, ikikeiwalasi titoulesi avaka bivigakaisi Yesu.

¹²E tuta makwaina ila wa koya kidamwa binigada; e bogi makwaina komwaidona ininigada baisa Yaubada.

¹³E bogwa eiyam idou la toligalega, e metoya matausina inagi tailuwotala taiyu e idoki matausina aposetolo;[81]

¹⁴Saimoni matauna idoki yagala Pita toyo Anideru bodala, Yemesa, Yoni, Pilipi, Batolomiu,

¹⁵Madiu, Tomasi, Alipio latula Yemesa, Saimoni idokaisi Toyubayoba,[82]

¹⁶Yemesa latula Yudasa, deli Yudasa Isikariota[83] matauna igau tokwasesila.

¹⁷E ibusi deli matausina, itotu okabatau deli la toligalega saina tobobawa e deli tomota saina tobobawa metoyasi mapilasina Yudia komwaidona deli Yerusalem, deli mapilasina kulumata Taia toyo Saidoni;[84] matausina imaisi kidamwa bilagaisi matauna e bikatuyuvisi kasi katoula;

¹⁸e matausina baloma gaga isikailasi ikatuyuvisi matausina.

¹⁹E tobobawa komwaidona mwada bikabikonaisi matauna, paila peula isusunapula metoya baisa Yesu, e ikatuyuvisi matausina komwaidosi.

²⁰Imitakavati la toligalega e ikaibiga, kawala, “Kumwasawasi yokomi tonamakava, paila Yaubada la Karaiwaga baisa mi vavagi goli.

²¹Kumwasawasi yokomi kukwamolusi baisa tuta, paila bukukomatasi. Kumwasawasi yokomi tovalam baisa tuta, paila bukugigilasi.

²²“Kumwasawasi kidamwa tomota bikoulovaimi, bitavileiyaimi, e bibigigagaimi, e biligaiwaisi yagami paila idokaisi igimigigaga, paila uula yeigu Latula Tomota.

²³Wa yam makwaina kumwasawasi, e kuyuwaitaulasi paila mwasawa, paila ka! kami mapu kwaiveka wa labuma; paila tumisia ivigakaisi makawala baisa tovitoubobuta.

²⁴“Mitaga wo yokomi bidubadu mi guguwa! Paila bogwa lokukwauwaisi mi mwasawa.

²⁵Wo yokomi tokomata tuta baisa! Paila bukukwamolusi. Wo yokomi togigila tuta baisa! Paila bukukwavinavinasi deli bukuvalamsi.

²⁶“Wo yokomi kala tuta tomota komwaidosi biyakawolaimi! Paila makawala goli tumisia eiyakawolaisi tovitoubobuta kaponai.

²⁷“Mitaga alukwaimi availa iligalega, Bukuyebwailisi kami tilaula, bukumitukwaiyaisi matausina ipakaimi,

²⁸bukubigibwailisi matausina ibigigagaimi, e bukunigadasi paila matausina iyogagaimi.

²⁹Kidamwa taitala iwaim okimwam pilatala, kutovila biwaiya piliyuwela; e kidamwa taitala ikau kam kwakapula, taga kuyusi kam kwama goli.

³⁰Availa inigadaim avaka kusaiki; e matauna ikau m guguwa, taga kunigidivau makwaisina tuvaila.

³¹Mapaila bukuvagaisi paila semia avaka magimi bivagaisi paila yokomi.

³²“Paila kidamwa kuyebwailisi matausina wala availa availa iyebwailimi, avaka kala mwasawa baisa yokomi? Paila tomitugaga goli iuvagaisi makawala.

³³E kidamwa kumitukwaiyaisi matausina wala availa availa imitukwaiyaimi, avaka kala mwasawa baisa yokomi? Paila tomitugaga tuvaila iuvagaisi makawala.

³⁴Kidamwa mi nanamsa taitala bimapu kala wasi e mauula bukutagwalasi matauna wala biwasi baisa yokomi, avaka kala mwasawa baisa yokomi? Paila tomitugaga itagwalasi tomitugaga biwasisi baisa matausina, kidamwa bikauwaisi makawala tuvaila.

³⁵Mitaga bukuyebwailisi kami tilaula, bukumitakwaisi, bukutagwalasi kasi wasi e taga bukuvayelusi mapula;[85] e kami mapu bogwa bikwaiveka, e mi bubunela makawala litula Towalakaiwa sainela; paila matauna imitukwaii tommeikita, toyo tokwapidakala.

³⁶E bukunokapisaisi makawala Tamami inokapisi.

³⁷“Taga kukwamogaisi availa e Yaubada gala bikamogaimi; taga kutakilaisi availa e Yaubada gala bitakilaimi; kuligaiwaisi si mitugaga, e Yaubada biligaiwa mi mitugaga;

³⁸kusakaisi, e Yaubada bisakaimi; bikatupataimi bwaina e bisiniveka, e tuvaila bikatumkulovi bididabali, e biligabu omi laba. Paila Yaubada binagi paila yokomi makawala kunagaisi paila semia.”

³⁹Tuvaila iluki matausina bigavisaiki, kawala, “Ki, igagabila tokwau bivakadi tokwau? Bogwa bikapusisi kasitaiyu omlopu.

⁴⁰Toligalega gala bikalisau kala tovituloki; mitaga kidamwa bogwa iyosi komwaidona kala vituloki, matauna bipati kala tovituloki.

⁴¹“Avaka paila kugisi msomsa omatala bodam,[86] mitaga gala avaka baisa yoku kaibilabala isisu omatam titoulem?

⁴²Kaina ammakawala bukuluki bodam, kawam, ‘Bodagu, kutagwala bakau msomsa metoya omatam,’ mitaga yoku titoulem gala kugisi kaibilabala isisu omatam titoulem? Tokwatudewa gaga yoku, kukwaubogwi kaibilabala metoya omatam titoulem, oluviga bukugisi bimilakatila e bukukwau msomsa metoya omatala bodam.

⁴³“Paila gala kaitala kai kaiminabwaita biuwa gaga; kaina gala kaitala kai kaimigaga biuwa bwaina.

⁴⁴Mitaga bitavitusi kai kaitala kaitala metoya ouwala. Paila tomota gala ikiuyasi seuseu metoya osoweilau kaina kaiuwala waini metoya okaigunigwaini.

⁴⁵Tomitukwaibwaila imai vavagi bwaina metoya onanola kala veiguwa bwaina; e tomitugaga imai vavagi gaga metoya onanola kala veiguwa gaga; paila metoya onanola kala bawa wodola ililivala.

⁴⁶“Avaka paila kudokaigusi, ‘Tomoya, Tomoya,’ mitaga gala kuvagaisi avaka alukwaimi?

⁴⁷Availa bimakaiagu bilagi ulo biga e bivagi, bavitulokaimi availa makawala matauna;

⁴⁸matauna makawala tau ikaliai bwala; e ikeli utuwotu tumilela ivitau kokola odukutotu. E dadoya itayelu mwada biyelu bwala; mitaga gala gagabila biyega; paila uula ikaliibau.

⁴⁹Mitaga availa bilagi ulo biga mitaga gala bivagi, matauwena makawala tau ikaliai bwala opwaipwaia gala deli kala tumila; e dadoya ikatuyou bwala, e nanakwa ikapusi; e bwala bogwa igaga mokwita.”