Read Kilivila LUKA 8 Bible Online

LUKA 8 - Kilivila bible

LUKA 8

¹Igau tuta pikekita ilokaia valu vilouvakaveka deli viloukikekita ikikamituli Bulogala Bwaina paila Yaubada la Karaiwaga. E matausina tailuwotala taiyu ililoulasi deli matauna,

²deli mimilisi vivila Yesu bogwa ikatumovi metoya baloma gaga toyo katoula; minasina Meri idokaisi Magidalini,[96] metoya baisa minawena leiyabi tailima taiyu baloma gaga,

³deli Yowana Kusa la kwava la tolibaku Erodi,[97] deli Susana, deli bidabadu tuvaila. E minasina ipilasaisi matausina metoya osi guguwa.

⁴[98] E tutala saina tobobawa isigugulasi, e tomota metoyasi ovalu ituwoli ituwoli imakaiasi Yesu, ilivala metoya wa bigavisaiki.

⁵Kawala, “Taitala tovaula eila mwada bivali waituna. E ivagi makawala, iviluvaula wala, mimilisi ikapusisi wa keda, e tomota ivatutaisi okaikesi deli mauna nayoyowa ikomasi.

⁶Mimilisi ikapusisi odakuna; e igau isusinasi, ivakamati itamwau, paila gala pwatutu pwaipwaia.

⁷Mimilisi ikapusisi okaigunigwaini; e kaigunigwaini isusinasi deli e ikimataisi makaisina.

⁸Mimilisi waituna ikapusisi okabimoya e isusinasi, iuwasi, uwasi kwelakatutala.” Tutala ilivala vavagi makwaisina, e idou kaigaveka, kawala, “Availa ilagi ibodi biligimlili.”

⁹Tutala la toligalega ikatupoiyaisi matauna avaka uula bigavisaiki makwaina,

¹⁰ikaibiga, kawala, “Bogwa asakaimi kidamwa bukunikolaisi Yaubada la Karaiwaga kala gugunuba; mitaga tuwoli tomota bilagaisi makwaisina metoya wa bigavisaiki, kidamwa bigigisasi mitaga gala bigisimlilaisi, biligalegasi mitaga gala bikatetasi.

¹¹“Bigavisaiki makwaina baisa makawala. Waituna makwaina baisa la biga Yaubada.

¹²Makwaisina wa keda makawala matausina bogwa ilagaisi; e oluvi Diabolo ima ikau mabigana metoya oninasi, kidamwa gala bidubumaisi e bimovasi.

¹³Makwaisina odakuna makawala matausina ilagaisi biga e iyosisi deli si mwasawa; mitaga gala kaiviliwalisi, idubumaisi tuta pikekita e kala tuta ibodaisi tamnabi ikapusisi.

¹⁴Makwaisina ikapusisi okaigunigwaini makawala matausina ilagaisi biga, mitaga igau ililoulasi e watanawa kala kaisisu, toyo kala guguwa, toyo kala kaimwana iyogagaisi matausina e uwasi iwodebalisi.

¹⁵Mitaga makwaisina okabimoya makawala matausina ilagaisi biga, e iyosikikitaisi oninasi duwosisia deli oninabwaila, e deli si peuloki iuwasi.

¹⁶“Gala taitala ivakanoti kaitapa[99] e ikatubukoli wa peta kaina osikowala kebila, mitaga isaili ola kabototu, kidamwa matausina isuvisi bigisaisi lumalama.

¹⁷“Avaka bitakatubukoli igau biyoumatila, avaka bitakiwoli igau bisunapula omilakatila e binikolaisi.

¹⁸“Mapaila kuyamataisi ammakawala kulegasi; paila baisa availa iyosi avaka Yaubada bikatumkulovi; mitaga baisa availa gala iyosi avaka Yaubada bikaimili metoya baisa matauna avaka idoki iyosi.”

¹⁹Tuta matutona imakaiasi Yesu inala deli budala; e gala gagabila bibodasi matauna paila tobobawa.

²⁰Ilukwaisi matauna, kawasi, “Inam deli budamwa itotusi okoukweda, magisi yoku.”

²¹Mitaga iluki matausina, kawala, “Inagu deli budagwa, baisa matausina ilagaisi e ivagaisi la biga Yaubada.”

²²Wa yam kwaitala Yesu isila wa waga deli la toligalega, e iluki matausina, kawala, “Bitadoupelasi mapilana valu ewaiwa.”[100] E ikewasi.

²³Ikokewasi, e Yesu immasisi. E utuyagila itokaia obolita, e kaisai ilupulupula wa waga, bogwa bisilagisi.

²⁴E imakaiasi matauna ivigulaisi, kawasi, “Guyau, Guyau, bitadoumsiga.” E imamata, ibuyoyu yagila toyo kaisai kwevakaveka; e iluvitaitaia, e iniwavila.

²⁵Iluki matausina, kawala, “Ambaisa mi dubumi?” Mitaga ikokolasi, itutu uwosi e ikaibigasi taitala baisa taitala, kawasi, “Avai tau matauna, paila ikaraiwogi yagila toyo bolita goli, e ikabikuwolaisi matauna?”

²⁶Leisilavaisi Galili e ikotasi mapilana ewaiwa, osi valu mina Gerasa.[101]

²⁷Bogwa itobusi olumata, taitala tau iboda Yesu metoya ovalu, baloma gaga isikaila matauna. Tuta kaduwonaku ikikimwadu, e gala bisikaili bwala, mitaga mesisiki wa lagi oluwalaisi kasi laka tomata[102] wala.

²⁸Bogwa leigisi Yesu, iwaiweya ikavagina omatala, kaigaveka ikaibiga, kawala, “Avaka bukuvigakaigu,[103] Yesu Latula Yaubada Saina Towalakaiwa? Anigadaim, taga kumipukwaigu.”

²⁹Paila Yesu bogwa leiluki baloma gaga bisilavi matauna. Paila tuta bidubadu baloma gaga leiyosikikiti matauna. Ilagoli tomota ikatupipaisi, iyuwolaisi matauna deli tanumnumta deli katupipi; mitaga ikotuni tanumnumta e baloma gaga ivakouli oviloupakala.

³⁰Yesu ikatupoi matauna, kawala, “Ami yagam?” Ikaibiga, kawala, “Yagagu Tobobawa Sainela”, paila bidubadu baloma gaga bogwa leisikailasi matauna.

³¹E baloma gaga iyokakapisisi baisa matauna mwada taga bikaraiwogi bisilavaisi baisa bilokaiasi Edesi.[104]

³²E otapwala koya saina yuwoveka bunukwa ikikabubunasi; baloma gaga iyokakapisisi baisa Yesu kidamwa bitagwala bisikailasi minasina. E itagwala.

³³E baloma gaga isilavaisi matauna, isikailasi bunukwa minasina; e mayuwona isakaulasi otagegala koya ikayabusisi obolita, idoumsi.

³⁴Toyamata bunukwa igisaisi avaka ikaloubusi, e isakaulasi, isolasi ambaisa ambaisa ovalu[105] deli wa bagula.

³⁵Tomota imaisi mwada bigisaisi avaka bogwa leikaloubusi; imakaiasi Yesu, e ibanaisi tonagowa; isili omatala Yesu, bogwa isikam kala kwama, nanola italapula. E ikokolasi.

³⁶Matausina leigisaisi vavagi baisa ilivalasi ammakawala Yesu ikatumovi matauna eisikaila baloma gaga.

³⁷Oluvi komwaidosi tolesi mapilana Gerasa iyokakapisisi baisa matauna kidamwa bisilavi matausina, paila kasi kokola sainela. E isila wa waga mwada bikaimilavau.

³⁸Matauna tau eisikailasi baloma gaga iyokakapisi mwada biwokaia matausina. Mitaga Yesu iwitali matauna bila, e iluki, kawala,

³⁹“Kukwaimilavau baisa veyamwa, kukwamituli avaka Yaubada leivigakaim.” E tau matauna ila ikikamituli ovalu makwaina ammakawala Yesu ipilasi matauna.

⁴⁰Tutala Yesu ikaimilavau,[106] tobobawa ikamiabaisi matauna, paila komwaidosi itutulaisi matauna.

⁴¹E taitala tau yagala Dairusi ima, matauna tokwaraiwaga bwala tapwaroru. Ikavagina omatala Yesu iyokakapisi baisa matauna bimakaia ola bwala,

⁴²paila latula vivila gudikesa, kala taitu kweluwotala kwaiyu, e makateki bikaliga. Mitaga igau ililoula tomota ileitupaisi matauna.

⁴³E natana vivila isisu, kala katoula buyavila ititalagila,[107] katoula makwaina igweimili iboda kweluwotala kwaiyu taitu, mitaga gala gagabila taitala biyomovi minana.

⁴⁴Minana ilokaia otapwala Yesu, ikabikoni kaipagala[108] kala kwama; e nanakwa buyavila imada.

⁴⁵E Yesu ikatupoi, kawala, “Availa ikabikonaigu?” Bogwa iyakalasi komwaidosi, e Pita[109] ikaibiga, kawala, “Guyau, tobobawa ipoulaimsi ileitupaimsi.”[110]

⁴⁶Mitaga Yesu ikaibiga, kawala, “Taitala bogwa ikabikonaigu; paila alumkoli ulo peula leisilavaigu.”

⁴⁷Tutala vivila minana inikoli kidamwa avaka leivagi ikanumamatila, ima deli itatuva wowola ikavagina omatala Yesu, ikamituli omitasi tomota komwaidosi avaka uula ikabikoni matauna, deli ammakawala nanakwa ibwaina.

⁴⁸Iluki minana, kawala, “Ve! M dubumi bogwa iyomovaim; kula bitalaguva lopom.”

⁴⁹Tutala ililivala, taitala ima metoya ola bwala matauna bwala tapwaroru kala tokwaraiwaga, ikaibiga, kawala, “Latum bogwa leikaliga; taga kuyogugwesi Tovituloki.”

⁵⁰Mitaga tutala Yesu ilagi baisa, iluki matauna, kawala, “Taga kukokola; kudubumi wala, e bogwa bibwaina minana.”

⁵¹Imaisi wa bwala, gala itagwala taitala bisuvi, mesinaku wala Pita, Yoni, Yemesa, tuvaila inagwadi tamala inala.

⁵²E komwaidosi iuvalamsi ikikavinavinasi paila minana; mitaga ikaibiga, kawala, “Taga kuvalamsi; gala ikaligimolila, mitaga immasisi.”

⁵³Igigilaisi matauna, paila inikolaisi bogwa ikaliga.

⁵⁴Mitaga iyosi yamala minana, ikaibiga, kawala, “Inagwadi, kutokaia.”

⁵⁵Imovavau, e nanakwa itokaia. Iluki, kawala, “Kusakaisi sitana minana bikam.”

⁵⁶E veyala saina itutu uwosi sainela. Mitaga iluki matausina taga sitana bilukwaisi availa paila avaka bogwa ikaloubusi.