Read Kilivila LUKA 9 Bible Online

LUKA 9 - Kilivila bible

LUKA 9

¹Idou tailuwotala taiyu bisigugulasi, isaiki matausina peula toyo karaiwaga biyabaisi komwaidona baloma gaga e bikatuyuvisaisi lelia,

²e iwitali matausina bikamitulaisi Yaubada la Karaiwaga e bikatumovasi.

³Iluki matausina, kawala, “Taga sitana avaka bukukwauwaisi paila mi kwaidadina, gala kaitukwa, gala kauya, gala kami kalaga, gala mani; e taga bukukwauwaisi kwama yayu.

⁴Avai bwala bivaulaimi, baisa bukusisuaisi, igau bukusilavaisi mapilana valu.

⁵E avai valu gala bikamiabaimi, tutala bukusilavaisi valu makwaina, kukwatusisapaisi pwaipwaia[111] okaikemi; baisa kabutuvatusi omitasi tomota.”

⁶E toligalega ilosi ilokaiasi valu makwaisina, ikamitulaisi Bulogala Bwaina, ikatumovasi ambaisa ambaisa.

⁷Tutala Erodi[112] tokwaraiwaga ilagi komwaidona vavagi makwaisina ivagaisi, ininayuwa sainela, paila mimilisi ikaibigasi Yoni bogwa itokaia imovavau,

⁸mimilisi kawasi Ilaitia bogwa iyoulapula,[113] e mimilisi kawasi taitala metoya osi boda tovitoubobuta tobubogwa itokaia imovavau.

⁹Erodi ikaibiga, kawala, “Bogwa lakapituni kaiyola Yoni, mitaga avai tau matauwena bogwa lalagi iuvagi vavagi makwaisina?” E magila bigisi Yesu.

¹⁰E aposetolo ikaimilavausi ilukwaisi Yesu avaka leivagaisi. Ilau matausina ilokaiasi ovalu yagala Betisaida.

¹¹Tutala tobobawa ilagaisi ibokulaisi matauna; e ikamiabi matausina ilivala baisa matausina paila Yaubada la Karaiwaga, e availa magisi bibwainasi ikatumovi matausina.

¹²Igau bogwa bibogi, matausina tailuwotala taiyu imaisi ilukwaisi matauna, kawasi, “Kuwitali tobobawa bilosi ovalu katitaikina deli okidodina, binevisi kʹasi e bimasisisi; paila baisa tasisuaisi ovilouwokuva.”

¹³Mitaga Yesu iluki matausina, kawala, “Yokomi kusakaisi matausina sitana avaka bikamsi.” E ikaibigasi, kawasi, “Kayosisi kwailima beredi wala[114] toyo nayu yena; kaina bakalosi bakagimwalasi kaula paila matausina komwaidosi, ke?”

¹⁴Paila kasi bawa kaina tailakatuluwolima tauwau. Yesu iluki la toligalega, kawala, “Kulukwaisi matausina bikatuvaisi boda, yuwotala yuwotala kala bawa kaina biboda tailuwolima, e bisigugulasi makawala poulotala poulotala.”

¹⁵E ivagaisi makawala, ilukwaisi komwaidosi bisilaisi.

¹⁶E Yesu ikau kwailima beredi makwaisina toyo yena minasina, ikounakaila gawata inokagutoki baisa Yaubada, ikimimisi, isaiki toligalega bipataisi baisa tobobawa.

¹⁷E komwaidosi ikamsi ikomatasi. Ikatuyoulisi kasi kobwaga peta luwotala yuwa.

¹⁸E tutala isisu kalamwaleta ininigada, la toligalega imakaiasi matauna; e ikatupoi matausina kawala, “Tomota ililivalasi mwada availa yeigu?”

¹⁹Ivitakaulasi, kawasi, “Mimilisi idokaisi mwada yoku Yoni Tobapitaisi, e mimilisi idokaisi Ilaitia,[115] e mimilisiga taitala metoya osi boda tovitoubobuta omitibogwa leitokaia imovavau goli.”

²⁰E ikatupoi matausina, kawala, “Mitaga yokomi kudokaisi availa yeigu?” Pita ivitakaula, kawala, “Yokula la Mesaia Yaubada.”

²¹Iluluki matausina la karaiwaga kasai, kawala, “Taga bukukwamitulaisi vavagi makwaisina baisa availa.”

²²Tuvaila ikaibiga, kawala, “Bibodi yeigu Latula Tomota babani agu mmayuyu bidubadu, kaidadala valu deli tolula kasi tokugwa deli toninitalapula paila Karaiwaga[116] bikoulovaigusi, bikatumataigusi; e yam kwaitolula batokaia bamovavau goli.”

²³E iluki matausina komwaidosi, kawala, “Kidamwa availa magila bibokulaigu, ibodi bikatilavi tatoula, bikeula kala korosi yumyambwata, e bibokulaigu.

²⁴Paila availa magila biyusi tatoula, matauna bitamwau; e availa bikitumou tatoula paila yeigu, matauna bimova goli.

²⁵Avaka kala bwaina baisa taitala kidamwa iyosi guguwala valu valu komwaidona, mitaga matauna bitamwau kaina bisilagi? Gala avaka kala bwaina.

²⁶Paila availa immosila paila yeigu deli paila ulo biga, makawala goli yeigu Latula Tomota bammosila paila matauna tutala bama ogu guyugwayu agumwaleta deli la guyugwayu Tamagu toyo matausina anelosi bumaboma.

²⁷Mitaga kululuwaisi baisa, mimilisi kutotusi baisa, gala bukukwaligasi mitaga ikugwa bukugisibogwaisi Yaubada la Karaiwaga.”

²⁸Leilivala vavagi makwaisina iwokuva, igau kaina kwailima kwaitolu yam, Yesu ivakouli Pita, Yoni, Yemesa, imwenasi wa koya kidamwa binigada.

²⁹Tutala ininigada, idavila migila, kala kwama ivapupwakau saina guyugwayu.

³⁰E ka! taiyu tauwau ibigatonasi deli matauna, matausina Mosese sola Ilaitia,

³¹matausina iyoumatilasi deli lumalama saina guyugwayu, ililivalasi deli Yesu ammakawala bisilavi watanawa, e bogwa bivigimkulovi makwaina mapilana Yerusalem.

³²Mitaga Pita toyo sala imitununupulasi mwada bimasisisi, mitaga imitalalasi e igisaisi la lumalama deli guyugwayu sainela, toyo matausina kasitaiyu deli matauna.

³³E tutala matausina isisilavaisi, Pita iluki Yesu, kawala, “Guyau, saina bwaina yakamaisi kasisuaisi baisa; ibodi bakakaliaiisi kwaitolu buliyoyova, kwaitala paila yoku, kwaitala paila Mosese, kwaitala paila Ilaitia.” Paila gala inikoli avaka ilivala.

³⁴Ililivala, e lowalowa ima ikuboli matausina; e tutala ikuboli matausina ikokolasi.

³⁵E kaigila metoya olowalowa leima, kawala, “Baisa Latugu matauna bogwa lanagi. Kulagaisi matauna!”

³⁶E tutala kaigila iwokuva, ibanaisi Yesu kalamwaleta. E yam makwaisina ikapatusi, gala avaka ilivalasi baisa availa paila avaka bogwa igisaisi.

³⁷Wa yam oluvi, bogwa ibusisi metoyasi wa koya, saina tobobawa ibodaisi matauna.

³⁸E ka! taitala metoya tobobawa idou, ikaibiga, kawala, “Tovituloki, ayokakapisi baisa yoku bukugisi latugu tau, paila matauna latugu gudikesa;

³⁹e ka, baloma gaga iyosi matauna, e nanakwa iwaiweya; e iloulewa matauna igau polu owodola ipuluseula; iyogagi matauna e gala magila bisilavi matauna.

⁴⁰Ayokakapisi baisa m toligalega biyabaisi baloma gaga, mitaga gala ipeulasi.”

⁴¹E Yesu ivitakauloki, kawala, “Ki, yokomi gala kudubumaigusi? Mina sula yokomi; ammakawala woloula basikailimi deli bapeuloki baisa yokomi? Kumiakaigu latum.”

⁴²Tutala gwadi ima baloma gaga ilavi magudina, e magudina iloulewa saina gaga. Mitaga Yesu ibuyoyu baloma gaga, ikatumovi gwadi e isaiki tamala.

⁴³E komwaidosi itutu uwosi paila Yaubada la peula siligaga. Mitaga tutala komwaidosi itutu uwosi paila avaka Yesu ivagi, iluki la toligalega, kawala,

⁴⁴“Ibodi bukulagaisi mokwita biga mabigasina. Paila bikasalaigusi yeigu Latula Tomota oyumasi tomota.”

⁴⁵Mitaga gala ikatetasi biga mabigasina, paila Yaubada ikatupwani kidamwa taga bikatetasi. E imwau udosi bikatupoiyaisi paila biga mabigasina.

⁴⁶Ikominimanisi titoulesi availa idoki isiligaga.

⁴⁷Mitaga tutala Yesu inikoli si nanamsa ivakouli taitala monagwadi imai otalila matauna,

⁴⁸e iluki matausina, kawala, “Availa metoya agu tobwakuli bikamiabi gwadi magudiwena bikamiabaigu, e availa bikamiabaigu bikamiabi matauwena iwitalaigu; paila availa kami tokekita oluwalaimi, matauwena itomgwaga.”

⁴⁹Yoni ikaibiga, kawala, “Guyau; kagisaisi taitala ikavitagi yagam kidamwa biyabi baloma gaga; e kasilibodaisi matauna, paila gala oda bodasi.”

⁵⁰Mitaga Yesu iluki matauna, kawala, “Taga kusilibodaisi matauna; paila availa gala ipakaimi, ipilasaimi.”

⁵¹E yam makwaisina makateki Yesu bila walakaiwa, isavali nanola magila bila Yerusalem. Iwitali la tokaikivi bikugwasi,

⁵²e ilosi isuvisi kwaitala si valu mina Sameria,[117] mwada bikatubaiasasi paila matauna.

⁵³E tomota ipakaisi matauna, paila kala gigisa makawala bila Yerusalem.

⁵⁴Tutala la toligalega Yemesa sola Yoni igisaisi, ikaibigasi, kawasi, “Tomoya, ki! magim bitakaraiwagasi kova bibusi metoya wa labuma,[118] bigabu matausina?”

⁵⁵Mitaga itovila ibuyoyu matausina.[119]

⁵⁶E ilokaiasi ituwoli valu.

⁵⁷Igau ililoulasi, taitala tau iluki matauna, kawala, “Babokulaim; ambaisa ambaisa bukula, e yeigu deli.”

⁵⁸E Yesu iluki matauna, kawala, “Mauna olawodila isim kasi nobwala, deli mauna nayoyowa isim kasi nigwa, mitaga yeigu Latula Tomota gala isim kabagu.”

⁵⁹Iluki taiyuwela, kawala, “Kubokulaigu.” Mitaga ikaibiga, kawala, “Tomoya, kutagwala ikugwa bala babaku tamagu.”[120]

⁶⁰Mitaga iluki matauna, kawala, “Kuligaiwa tomata, e bibakwaisi kasi tomata titoulesi; mitaga yoku bukula kukwamituli Yaubada la Karaiwaga.”

⁶¹E taitolula ikaibiga, kawala, “Tomoya babokulaim; mitaga ikugwa kutagwala bala atali veyagwa.”

⁶²Mitaga Yesu iluki matauna, kawala, “Kidamwa availa ikau daima ivitouula ikeli mitaga ininayuwa e matauna gala bibodi Yaubada la Karaiwaga.”