Read Kilivila KARAIWAGA KWAIYUWELA 27 Bible Online

KARAIWAGA KWAIYUWELA 27 - Kilivila bible

KARAIWAGA KWAIYUWELA 27

¹E Mosese deli tokugwala Isireli ilivala baisa tomota kawala, “Kwabikuwolaisi komwaidona katuwola lasisakaimi lagaila.

²Yam makwaina bukuluvipeilisi Waya Yoridani e bukusuvisi pwaipwaia makwaina Guyau mi Yaubada bisakaimi, kuvitomiliwolaisi mimilisi dakuna e kuyokububwaisi makwaisina,

³kuginaisi opapala makwaisina karaiwaga deli vituloki komwaidona. Avai tuta bogwa bukusuvisi pwaipwaia makwaina kubilumalala Guyau matauna tubumia si Yaubada ikatotila bisakaimi,

⁴e yokomi bogwa kutotusi mapilana ewaiwa Yoridani, bukuvitomiliwolaisi dakuna makwaisina wa Koya Ebali, makawala lakatululutaimi yam lagaila e kuyokububwaisi makwaisina.

⁵Kwaliaiisi kwaitala kabogwabu lula metoya makwaisina dakuna gala bukuyoudulaisi makwaina metoya avai kaiyoudila tanumnumta aiyani,

⁶paila avai kabogwabu lula kukwaliaisi paila Guyau mi Yaubada ibodi makwaisina dakuna gala kwetatai. E oluvi bukugabusi lula baisa Guyau,

⁷e baisa goli bukululasi deli bukukwamsi kalubaila lulela deli mi nokagutoki omatala Guyau mi Yaubada.

⁸E kuginaisi komwaidona Guyau la karaiwaga opapala dakuna makwaisina lokuyokububwaisi.”

⁹E Mosese itotu deli tolula mina Libai e iluki komwaidona mina Isireli, kawala. “Yokomi mina Isireli, kulegasi. Yam lagaila yokomi bukuvigakaimi Yaubada la tomota.

¹⁰Mapaila kwabikuwolaisi matauna deli kuyamatasi komwaidona la karaiwaga lasisakaimi lagaila.”

¹¹E oluvi Mosese iluki mina Isireli kawala,

¹²“Avai tuta bogwa bukuluvapelasi Waya Yoridani e dala madilasina bitotusi wa Koya Gerisim, paila kasi bigabwaila bilagaisi. Madilasina Simioni, Libai, Yuda, Isaka, Yosepa deli Beniamina.

¹³E dala madilasina bitotusi wa Koya Ebali paila bilagaisi bigala bolata. Madilasina Rubeni, Gada, Asera, Sebuloni, Dani deli Napitalai.

¹⁴E mina Libai kaigasi kaigaveka bilivalasi kawasi:

¹⁵“ ‘Yaubada bibuloti availa biyouduli tokolu metoya dakuna, kai kaina tanumnumta, deli ikium itemmali minana. Guyau idoki baisa kwekukolola.’ “E komwaidona tomota bimapwaisi kawasi, ‘Emeni!’

¹⁶“ ‘Yaubada bibuloti availa bikaluwou tamala kaina inala.’ “E komwaidona tomota bimapwaisi kawasi, ‘Emeni!’

¹⁷“ ‘Yaubada bibuloti availa bisebibili la tula sola.’ “E komwaidona tomota bimapwaisi kawasi, ‘Emeni!’

¹⁸“ ‘Yaubada bibuloti availa bikugwai tokwau wa keda gaga.’ “E komwaidona tomota bimapwaisi kawasi, ‘Emeni!’

¹⁹“ ‘Yaubada bibuloti availa bikaluwoli togilagala, weilova, kwabuya e gala biyosisi si vavagi tatousi.’ “E komwaidona tomota bimapwaisi kawasi. ‘Emeni!’

²⁰“ ‘Yaubada bibuloti availa biyommsili tamala metoya bimisii natana tamala la kukova.’ “E komwaidona tomota bimapwaisi kawasi. ‘Emeni!’

²¹“ ‘Yaubada bibuloti availa bimokaia mauna.’ “E tomota komwaidona bimapwaisi kawasi. ‘Emeni!’

²²“ ‘Yaubada bibuloti availa bimisii luleta kaina availa odalela.’ “E tomota komwaidona bimapwaisi kawasi, ‘Emeni!’

²³“ ‘Yaubada bibuloti avai tau bimisii yawala.’ “E tomota komwaidona bimapwaisi kawasi, ‘Emeni!’

²⁴“ ‘Yaubada bibuloti availa bikium bikatumati sola.’ “E tomota komwaidona bimapwaisi kawasi, ‘Emeni!’

²⁵“ ‘Yaubada bibuloti availa biwabu mani paila bikatumati tomota tobwaila.’ “E tomota komwaidona bimapwaisi kawasi, ‘Emeni!’

²⁶“ ‘Yaubada bibuloti availa gala bikabikaula komwaidona Guyau la karaiwaga deli la vituloki.’ “E tomota komwaidona bimapwaisi kawasi, ‘Emeni!’