Read Kilivila KARAIWAGA KWAIYUWELA 33 Bible Online

KARAIWAGA KWAIYUWELA 33 - Kilivila bible

KARAIWAGA KWAIYUWELA 33

¹E ka, mabigasina biga Mosese matauna Yaubada la touwata eibigibwaili mina Isireli oluviga bikaliga.

²Guyau leima metoya wa Koya Sinai. Eiyuwoula makawala kalasia odabala Edom, e ititapi la tomota metoya Koya Parana. 10,000 anelosi deli wala matauna, e kaitala kailululu kova oyamala kakata.

³Guyau iyebwaili la tomota, e ikoli matausina availa availa la tomota tatoula. Mapaila takululusi okaikela, e takabikuwolaisi la karaiwaga.

⁴Takabikuwolaisi Karaiwaga makwaina Mosese eisakaidasi, makwaina tadokaisi da tomotasi veigutabusi.

⁵Guyau ivitouula biguyoi la tomota mina Isireli tuta matutona dalesi deli kasi tokugwa isigugulasi gulitinidesi.

⁶Mosese ilivala paila Rubeni dalela, kawala, “Taga biwokuvasi Rubeni dalela, ilagoli si tomota gala ibawasi.”

⁷Paila Yuda dalela ikaibiga, kawala, “Mwa, Guyau! Kunakaigali si dou paila pilasi. Kuvisosu madilana deli dala ituwoli ituwoli. E Guyau, kuyowai paila matausina, deli kupilasi matausina metoya kasi tilaula.”

⁸Paila Libai dalela ikaibiga, kawala, “Yoku Guyau kukimitali mi karaiwaga metoya makwaisina vavagi paila vitoubobuta, Urim deli Tummim,[20] oluwalaisi baisa m touwata mina Libai. Okuwakolaisi matausina mapilana Masai e lokusimokwita paila matausina wa sopi mapilana Meriba.

⁹Ikimitalaisi si kamaiaba baisa yoku ikalisuwoli si kamaiaba baisa veisia, tuwasia deli litusia. Ikabikuwolaisi m kwaraiwaga, deli ivagaisi makawala m kwabutu.

¹⁰Bivitulokaisi litumwa bikabikuwolaisi m kwaraiwaga. Bigabwaisi si lula om kwabogwabu lula.

¹¹Mwa, Guyau! Kupilasi dalesi kidamwa bipeulasi, e biyomwasali nanom paila avaka avaka eiuvagaisi. Kukwatumtuwoli kasi tilaula komwaidona e gala bukutagwala bimtuvauwaisi kabilia.”

¹²Matauna ilivala paila dalela Beniamina, kawala, “Guyau dilimbwailila dala madilana deli ikoli matausina. Tuta komwaidona biyausi matausina e matauna imili valu baisa oluwalaisi matausina.”[21]

¹³Matauna ilivala paila dalela Yosepa, kawala, “Ibodi Guyau bimitukwaii si kwabila metoya wa kuna, deli sopi metitoya osikowala pwaipwaia.

¹⁴Ibodi bimitukwaii si kwabila, kidamwa kalasia bivigaki kawailuwa bimatuwasi, kidamwa biluvabwailasi metoya okasi kawailuwa bwaina, avai kawailuwa avai kawailuwa okala kweluva.

¹⁵Ibodi komwaidona si koya kwebubogwa bikaligiaki deli kawailuwa kwetitoyapila.

¹⁶Ibodi si kwabila bikasewoki komwaidona vavagi bwaina. Matauna eililivala metoya wa kai kailululu,[22] matauwena Guyau, ibodi bimitukwai bisaiki la vavagi bwaina. Ibodi mitakwai makwaina bimakaia baisa Yosepa dalela, paila matauna bogwa leitokwaraiwaga baisa odubasi tuwala.

¹⁷Yosepa la peula makawala bulumakau namwala la peula, e kala doga makawala bulumakau nabolodila kala doga. Matauwena kala doga, baisa matausina dalela Manasa la tokwabilia lakatuluwovila, deli Epereim la tokwabilia saina bidubadu lakatuluwovila. E Yosepa deli matausina ivigaki mwada kala doga ibubasaisi boda ituwoli ituwoli, e ivabilaisi matausina bilauwais ʹo mapilana obusibusila valu.”

¹⁸E matauna ilivala paila matausina dalela Sebuloni deli dalela Isaka, kawala, “Ibodi matausina dalela Sebuloni biyubwailasi si gigimwala, paila bikokewasi baisa obolita. Matausina dalela Isaka bibanaisi si veiguwa kala katumkovila metoya osi valu wala.

¹⁹Matausina bidouwaisi mina mitawasi bimwenasi osi valu wa koya, e metoya baisa bilulasi si lula mokwita. Matausina bibanaisi si veiguwa metoya obolita, deli okanakenuva metoya okawolawa.”

²⁰E ilivala paila dalela Gada, kawala, “Kuyakawolaisi Yaubada matauna isakaimi mi pwaipwaia saina kubilivakaigaga. Gada itulotula makawala laiyoni paila bitalakai yamila kaina pwaneta.

²¹E bogwa ikauwaisi bilukumitabwaila paila titoulesi, e ipitapatasi kasi vilavila avaka bibudoki todidabala wala. E ikabikuwolaisi Guyau la katuloluta deli la karaiwaga, tuta matutowena matausina mina Isireli kasi tokugwa isigugulasi gulitinidesi.”

²²E ilivala paila dalela Dani, kawala, “Dani matauna natubovau laiyoni bileusa metoya mapilana Basani.”

²³E ilivala paila dalela Napitalai, kawala, “Napitalai, Guyau titoulela wala ikabwailim metoya ola yebwaili. E si pwaipwaia ivitouula obolitala Galili iuvalutu wala il ʹo mapilana opilibolimila.”

²⁴E ilivala paila dalela Asera, kawala, “Asera, yoku kam kwabwaila ikalisuwoli dala komwaidona kasi kabwaila, e ibodi tuwamwa bivigakaimsi tombwailisi wala yoku. E ibodi mi kwabila pwaipwaiala bivigaki kala pwaipwaia kai olibe.

²⁵E viluwemi kalapisilela bukutabudokaisi tanumnumta aiyani paila bikolaimi wala. E mi kaisisu tuta komwaidona bukusisuaisi luvala uwomi.”

²⁶Mina Isireli, ka -- gala taitala yaubada makawala mi Yaubada. Matauna ikaikokewa deli kala katububula guyugwayula eititavina walakaiwa, e ikaikokewa oluwalela lowalowa bima paila kami pilasi.

²⁷Yaubada tuta komwaidona kami tokwala, e yamala kweyakanigaga bisilipapaimi tuta komwaidona. Matauna leibokavili kami tilaula tuta matutona okusuvaisi kulumi, e deli ilukwaimi yokomi bukukwatumtuwolaisi komwaidosi matausina.

²⁸E mapaila Yekobe tubula isisuaisi deli vakota, e luvala wala uwosi isisuaisi wa kwabila makubilana ikasewoki witi deli waini, ambaisa numla metoya walakaiwa ivinumli pwaipwaia.

²⁹E ka, mina Isireli, isa bwainigaga mi mwasawa kadai! Gala avai boda makawala yokomi. Gala avai boda Guyau eikoli makawala eikolaimi. Guyau kalamwaleta mi vayoula deli mi puluta, paila bitabodaimi deli bivigakaimi bukutomgwagasi. Kami tilaula bimaisi bikayubabaisi baisa yoku, mwada bukunokapisaisi matausina. Mitaga yokomi bukuvakikilaisi matausina.