Read Kilivila YONI 1 Bible Online

YONI 1 - Kilivila bible

YONI 1

¹Watanawa kala vitouula, Biga[1] eisibogwa; e Biga isibogwa sola Yaubada, e Biga baisa Yaubada.

²Biga isisu watanawa kala vitouula sola Yaubada.

³Yaubada ibubuli vavagi komwaidona metoya baisa Biga, e kidamwa Biga matauna gala bisisu gala kwaitala vavagi bikaloubusi.

⁴Momova isisu olumoulela matauna Biga,[2] e momova makwaina ivisigili baisa tomota.

⁵E lumalama ititapi odudubila,[3] e dudubila gala leikimati.

⁶Yaubada iwitali la touwata, matauna yagala Yoni.

⁷Tokamatula matauna, ima bikamituli paila lumalama, kidamwa tomota komwaidosi bilagaisi e bidubumaisi.

⁸Matauna gala lumalama makwaina, mitaga ima kidamwa bikamituli paila lumalama.

⁹Baisaga lumalama mokwita imaima ovalu watanawa, e ititapi tomota komwaidosi.

¹⁰Biga matauna isisu ovalu watanawa, e metoya baisa matauna Yaubada eibubuli valu watanawa, mitaga valu watanawa gala inikolaisi matauna.

¹¹Ima ola valu tatoula, mitaga sala[4] gala ikamiabaisi matauna.

¹²Mitaga mimilisi ikamiabaisi, e idubumaisi matauna; mapaila itagwala bikeulasi si koni matausina bimila litula Yaubada.

¹³Matausina bimila litula Yaubada gala makawala mina watanawa si kidakeda. Gala availa la unai kidamwa bidoki matausina Yaubada litula. Mitaga Yaubada matauna Tumasi wala.

¹⁴Biga imili tomota, e isikailidasi. E bogwa tagisaisi kala katububula,[5] saina vakaigaga mitakwai deli kamokwita. Katububula makwaina baisa avaka ibodi Yaubada bisaiki Latula gudikesa.

¹⁵Yoni ikamituli paila matauna; idou, e ikaibiga, kawala, “Bogwa goli lalivilibogwi paila matauna, ‘Matauna iyeikulaigu mitaga bogwa bikalisauwaigu.’ Paila igau gala akaloubusi matauna eisibogwa.”

¹⁶Matauna uulotoula mitakwai e bogwa eimitukwaiyaidasi komwaidodasi. Isakaidasi mitakwai saina bidugaga.[6]

¹⁷Paila Yaubada isaiki Karaiwaga metoya baisa Mosese; mitaga isaiki mitakwai deli kamokwita metoya baisa Yesu Keriso.

¹⁸Gala kwaitala tuta availa igisi Yaubada, gala wala; Yaubada Latula gudikesa wala, matauna isividuli Yaubada, matauwena Latula goli eikayai Yaubada.

¹⁹E baisa Yoni la kamituli. Tutala mina Yudia tolesi Yerusalem iwitalaisi tolula toyo Libai[7] bilosi bikatupoiyaisi matauna kawasi, “Availa yoku?”

²⁰E ikamatula goli, gala ikapatu wodola mitaga ikikamituli mimilakatila, kawala, “Yeigu gala matauna Mesaia.”[8]

²¹E ikatupoivauwaisi matauna, kawasi, “Ammakawamgwa ke? Ki, yoku Ilaitia?”[9] E iyakala, kawala, “Yeigu gala.” Kawasi, “Ki, yokugwa tovitoubobuta matauna?”[10] E ivitakaula, kawala, “Gala.”

²²Mapaila ilukwaisi matauna, kawasi, “Mitaga availaga yoku? Paila magimasi bakakamitulaisi baisa matausina leiwitalaimasi. Avaka bukudokaim titoulem?”

²³Yoni ivitakauloki matausina metoya ola biga Aisea tovitoubobuta, kawala, “Baisa goli yeigu, ‘Kaigala taitala idoudou oviloupakala, Kukiduwosisiaisi la keda Guyau.’”

²⁴E Parisi[11] leiwitalaisi matausina.

²⁵E ikatupoiyaisi matauna ikaibigasi, kawasi, “Ammakawam? Kidamwa yoku gala Mesaia, kaina Ilaitia, kaina tovitoubobuta matauna, ki avaka paila kubapitaisi?”

²⁶Yoni ivitakauloki matausina, kawala, “Yeigu abapitaisi metoya wa sopi. Taitala itotu oluwalaimi, matauna gala kunikolaisi.

²⁷Matauna goli iyeikulaigu, mitaga katubukolela kaikela kala sipu gala ikwanaigu bataneku.”[12]

²⁸Vavagi makwaina ikaloubusi mapilana Bedani[13] Waya Yoridani ewaiwa, ambaisa Yoni ibapitaisi.

²⁹Eiyam Yoni igisi Yesu imakaia matauna, e ikaibiga, kawala, “Ka, Yaubada la Lam, matauna valu watanawa la mitugaga ikokeula.

³⁰Paila matauna goli baisa lalivilibogwi, kawagu, ‘Matauna iyeikulaigu mitaga bogwa bikalisauwaigu’, paila igau gala akaloubusi, matauna eisibogwa.

³¹E yeigu goli gala anikoli matauna, mitaga lama abapitaisi metoya wa sopi paila uula Yaubada biyomitali matauna baisa mina Isireli.”

³²E Yoni eisola, kawala, “Bogwa lagisi Baloma italakapusi makawala bubuna metoya wa labuma, itoula baisa matauna.

³³Yeigu goli gala banikoli matauna; mitaga Yaubada, matauna iwitalaigu babapitaisi metoya wa sopi, matauwena goli ilukwaigu, kawala, ‘Kidamwa bukugisi Baloma Tobumaboma bibubusi bisikaili availa, baisa goli matauna bibapitaisi metoya baisa Baloma Tobumaboma.’

³⁴E bogwa lagisi e akakamituli matauna goli Yaubada Latula.”[14]

³⁵Tuvaila eiyam, Yoni deli taiyu la toligalega itotusi.

³⁶Imitakavati Yesu ililoula, ikaibiga, kawala, “Ka, Yaubada la Lam.”

³⁷E matausina la toligalega taiyu ilagaisi eilivala, e ibokulaisi Yesu.

³⁸E Yesu itovila, igisi matausina ibokulaisi, ikatupoi, kawala, “Avaka kuninevaisi?” E ilukwaisi matauna, kawasi, “Toboma” (e bitakivilaisi Tovituloki), “am mokusisiki?”

³⁹Iluki matausina, kawala, “Kumaisi kugisaisi.” Ilokaiasi igisaisi am mesisiki, e isikailisi deli matauna yam makwaiwena, paila bogwa itobala kalasia.

⁴⁰Matausina kasitaiyu ilagaisi Yoni la biga, ibokulaisi Yesu, e taitala yagala Anideru, tuwala Saimoni Pita.

⁴¹E nanakwa Anideru ibani tuwala Saimoni, iluki matauna, kawala, “Bogwa kabani Mesaia.” Baisa kala katumiki Keriso.

⁴²Anideru ivakouli tuwala imiaki Yesu; Yesu imitakavati matauna, ikaibiga, kawala, “E, yoku Saimoni, latula Yoni; badoki yagam Sipasa.”[15] Maigana tuvaila Pita, e kala katumiki Dakuna.

⁴³Tuvaila eiyam Yesu magila bilokaia Galili. E ibani Pilipi, iluki matauna, kawala, “Kubokulaigu.”

⁴⁴E Pilipi guma Betisaida,[16] si valu Anideru toyo Pita.

⁴⁵Pilipi ibani Nataniela, e iluki matauna, kawala, “Bogwa kabanaisi matauna paila availa Mosese leigini wa buki Karaiwaga, toyo tovitoubobuta.[17] Matauna Yesu guma Nasaredi, Yosepa latula.”

⁴⁶E Nataniela ikaibiga, kawala, “Ki, ammakawala, igagabila bitabani avai vavagi bwaina mapilana Nasaredi?”[18] Pilipi ikaibiga, kawala, “Kuma kugisi.”

⁴⁷Yesu igisi Nataniela eimaiki, ilivala paila matauna, kawala, “Ka, mokwita — matauna guma Isireli, e gala goli tosasopa matauna.”[19]

⁴⁸Nataniela iluki matauna, kawala, “Ammakawala kunikolaigu?” Yesu ivitakauloki matauna, kawala, “Agisibogwim tutala lokusisu okaikonigulela seuseu igau gala bidouwaim Pilipi.”

⁴⁹Nataniela ivitakauloki matauna. “Toboma, yoku Yaubada Latula! Yoku ma Giyouvekasi yakamaisi mina Isireli.”

⁵⁰Yesu ivitakauloki matauna, kawala, “Ki, kudubumi paila uula lalukwaim bogwa lagisaim okaikonigulela seuseu? Igau bukugisi mimilisi vavagi bikalisuwolisi makwaina.”

⁵¹E iluki matausina, kawala, “Baisa bukululuwaisi, igau bukugisaisi labuma bitavisi, e la anelosi Yaubada bimweimwenasi e bibubusisi baisa yeigu Latula Tomota.”[20]