Read Kilivila YONI 10 Bible Online

YONI 10 - Kilivila bible

YONI 10

¹“Biga mokwita alukwaimi, matauna gala isuvi okasi kali sipi metoya wa lulu, mitaga ipela otapwala kali, matauna touveilau kaina tolibulebu.

²Mitaga matauwena isuvi wa lulu, matauwena kasi toyamata sipi.

³Lulu kala toyamata biulaim baisa matauna; e sipi minasina ilagaisi kaigala, e idou la sipi yagasi, e ivakouli ivisunupuloi minasina.

⁴Bogwa ivisunupuloi komwaidosi la sipi, e ikugwai minasina, e sipi ibokulaisi, paila inikolaisi kaigala.

⁵E tomitawasi gala bibokulaisi, mitaga bisakaulasi metoyasi baisa matauna, paila gala bilagaisi bonala matauna tomitawasi.”

⁶Baisa bigavisaiki[91] Yesu ilivala baisa matausina, mitaga gala ikatetasi avaka ililivali baisa matausina.

⁷Mapaila tuvaila Yesu ikaibiga, kawala, “Biga mokwita alukwaimi, yeigu kasi lulu sipi.

⁸Matausina availa availa imaibogwasi, komwaidosi touveilau toyo tolibulebu; mitaga sipi gala leilagaisi matausina.

⁹Yeigu lulu; availa bisuvi metoya baisa yeigu, matauna bimova, e bisusuvi e bisusunapula e bibani kʹala.

¹⁰Touveilau ima paila biveilau, bikatumata e bikodadaimi; yeigu lama kidamwa bimovasi e bisibwabwailasi.

¹¹“Yeigu toyamata bwaina paila sipi. Toyamata bwaina paila sipi itugwali titoulela baisa okaliga paila sipi.

¹²Kidamwa topilasi bigisi mauna nagigasisi eimaima, e matauna bisilavi sipi bisakaula, paila uula matauna gala toyamata sipi e gala tolisipi; e mauna nagigasisi bigigadi minasina e bikabutubutu minasina.

¹³Matauwena isakaula paila uula topilasi matauna, paila idoki sipi gala avaka.

¹⁴Yeigu toyamata bwaina paila sipi; e anikoli ulo sipi, e ulo sipi inikolaigusi,

¹⁵makawala Tamagu inikolaigu e anikoli Tamagu; e atugwalaigu baisa okaliga paila sipi.

¹⁶E ulo sipi tuwoli isisuaisi, gala wa kali makwaina; minasina goli ibodaigu bavakouli, e bilagaisi kaigagu. E bisisu yawa yuwotala deli toyamata sipi taitala.

¹⁷“Baisa uula Tamagu iyebwailigu, paila atugwalaigu baisa okaliga, kidamwa bakauvauwaigu tuvaila.

¹⁸Gala availa bikaraiwaga bakaliga, mitaga lanagi batugwalaigu makawala. Isim ulo kwaraiwaga batugwalaigu e isim ulo kwaraiwaga bakauvauwaigu tuvaila; Tamagu ikaraiwogaigu makawala.”

¹⁹E tuvaila mina Yudia itavileiyaisi titoulesi paila biga mabigasina.

²⁰E bidubadu matausina ikaibigasi, kawasi, “Baloma gaga isikaila[92] matauna, e bogwa eikanagowa; avaka paila kulagaisi matauna?”

²¹Mimilisi tuvaila ikaibigasi, kawasi, “Baisa gala makawala la biga availa eisakaila baloma gaga. Ki, ammakawala gagabila baloma gaga bivigaki bimitalala matala tokwau?”

²²E pakala Bomaboma[93] ipakapakasi mapilana Yerusalem; tutala katubugibogi.

²³E Yesu ililoula wa Bwala Kwebumaboma, omatala la kabosusuvi Solomoni.[94]

²⁴Mapaila mina Yudia itoulaisi matauna, e ilukwaisi, kawasi, “Avai tuta bukukwatau ninamaisi? Kidamwa yoku Mesaia, kukwabau biga baisa yakamaisi.”

²⁵Yesu ivitakauloki matausina, kawala, “Bogwa lalukwaimi, mitaga gala kudubumaisi. Avaka lauvagi paila Tamagu isakaigu ulo kwaraiwaga makawala, makwaisina ikamitulaigusi;

²⁶mitaga gala bukudubumaisi paila uula yokomi gala ulo sipi.

²⁷Ulo sipi ilagaisi kaigagu, e anikoli minasina, e ibokulaigusi;

²⁸asaiki minasina momova kwekanigaga, e gala bidawousi minasina, e gala availa bilebu metoya oyamagu.

²⁹Tamagu bogwa isakaigu minasina, e matauna ikalisuwoli komwaidosi,[95] e gala igagabila availa bilebu minasina metoya oyamala Tamagu.

³⁰Yeigu Tamagu yakama baisa taitala wala tomota.”

³¹Mina Yudia isauwaisi dakuna tuvaila mwada bikabidikunaisi matauna.

³²Yesu ivitakauloki matausina, kawala, “Bogwa lavagi bidubadu vavagi bwaina metoya baisa Tamagu; paila avai vavagi metoya makwaisina bukukwabidikunaigusi?”

³³Mina Yudia ivitakaulokaisi matauna, kawasi, “Bakakabidikunaimsi gala paila avai vavagi bwaina, mitaga paila lokubigigagi Yaubada; paila yoku tomota wala, mitaga lokudokaim Yaubada.”

³⁴Yesu ivitakauloki matausina, kawala, “Ki kaina Mosese gala igini ola Karaiwaga, ‘Lakaibiga, Taitala taitala yokomi yaubada’?

³⁵E Buki Pilabumaboma gala igagabila bisala. Yaubada leidoki matausina yaubada, matausina goli baisa availa leisaiki la biga.

³⁶Mapaila ammakawagu? Yaubada ikabomaigu iwitalaigu ovalu watanawa. Ki, kulukwaigusiga, kawami, ‘Kubigigagi Yaubada’, paila uula akaibiga, ‘Yeigu Yaubada Latula’?

³⁷Kidamwa gala auvagi la vavagi Yaubada, taga kudubumaigusi.

³⁸Mitaga kidamwa lauvagi makwaisina, kaina gala kudubumaigusi mitaga bukudubumaisi avaka lauvagi; kidamwa bukunikolaisi e bukukwatetasi Tamagu isividulaigu e yeigu asividuli Tamagu.”

³⁹Tuvaila mwada biyosisi matauna, mitaga gala gagabila goli.

⁴⁰Ilokaia tuvaila mapilana Waya Yoridani ewaiwa, ambaisa Yoni ikugwa ibapitaisi;[96] e isisu baisa.

⁴¹Bidubadu imakaiasi matauna; e ikaibigasi, kawasi, “Yoni gala ivagi kwaitala kabutuvatusi, mitaga komwaidona avaka Yoni eilivala paila matauna baisa biga mokwita.”

⁴²E baisa bidubadu idubumaisi matauna.