Read Kilivila YONI 11 Bible Online

YONI 11 - Kilivila bible

YONI 11

¹E taitala tau ikatoula, Lasaro guma Bedani,[97] e mapilana Bedani si valu Meri toyo tuwala Marida.

²(E minana Meri[98] baisa leikeputumi Tomoya deli bulami kaisimasimina, e leitalibulabu kaikela okulula, minawena luleta Lasaro ikatoula.)

³Mapaila luleta iwitalaisi biga baisa matauna, kawasi, “Ka, Tomoya, matauna tombwailim ikatoula.”

⁴Mitaga tutala Yesu ilagi makwaina, ikaibiga, kawala, “Katoula makwaina gala paila kaliga, mitaga paila kala yakaula Yaubada, kidamwa biyakawolaisi Latula Yaubada paila makwaina.”

⁵E Yesu iyebwaili Marida e bodala toyo Lasaro.

⁶E tutala ilagi matauna ikatoula, ikalayu isisu baisa.

⁷E oluviga iluki toligalega, kawala, “Bitakaimilavausi Yudia.”

⁸Toligalega ilukwaisi matauna, kawasi, “Toboma, tuta makateki wala mina Yudia mwada bikabidikunaimsi. Ki, bukukwaimilavauga?”

⁹Yesu ivitakaula, kawala, “Igau wala yam kalasia namwaidona. Kidamwa availa bililoula wa yam, gala bikatupupeili, paila igisi mimilakatila.

¹⁰Mitaga kidamwa bililoula wa bogi, bikatupupeili, paila dudubila isisu baisa matauna.”

¹¹Ililivala makawala, e oluvi iluki matausina, kawala, “Sodasi Lasaro bogwa imasisi, mitaga bala baviguli matauna.”

¹²Mapaila toligalega ilukwaisi matauna, kawasi, “Tomoya, kidamwa eimmasisi, bogwa bibwaina.”

¹³Idokaisi Yesu ilivala paila masisi, mitaga ilivala paila Lasaro la kaliga.

¹⁴Mapaila Yesu ikabau biga, kawala, “Lasaro bogwa eikaliga;

¹⁵e amwasawa paila gala lasisu mapilana paila uula yokomi kidamwa bukudubumaisi. E bitalokaiasi matauna.”

¹⁶Mapaila Tomasi idokaisi yagala Nupoyu iluki sala toligalega, kawala, “Deli bitalosi e bitakaligasi deli matauna.”

¹⁷Yesu bogwa leima ibani Lasaro bogwa ikalavasi isisu wa laka.

¹⁸E Bedani katitaikina Yerusalem, kala maloula kaina katupotolu katupwaila keda (3 km),

¹⁹e bidubadu mina Yudia bogwa imakaiasi Marida sola Meri e deli inigabubusi paila lusita.

²⁰Mapaila Marida bogwa ilagi Yesu leima, isunapula ilokaia ibodi matauna; mitaga Meri isisu wa bwala.

²¹Mapaila Marida iluki Yesu, kawala, “Tomoya, kidamwa bukusisu baisa, luguta gala bikaliga.

²²E wa tuta matutona goli anikoli kidamwa avaka kunigadi Yaubada bisakaim.”

²³Yesu iluki minana, kawala, “Lumta bitokaia bimovavau goli.”

²⁴Marida iluki matauna, kawala, “Anikoli matauna bitokaia bimovavau goli, tutala tomata bitokaiasi bimovavausi igau tovana valu okala vigimkovila.”[99]

²⁵Yesu iluki minana, kawala, “Yeigu tolitokaia e tolimomova; availa bidubumaigu, kaina bikaliga, mitaga bimova goli,

²⁶e availa tomomova idubumaigu gala bikaliga. Kudubumi baisa ke?”

²⁷Minana ikaibiga, kawala, “Mitaga, baisa, Tomoya. Bogwa adubumi yoku matauna Mesaia, Latula Yaubada, matauwena idokaisi bima ovalu watanawa.”

²⁸E bogwa ikaibiga makawala minana ila idou bodala Meri, imitikipoki, ikaibiga, kawala, “Tovituloki isisu ikatupoiyaim.”

²⁹E minana, bogwa ilagi makwaina, nanakwa itokaia e ilokaia matauna.

³⁰E Yesu igau gala bima ovalu, mitaga isisu mapilana ambaisa Marida eibodi matauna.

³¹Mapaila minasina vilesi Yudia isikailisi minana wa bwala e deli inigabubusi, tutala igisaisi Meri nanakwa itokaia e isunapula, ibokulaisi minana, idokaisi bila wa laka ivalam.

³²Mapaila Meri ima ambaisa Yesu mesisiki. Tutala igisi matauna, ikavagina omatala, ikaibiga, kawala, “Tomoya, kidamwa wala bukusisu baisa, luguta gala bikaliga.”

³³Tutala Yesu eigisi minana iuvalam toyo mina Yudia eimaisi deli minana iuvalamsi, inobusobosa ikaikai nanola.

³⁴Ikaibiga, kawala, “Am mokubakwaisi matauna?” Ilukwaisi matauna, kawasi, “Tomoya, kuma kugisi.”

³⁵Yesu ivalam.

³⁶Mapaila mina Yudia ikaibigasi, kawasi, “Kugisaisi ammakawala tombwailila matauna!”

³⁷Mitaga mimilisi matausina ikaibigasi, kawasi, “Matauna eivagi imilakatila matala tokwau; bogwa gagabila bisilibodi matauwena la kaliga, ke?”

³⁸E Yesu inobusobosa onanola tuvaila, ima wa laka. Laka makwaina lagi, e kwaitala dakuna ikanubodi.

³⁹Yesu ikaibiga, kawala, “Kukwauwaisi dakuna.” Marida luleta tomata iluki matauna, kawala, “Tomoya, bogwa eibogina, paila bogwa ikalavasi eisisu.”

⁴⁰Yesu iluki minana, kawala, “Ki kaina gala lalukwaim kawagu kidamwa bukudubumi bukugisi avaka bibodi kala yakaula Yaubada?”

⁴¹Mapaila ikauwaisi dakuna, Yesu ikounakaila gawata, ikaibiga, kawala, “Tamagu anokagutoki baisa yoku paila lokulagaigu.

⁴²Anikoli tuta komwaidona kulilagaigu, mitaga paila tobobawa matausina ititoulasi mapaila alilivala, e bidubumaisi lokuwitalaigu.”

⁴³E bogwa ilivala makawala idou kaigaveka, kawala, “Lasaro, kusunapula kuma.”

⁴⁴E tomata isunapula, yamala kaikela deli kunikwanila, e migila kapolela deli karekwa. Yesu iluki matausina, kawala, “Kukwatuyuvisaisi e kutanekwaisi matauna.”

⁴⁵Mapaila bidubadu mina Yudia leimakaiasi Meri e igisaisi avaka Yesu leivagi idubumaisi matauna.

⁴⁶Mitaga mimilisi matausina ilokaiasi Parisi e ilukwaisi matausina avaka Yesu bogwa leivagi.

⁴⁷Mapaila tolula kasi tokugwa toyo Parisi idouwaisi togugula[100] bisigugulasi, e ikaibigasi, kawasi, “Avaka bitavagaisi? Paila matauwena iuvagi kabutuvatusi bidubadu.

⁴⁸Kidamwa gala avaka bitavigakaisi matauna, tomota komwaidosi bogwa bidubumaisi matauna, e mina Roum bimaisi[101] bikatudidaimisi Bwala Kwebumaboma toyo da tomotasi.”

⁴⁹Mitaga taitala matausina yagala Kaiapa,[102] matauna Tolula Toveka[103] paila taitu makwaina, iluki matausina, kawala, “Gala avaka kunikolaisi;

⁵⁰tuvaila kaina gala kukwatetasi kidamwa ibodi yokomi bukutagwalasi taitala bikaliga paila tomota, e gala da tomotasi komwaidosi bidawousi.”

⁵¹E baisa gala ilivala metoya onanola titoulela; mitaga paila uula matauwena tolula toveka paila taitu makwaina e ivitoubobuta kidamwa Yesu bikaliga paila mina Yudia komwaidosi.

⁵²E gala bikaliga paila mina Yudia kasimwaleta; mitaga kidamwa bikatuyouli gulitinidesi Yaubada litula tosipwala ambaisa ambaisa leisisipwalasi.

⁵³Mapaila metoya wa yam makwaina ikikeiwalasi ammakawala bikatumataisi matauna.

⁵⁴Mapaila Yesu gala ililoula tuvaila omitasi mina Yudia, mitaga isilavi baisa ilokaia mapilana katitaikina oviloupakala, valu mapilana idokaisi Epereim;[104] e baisa isigaga deli toligalega.

⁵⁵E tutala Luvapela Pakala bogwa ivakatitaikina; e igau gala bikaloubusi paka, bidubadu metoyasi okidodina ilokaiasi Yerusalem kidamwa bikikilasi titoulesi.

⁵⁶Mapaila inainevisi Yesu e tutala itotusi wa Bwala Kwebumaboma ibibigatonasi, ikaibigasi, kawasi, “Kwatulaisi? Kaina gala bima wa paka.”

⁵⁷E tolula kasi tokugwa toyo Parisi bogwa leikaraiwagasi, kidamwa availa binikoli ambaisa eisisu, ibodi bikamituli, kidamwa biyosisi matauna.