Read Kilivila YONI 12 Bible Online

YONI 12 - Kilivila bible

YONI 12

¹Mitaga igau yam kwailima kwaitala biwokuva bikaloubusi Luvapela Pakala, Yesu imakaia Bedani[105] am mesisiki Lasaro, matauna Yesu eitokowoi imovavau.

²Mapaila ikatubiasaisi kʹala baisa; Marida iyeyai, mitaga Lasaro taitala matausina ikamkwamsi deli matauna.

³Mapaila Meri ikau bulami kaisimasimina yatala lukwava sokopwana yagala narida. E bulami makaina mapula saina mwau sainela. E ikeputumi kaikela Yesu, e italibulabu kaikela okulula; e maiinela bulami iyuvinaki bwala.

⁴Mitaga Yudasa Isikariota, taitala la toligalega, matauwena kala tokwasesila, ikaibiga, kawala,

⁵“Avaka paila gala bigimolaisi bulami makaina paila lakatutolu kina,[106] e bisakaisi miyasina baisa tonamakava?”

⁶E baisa ikaibiga, gala paila iluluwai tonamakava, mitaga paila uula touveilau matauna, paila mani kauyala kala topwesi, e ikikau avaka isewoyasi.

⁷Yesu ikaibiga, kawala, “Kuligaiwaisi minana. Ibodi minana biyusi paila avai yam bibakwaigusi.

⁸Paila tonamakava isikailimi yumyambwata, mitaga yeigu gala basikailimi yumyambwata.”

⁹Tutala mina Yudia saina tobobawa sainela ilagaisi Yesu isisu baisa, e imaisi; gala paila Yesu wala, mitaga kidamwa bigisaisi Lasaro tuvaila, matauwena leitokowoi imovavau.

¹⁰Mitaga tolula kasi tokugwa ikeiwalaisi bikatumataisi Lasaro tuvaila.

¹¹Paila matauna Lasaro uulela bidubadu mina Yudia eipakaisi matausina e idudubumaisi Yesu.

¹²E saina tobobawa sainela bogwa leimaisi paila paka. Eiyam ilagaisi Yesu eimaima Yerusalem.

¹³Ikauwaisi sisila pulopola,[107] e isunapulasi kidamwa bibodaisi matauna, e ivatalasi ikaibigasi, kawasi, “Osana,[108] Yaubada la mitakwai bisiniveka baisa matauna imaima ikikavitagi yagala Guyau, e baisa Isireli Kinila goli!”

¹⁴E Yesu bogwa ibani ase, e isila otapwala minana; makawala Buki Pilabumaboma kala ginigini isisu,

¹⁵“E yokomi mina Saiyoni; taga kukokolasi! Ka, mi Kini eimaima, leisila wa ase nagwadi!”

¹⁶Ikugwa la toligalega gala ikikatetasi vavagi makwaisina; mitaga tutala Yesu bogwa leibani kala kalugologusa[109] saina guyugwayu, e iluluwaisi kidamwa biga mabigasina isisu paila matauna, e kidamwa bogwa leivagaisi makawala baisa matauna.

¹⁷E, tutala idou Lasaro isilavi laka e itokowoi matauna imovavau, e mabudona eigisaki mitasi isilasolasi baisa.

¹⁸E tobobawa leilagaisi bogwa ivagi kabutuvatusi makwaina, mapaila ilokaiasi ibodaisi matauna.

¹⁹Mapaila Parisi ibibigatonasi, kawasi, “Kugisaisi ammakawala gala sitana tapapeulasi; ka komwaidosi mina watanawa bogwa leibokulaisi matauna.”

²⁰E isilomlasi mina Girisi oluwalaisi deli matausina eilaguvasi bitapwarorusi wa paka.

²¹Mapaila matausina imakaiasi Pilipi, guma Betisaida[110] mapilana Galili, ikatupoiyaisi matauna, kawasi, “Tomoya, magimasi bakagisaisi Yesu.”

²²Pilipi ima e iluki Anideru; Anideru sola Pilipi ilukwaisi Yesu.

²³E Yesu ivitakauloki matausina, kawala, “Tuta bogwa leima kidamwa yeigu Latula Tomota babani agu kwalugologusa[111] saina guyugwayu.

²⁴Biga mokwita alukwaimi kidamwa kwaitala waitunela witi gala bikapusi opwaipwaia e bipwasa bitamwau, bisisu kwetinidesi; mitaga kidamwa bipwasa makawala, biuwa sainela.

²⁵Matauna iyebwaili titoulela bitamwau goli e matauna ikoulovi titoulela ovalu watanawa bisisu bwaina paila momova kwekanigaga.

²⁶Kidamwa availa magila biwotitalaigu, ibodi bibokulaigu; e ambaisa basisu, baisa goli ulo towotetila bisisu; e Tamagu bikamiabi matauna availa biwotitalaigu.

²⁷“Baisa tuta ikaikai nanogu, e avaka balivala? Ki, balivala, ‘Tamagu, kukolaigu metoya wa tuta matutowena’? Mitaga baisa uula goli lama kidamwa baboda tuta matutona kala mwau.

²⁸Tamagu, kuvigaki kam yakaula bisiniveka.” E kaigila butula metoya wa labuma, ikaibiga, kawala, “Bogwa lavigaki agu yakaula biyouloveka, e bavigaki biyouloveka tuvaila.”

²⁹Mapaila tobobawa itotusi baisa ilagaisi, ikaibigasi kidamwa leimila pilapala. Mimilisi tuvaila ikaibigasi, kawasi, “Taitala anelosi leililivala baisa matauna.”

³⁰Yesu ivitakaula, kawala, “Kaigila makaigana eima paila yokomi bukulagaisi, gala paila yeigu.

³¹Baisa tuta wala kala yakala valu watanawa. Baisa tuta wala watanawa kala guyau[112] Yaubada biligaiwa;

³²e yeigu, kidamwa bilupaigusi[113] metoya odabala pwaipwaia, bogwa babia tomota komwaidosi bimakaiagusi.”

³³Ilivala baisa bivitububoti ammakawala bikatumataisi matauna.

³⁴Mapaila tobobawa ivitakaulokaisi matauna, kawasi, “Bogwa kalegasi metoya ola Karaiwaga Mosese kidamwa Mesaia matauwena bisivagasi. Ammakawala lokukwaibiga, kawam, ‘Ibodi bilupaisi Latula Tomota’? Availa Latula Tomota matauwena?”

³⁵Yesu iluki matausina, kawala, “Tuta baisa lubiyamla valu isisu. Kuliloulasi tutala lubiyamla igau gala bidudubali baisa yokomi; paila matauna ililoula odudubila gala binikoli ambaisa bim.

³⁶Tutala lubiyamla isisu baisa yokomi, kudubumaisi wala lumalama e yokomi lumalama tomotala.” Makwaisina vavagi Yesu ilivala, e isilavi ivakium titoulela metoya baisa matausina.

³⁷Bogwa ivagi kabutuvatusi bidubadu makawala omitasi, mitaga gala idubumaisi matauna;

³⁸kidamwa avaka tovitoubobuta Aisea leilivala gala bisala, kawala, “Guyau, availa leidubumi ma kamatulasi, e baisa availa Guyau leivituloki la peula?”

³⁹Mapaila gala igagabila bidubumaisi. Paila Aisea leilivala tuvaila, kawala,

⁴⁰“Yaubada ivigaki bikau mitasi, e leikatukikiti ninasi, kidamwa gala bigisaki mitasi kaina bikatetasi oninasi, e bitovilasi mwada bakatumovi matausina.”

⁴¹Aisea ilivala makawala paila igisi Yesu kala kalugologusa e ilivala paila matauna.[114]

⁴²Bidubadu goli matausina tokwaraiwaga idubumaisi matauna; mitaga gala ikamitulaisi baisa paila uula ikukolaisi Parisi, kaina biyabaisi matausina metoyasi wa bwala tapwaroru;

⁴³paila iyebwailisi sainela kasi kavisi metoya baisa tomota e sitana wala kasi kavisi metoya baisa Yaubada.

⁴⁴E Yesu idou, ikaibiga, kawala, “Availa idubumaigu, gala idubumaigu goli mitaga idubumi matauna eiwitalaigu.

⁴⁵E availa igisaigusi igisi goli matauna eiwitalaigu.

⁴⁶Yeigu lumalama bogwa lama ovalu watanawa, kidamwa availa idubumaigu gala bisisu odudubila.

⁴⁷E kidamwa availa bilagi ulo biga, e gala biyamati mabigasina gala bayakali matauna; lama gala bayakali valu watanawa, mitaga bakatumovi valu watanawa.

⁴⁸Availa ipakaigu, e gala ikamiabi ulo biga, kala yakala isisu; avai biga lalivala, baisa biyakali matauna igau tovana valu okala vigimkovila.[115]

⁴⁹Paila gala alilivala metoya onanogu titoulegu; mitaga Tamagu matauna eiwitalaigu bogwa ikaraiwogaigu avaka bakaibigi e avaka balivali.

⁵⁰E anikoli la karaiwaga bimai momova kwekanigaga. Avaka Tamagu eilukwaigu, e baisa goli alilivali.”