Read Kilivila YONI 18 Bible Online

YONI 18 - Kilivila bible

YONI 18

¹Bogwa ilivala biga mabigasina, Yesu isunapula deli la toligalega e iluvapela makwaina waya Kidironi.[138] Bagula isisu baisa, e Yesu isuvi deli la toligalega.

²Yudasa matauna kala tokwasesila tuvaila einikoli mapilana; paila tuta bidubadu ilolosi baisa deli la toligalega.

³Mapaila Yudasa ivakouli mabudona tokwabilia[139] toyo towotetila metoya baisa tolula kasi tokugwa toyo Parisi, e imakaiasi deli katukusikwasi toyo kaitapa toyo guguwala kabilia.

⁴Yesu inikolibogwi komwaidona avaka bikaloubusi baisa matauna, e ivaloula iluki matausina, kawala, “Availa kuninevaisi?”

⁵Ivitakaulokaisi matauna, kawasi, “Yesu guma Nasaredi.”[140] Yesu ivitakaula, kawala, “Yeigula goli.” E Yudasa, kala tokwasesila, itotu deli matausina.

⁶E tutala iluki matausina, kawala, “Yeigula goli”, ivayumilasi e ikapusisi opwaipwaia.

⁷E ikatupoivau matausina, kawala, “Availa kuninevaisi?” E ikaibigasi, kawasi, “Yesu guma Nasaredi.”

⁸Yesu ivitakaula tuvaila, kawala, “Lalukwaimi yeigula goli matauna; mapaila kidamwa kuninevaigusi, kukilavaisi matausina.”

⁹Ikaibiga makawala kidamwa avaka leilivala gala bisala, “Gala lakitumou taitala metoya availa lokusakaigu.”

¹⁰Mapaila Samoni Pita yamala iyosi la puluta ibiigili, iwaiya la towotetila tolula toveka e ikapituni taigala okakata. E towotetila matauna yagala Maliko.

¹¹Yesu iluki Pita, kawala, “Kusewoya m puluta okauyala. Ki, kudoki gala bamom viga makwelana[141] avaka Tamagu bogwa leisakaigu?”

¹²Mapaila mabudona tokwabilia[142] deli kumatoula toyo mina Yudia si towotetila iyosisi Yesu e ikatupipaisi matauna.

¹³E ikugwa imiakaisi matauna baisa Anasa;[143] e Anasa yawala Kaiapa matauna Tolula Toveka paila taitu makwaina.

¹⁴E Kaiapa baisa matauna eivituloki[144] mina Yudia kidamwa ibodi taitala bikaliga paila tomota.

¹⁵E Saimoni Pita iyeikuli Yesu, e makawala toligalega taiyuwela. E Tolula Toveka eivigaki sola matauwena taiyuwela, e isuvi toyo Yesu baisa okoukweda la bwala Tolula Toveka.

¹⁶Mitaga Pita itotu omatala kabosusuvi. Mapaila matauna toligalega taiyuwela, matauwena goli Tolula Toveka eivigaki sola, isunapula e ibigatona deli minana nayamata kabosusuvi, e matauna ivakouli Pita.

¹⁷E nayamata kabosusuvi ikatupoi Pita, kawala, “Ki, kaina yoku taitala la toligalega matauwena?” Ikaibiga, kawala, “Yeigu gala wala.”

¹⁸E towotetila toyo tokwabilia eivakataisi kova, e itotusi baisa ikikaikwalasi; e Pita deli matausina itotu ikikaikwala.

¹⁹Mapaila Tolula Toveka ikatupoi Yesu paila la toligalega deli la vituloki.

²⁰Yesu ivitakauloki matauna, kawala, “Bogwa lakabau baisa komwaidosi; tuta tuta lauvituloki wa bwala tapwaroru deli wa Bwala Kwebumaboma ambaisa komwaidosi goli mina Yudia eisigugulasi; e gala lakebigikium agu livala.

²¹Avaka paila kukwatupoiyaigu? Kukwatupoi matausina agu tolega avaka lalivala baisa matausina; einikolaisi goli avaka lakaibigi.”

²²Ililivala, e taitala tokwabilia itotu katitaikina ikipitati yamala iwaiya Yesu, ikaibiga, kawala, “Ki, kuvitakauloki Tolula Toveka makawala?”

²³Yesu ivitakauloki matauna, kawala, “Kidamwa lalivala gaga, kukwamituli avaka kala gaga; mitaga kidamwa lalivala duwosisia, avaka paila kuwawaigu?”

²⁴Mapaila Anasa iwitali matauna deli kala katupipi baisa Kaiapa Tolula Toveka.

²⁵E Saimoni Pita itotu ikikaikwala. Mapaila ikatupoiyaisi matauna, kawasi, “Ki kaina yoku taitala la toligalega matauwena?” Iyakala, e ikaibiga, kawala, “Yeigu gala wala.”

²⁶Taitala la towotetila tolula toveka isisu, matauna vaiyola availa Pita eikapituni taigala. E matauna ikaibiga, kawala, “Ki, kaina agisaim wa bagula deli matauna?”

²⁷Mapaila Pita iyakalavau, e nanakwa rekorekwa igela.

²⁸E ilauwaisi Yesu metoya ola bwala Kaiapa ilosi ola bwala tokwaraiwaga. E tuta bulubuvisiga. E mina Yudia titoulesi gala isuvisi wa bwala makwaina, mwada taga biyogagaisi kasi Karaiwaga, paila ikikilasi[145] kidamwa igau bikamsi Luvapela Pakala.

²⁹Mapaila Pailato[146] isunapula baisa matausina, e ikaibiga, kawala, “Avai pakula kutabinakaisi matauna tau?”

³⁰Ivitakaulokaisi matauna, kawasi, “Kidamwa matauna gala tomitugaga, gala bakasakaimsi matauna.”

³¹Mapaila Pailato iluki matausina, kawala, “Kuwoyaisi matauna titoulemi, e kuyakalasi matauna makawala kami karaiwaga titoulemi.” Mina Yudia ilukwaisi matauna, kawasi, “Gala bukutagwala bakakatumataisi availa.”

³²Ikaloubusi baisa makawala kidamwa gala bisala avaka Yesu leilivala tutala eivituloki ammakawala bikatumataisi matauna.[147]

³³Pailato isuvau ola bwala, e idou Yesu ikatupoi matauna, kawala, “Ki, yoku si giyouveka mina Yudia?”

³⁴Yesu ivitakaula, kawala, “Ki, lokukwaibiga makawala metoya onanom titoulem, kaina mimilisi tuwoli ilukwaimsi makawala paila yeigu?”

³⁵Pailato ivitakaula, kawala, “Wa, ammakawala! Yeigu guma Yudia ke? Veyamwa toyo tolula kasi tokugwa matausina goli eikasalaimsi baisa yeigu! Avaka lokuvigaki?”

³⁶Yesu ivitakaula, kawala, “Yeigu ulo guyau gala metoya ovalu watanawa; kidamwa ulo guyau metoya ovalu watanawa, agu viloumgwa bogwa bikabiliasi kidamwa gala bikasalaigusi baisa mina Yudia; mitaga ulo guyau gala goli metoya ovalu watanawa.”

³⁷Pailato ikatupoi matauna, kawala, “Yoku taitala giyouveka; ki, mayokula?” Yesu ivitakaula, kawala, “Yokula kawam ‘Giyouveka’.[148] Baisa uula lakaloubusi, e baisa uula lama ovalu watanawa paila wala baisa, kidamwa balivala paila vavagi kwekamokwita. Availaga tokamokwita, matauna ililagi kaigagu.”

³⁸Pailato ikatupoi matauna, kawala, “Avakaga kamokwita?” Pailato ililivala, e isunupulovau baisa mina Yudia, e iluki matausina, kawala, “Gala avaka kala pakula labani.

³⁹Mitaga isisu kami gulogula, kidamwa bataneku taitala baisa yokomi Luvapela oPakala. Ammakawala, bataneku mi giyouveka yokomi mina Yudia paila yokomi ke?”

⁴⁰Ikawotasi iwaiweyasi, kawasi, “Matauwena gala, mitaga Baraba.” E Baraba matauna tolibulebu.[149]