Read Kilivila YONI 20 Bible Online

YONI 20 - Kilivila bible

YONI 20

¹E obulubuvisiga Sunday, odudubalela goli, Meri Magidala[160] isalili ila wa laka. E igisi dakuna bogwa ikanuwada metoya wa laka.

²Mapaila isakaula e imakaia Saimoni Pita toyo toligalega taiyuwela tombwailila Yesu, e iluki matausina, kawala, “Bogwa eikauwaisi Guyau metoya wa laka, e gala kanikolaisi ambaisa mesakaisi matauna.”

³Mapaila Pita sola toligalega taiyuwela ilosi e ilokaiasi laka.

⁴E kasitaiyu isakaulasi, mitaga matauwena toligalega taiyuwela ikalisau Pita, e imaibogwa wa laka.

⁵E ikululu bitadoyai olumoulela, e igisi mwaikapula yapupwakau ikanukwenusi baisa, mitaga gala isuvi.

⁶E tuvaila Saimoni Pita ibubokuli matauna, e ima, isuvi wa laka; e igisi mwaikapula yapupwakau ikanukwenusi;

⁷e mwaikapula kapolela dabala gala ikanukwenu deli miyasina yapupwakau mitaga deli katupwaila ikanapala kebila ituwoli.

⁸Mapaila toligalega matauwena leimaibogwa wa laka tuvaila isuvi; igisi e idubumi.

⁹Paila igau gala bikatetasi Buki Pilabumaboma kala ginigini makwaina kidamwa biboda matauna bitokaia bimovavau.

¹⁰Mapaila toligalega ilokaiasi osi bwala.

¹¹Mitaga Meri itotu owodola laka, iuvalam. Iuvalam, e ikululu itadoyai olumoulela laka.

¹²E igisi taiyu anelosi kasi kwama yapupwakau, isilaisi okabala ambaisa mekanabogwa wowola Yesu, taitala odabala, taitala okaikela.

¹³E ilukwaisi minana, kawasi, “Ve! Avaka paila kuuvalam?” Iluki matausina, kawala, “Leikauwaisi ulo Guyau, e gala anikoli ambaisa mesakaisi matauna.”

¹⁴Ililivala minana, e itovila, igisi Yesu itobanaga eitotu, mitaga gala ivitusi matauna Yesu.

¹⁵Yesu iluki minawena, kawala, “Ve, avaka paila kuuvalam? Availa kunainevi?” Meri idoki matauna tobigubagula, e iluki matauna, kawala, “Tomoya, kidamwa yoku lokukwau wowola, bukulukwaigu ambaisa lokusaim matauna, e yeigu bala bakau.”

¹⁶E Yesu iluki minawena, kawala, “Meri.” E itovilaki iluki matauna obonasi mina Iberu, kawala, “Raboni!” (e kidamwa takatumikaisi, “Tovituloki”).

¹⁷Yesu iluki minawena, kawala, “Taga kukwepapaigu, paila gala balaguva baisa Tamagu; mitaga kulokaia budagwa, e kuluki matausina kidamwa balaguva baisa Tamagu toyo Tumasi, baisa ulo Yaubada toyo si Yaubada.’”

¹⁸Meri Magidala ila e iluki toligalega, kawala, “Bogwa lagisi Guyau”, e iluki ammakawala leilivali vavagi makwaisina baisa minana.

¹⁹Ikoyavi wa yam makwaiwena Sunday, e toligalega ikatubodaisi bwala ambaisa isisuaisi paila ikukolaisi mina Yudia. E Yesu ima, itowala, e iluki matausina, kawala, “Bitalaguva lupomi.”

²⁰E bogwa ilivala makawala, ivituloki matausina yamala toyo visiala. Mapaila toligalega imwasawasi sainela paila igigisaisi Guyau.

²¹Yesu ilukivau matausina, kawala, “Bitalaguva lupomi.[161] Yeigu awitalaimi makawala goli Tamagu leiwitalaigu.”

²²E bogwa ilivala makawala ikayoki matausina, e iluki matausina, kawala, “Kukwauwaisi Baloma Tobumaboma.

²³Kidamwa kuligaiwaisi avai tau la mitugaga, yeigu bogwa aligaiwa makwaisina; kidamwa gala kuligaiwaisi avai tau la mitugaga, yeigu goli gala baligaiwa makwaisina.”

²⁴Mitaga Tomasi idokaisi yagala Nupoyu, matauna taitala matausina toligalega, gala isikaili matausina tutala Yesu leimaibogwa.

²⁵Mapaila toligalega ilukwaisi matauna, kawasi, “Bogwa kagisaisi Guyau.” Mitaga Tomasi iluki matausina, kawala, “Kidamwa gala bagisi boyala kaiwawa oyamala, e basewoya misikwaikwegu oboyala kaiwawa, e basewoya yamagu ovisiala, gala badubumi.”

²⁶E ikalalima ikalatolu, la toligalega tuvaila isisuaisi olopola bwala, e Tomasi isikaili matausina. Bwala bogwa ikatubodaisi wala, mitaga Yesu ima e itowala, ikaibiga, kawala, “Bitalaguva lupomi.”

²⁷E iluki Tomasi, kawala, “Kumai kusewoya misikwaikwem baisa. E, kugisi yamagu. E kuyosali yamam, kusewoya ovisiagu; taga m dubumi gala, mitaga kudubumi.”

²⁸Tomasi ivitakauloki matauna, kawala, “Ulo Guyau, e ulo Yaubada.”

²⁹Yesu iluki matauna, kawala, “Ki, lokudubumi paila uula lokugisaigu? Bimwasawasi availa availa matausina gala bigisaisi mitaga bidubumaisi goli.”

³⁰Yesu ivagi kabutuvatusi bidubadu[162] ituwoli ituwoli omitasi toligalega, mitaga kasi ginigini gala isisu wa buki mapilana.

³¹Mitaga vavagi makwaisina kasi ginigini isisu kidamwa bukudubumaisi[163] Yesu matauna Mesaia,[164] Yaubada Latula; e metoya omi dubumi bukubanaisi momova metoya baisa matauna.