Read Kilivila YONI 21 Bible Online

YONI 21 - Kilivila bible

YONI 21

¹Oluvi, Yesu iyomitali titoulela baisa toligalega okawolawala Milaveta Taibiria;[165] e iyomitali titoulela baisa makawala.

²Isidadailisi Saimoni Pita, Tomasi idokaisi yagala Nupoyu, Nataniela guma Kena[166] mapilana Galili, Sebedi litula[167] toyo taiyu la toligalega tuwoli.

³Saimoni Pita iluki matausina, kawala, “Bala apoula.” Ilukwaisi matauna, kawasi, “Yakamaisi deli bitalosi.” E ilosi, isilasi wa waga e ipwapoulasi; e bogi makwaina komwaidona inanotasi wala.

⁴Obulubuvisiga Yesu itotu okawolawa; mitaga toligalega gala ivitusaisi kidamwa matauna Yesu.

⁵Yesu ikatupoi matausina, kawala, “Tauwau, kwalaisi? Gala sitana kukwalotasi ke?” Ivitakaulokaisi matauna, kawasi, “Gala wala.”

⁶Iluki matausina, kawala, “Kulavaisi wota okatalela waga, e bukukolaisi.” Mapaila ilavaisi, e gala gagabila bibiaisi paila yena saina bidugaga.

⁷Mapaila matauna toligalega tombwailila Yesu iluki Pita, kawala, “Matauna Guyau goli.” Tutala Saimoni Pita ilagi mwada matauna Guyau, isikam kala kakapula, paila leivilili miyana, e ivabusi obolita.

⁸Mitaga toligalega kesala isududilasi si waga, ibiaisi wota ikalulusewa yena; paila waga gala kaduwonaku mitaga kala maloula kaina makawala kwaiyu baleku.[168]

⁹E bogwa ivalaguvasi, igisaisi pwakova baisa, e yena ikanukwenusi makovana deli kaula.

¹⁰Yesu iluki matausina, kawala, “Kumaiyaisi sitana yena lokukolaisi.”

¹¹Mapaila Saimoni Pita isila e ibia wota imai okawolawa, leikalulusewa yena navakaveka kala bawa lakatutala naluwolima natolu; makawala goli kala bawa mitaga wota gala ikobolusi.

¹²Yesu iluki matausina, kawala, “Kumaisi; kukwatumataisi kami molu.” E gala taitala toligalega ituvaluwa bikatupoi matauna, “Availa yoku?” Inikolaisi matauna Guyau.

¹³Yesu ima, ikau kaula isaiki matausina, e yena makawala.

¹⁴Baisa sivitolula Yesu iyomitali titoulela baisa toligalega, tutala eitokaia imovavau.

¹⁵E bogwa ikatumataisi kasi molu, Yesu iluki Saimoni Pita, kawala, “Saimoni, Yoni latula, kuyebwailigu sainela, e vavagi makwaisina sitana wala ke?”[169] Iluki matauna, kawala, “Mitaga, Guyau, kunikoli ayebwailim.” Yesu iluki matauna, kawala, “Kuvakoma minasina ulo lam.”

¹⁶Siviyuwela iluki matauna, kawala, “Saimoni, Yoni latula, kuyebwailigu ke.” Iluki matauna, kawala, “Mitaga, Guyau, kunikoli ayebwailim.” Iluki matauna, kawala, “Kuyamati minasina ulo sipi.”

¹⁷Iluki matauna sivitolula, kawala, “Saimoni, Yoni latula, kuyebwailigu ke?” Pita nanola ikaikai paila leikaibiga sivitolula baisa matauna, kawala, “Kuyebwailigu ke?” E iluki matauna, kawala, “Guyau, kunikoli vavagi komwaidona; kunikoli ayebwailim.” Yesu iluki matauna, kawala, “Kuvakoma minasina ulo sipi.

¹⁸Biga mokwita alukwaim, om tuta gwadi, kupali kam kwarekwa e kuliloula ambaisa magim goli; mitaga tutala bukutomoya, bukuvitukoli yamam, e taitala tuwoli bipalaim e bilauwaim ambaisa gala magim.”

¹⁹Ililivala baisa kidamwa bivitububoti ammakawala Pita bivigaki Yaubada kala yakaula metoya ola kaliga.[170] E bogwa ilivala baisa, iluki matauna, kawala, “Kubokulaigu.”

²⁰Pita itovila, igisi toligalega matauna, tombwailila Yesu, ililoula oluvi; baisa matauna goli leisividuli Yesu okamkwam, e kawala, “Tomoya, availa matauwena bikasalaim?”

²¹Tutala Pita igisi matauwena, ikatupoi Yesu, kawala, “Guyau, ammakawala matauwena?”

²²Yesu iluki matauna, kawala, “Kidamwa yeigu adoki bisisu igau tutala bama, baisa gala m vavagi yoku. Yoku kubokulaigu!”

²³Mapaila biga mabigana iyoyu baisa kala tobwakuli Yesu kidamwa toligalega matauna gala bikaliga. Mitaga Yesu gala ilivala mwada toligalega matauna gala bikaliga; mitaga ilivala, kawala, “Kidamwa yeigu adoki bisisu igau tutala bama, baisa gala m vavagi yoku.”

²⁴Baisa goli matauna toligalega isilasola paila vavagi makwaisina, e leigini vavagi makwaisina; e kanikolaisi leikamokwita la silasola.

²⁵Mitaga Yesu leivagi bidubadu vavagi tuvaila; e kidamwa bitaginisi kwaitala kwaitala vavagi makwaisina bikaloubusisi buki bidubadu, e adoki buki mpasina bikasuwoki valu watanawa e bigugulomgwa.