Read Kilivila SI VAVAGI APOSETOLO 13 Bible Online

SI VAVAGI APOSETOLO 13 - Kilivila bible

SI VAVAGI APOSETOLO 13

¹Olumoulela mabudona ekalesia mapilana Anitioki eisisuaisi taivilesi tovitoubobuta[89] deli tovituloki, Banaba, Simioni idokaisi Tobwabwau, Lusio tolela Sairini, Manaeni matauna kasitaiyu Erodi[90] eitubwasi, e deli Saulo.

²Tuta matutowena iuwotetilasi paila Guyau deli si pusoposuma, Baloma Tobumaboma iluki matausina, kawala, “Kukwatupalaisi matausina paila yeigu, Banaba deli Saulo, paila ladou matausina mwada bivagaisi wotetila makwaina avaka lanagi paila matausina.”

³Ipusoposumasi deli ininigadasi e ikiwotaisi matausina, e iwitalaisi ilosi.

⁴Baloma Tobumaboma bogwa iwitali Banaba deli Saulo ilokaiasi[91] Selusia, e ikewasi metoyasi baisa ilosi wa simla Saipirosi.[92]

⁵Tutala leiviloubusisi mapilana Salamisi e ikamitulaisi la biga Yaubada baisa mina Yudia osi bwala tapwaroru. Leivakoulisi matauna yagala Yoni Maka paila bipilasi wotetila makwaina.

⁶Matausina ivapelasi ilokaiasi mapilana Peposi[93] ibodasi taitala tomigameguva yagala Ba-Yesu, e matauna guma Yudia, idoki titoulela taitala tovitoubobuta.

⁷E matauna Ba-Yesu lubaila tokwaraiwogala simla[94] makwaina yagala Segiasi Paulosi, matauna saina toninitalapula. E tokwaraiwaga idou Banaba deli Saulo bimakaiasi, paila magila bilagi la biga Yaubada.

⁸E matauna tomigameguva, igiyuwela obonasi mina Girisi Elimasi, isilibodi matausina. Ivigikoni bivisivili tokwaraiwaga mwada taga bidubumi.

⁹E oluvi Saulo, matauna igiyuwela Paulo,[95] ivakasau Baloma Tobumaboma e itobu matala igigisi tomigameguva,

¹⁰kawala, “Tabula mitugaga yoku! Yoku tuta tuta mwada bukuyogagi komwaidona vavagi bwaina. Yoku ivakasauwaim bidubadu katudewa gaga migawelu migawelu, tuvaila yoku tuta komwaidona kuvigikoni mwada bukukivili avaka Guyau la kamokwita, e bukuvigaki sopa!

¹¹Ka, Guyau yamala bikabikonaim baisa tuta; matam bikau, e gala bukugisi avaka paila kwaivila yam.” E saina nanakwa Elimasi eilumkoli guugwau bwabwau eikuboli matala; e tuta matutowena wala ikabakakava mwada bibani taitala bivakadi.

¹²E tutala eigisi avaka eiviloubusi, e tokwaraiwaga idubumi; itutu nanola paila vituloki makwaina paila Guyau.

¹³Paulo deli sala ikewasi isilavaisi Peposi e imaisi Periga mapilana Pampilia; mitaga Yoni Maka iligaiwa matausina baisa e ikaimilavau Yerusalem.

¹⁴Metoya Periga isaitaulasi imaisi Anitioki mapilana Pisidia; e wa yam sabate[96] isuvisi osi bwala tapwaroru mina Yudia isilaisi.

¹⁵E igau ikikalawasi metoya Mosese la Karaiwaga deli si ginigini tovitoubobuta,[97] e tokwaraiwogala bwala tapwaroru iwitali biga baisa matausina, kawala, “Tuwagwa, magimasi yokomi bukulivalasi baisa tomota, kidamwa kuyosisi avaka ibodi bukukwatululutaisi matausina.”

¹⁶E Paulo itokaia iyosali yamala iluki bikikwatusi e ikawota, kawala: “Ka, budagwa mina Isireli, deli yokomi gala mina Isireli, availa availa kututapwarorusi baisa Yaubada:[98] kulagaigusi!

¹⁷Matauna Yaubada, yakamaisi mina Isireli ma Yaubadasi goli, inagi tubumaiasi e ilupi matausina odubasi sesia tutala itogilagalasi mapilana Itipita. E Yaubada topeuligaga ivakadi matausina isilavaisi mapilana Itipita.

¹⁸Deli, kweluwovasi taitu ipeuloki[99] paila matausina tutala ititavinasi oviloupakala.

¹⁹E ikatudidaimi kabokwaraiwaga kwailima kwaiyu olopola Kenani, e la tomota ivigaki iyoulisi si valu.

²⁰E vavagi makwaisina si kaloubusi iboda lakatuvasi kweluwolima taitu. “Bogwa leiwokuva, e isaiki matausina mimilisi tokwaraiwaga igau ola tuta tovitoubobuta Samwela.

²¹E tuta matutowena inigadasi kidamwa Yaubada binagi si kini, e isaiki matausina Saulo, Kisa latula, metoya Beniamina odalela, bivigaki matauna si kini paila kweluwovasi taitu.

²²Igau eilisi matauna Saulo, Yaubada ivigaki Debida si kini. E Yaubada ilivala paila Debida, kawala, ‘Bogwa lagisi Debida Yese latula matauna ibudoki nanogu; paila bogwa bivagi komwaidona avaka magigu bivagi.’

²³E Yaubada ivigaki Yesu kama tokwatumovasi yakamaisi mina Isireli makawala eikatotilabogwa, e matauna Yesu dalela Debida.

²⁴Igau Yesu gala bivitouula la paisewa, Yoni ikamituli baisa komwaidosi mina Isireli, kawala, ‘Ibodi bukuninavilasi paila mi mitugaga e bukubapitaisasi.’

²⁵E makateki bivigimkulovi la kamatula, Yoni iluki tomota, kawala, ‘Yokomi kudokaisi availa yeigu? Yeigu gala matauna lokututulaisi. Mitaga ka, matauwena iiyeikulaigu e yeigu gala bibodaigu bavilili kala buta.’[100]

²⁶“E budagwa, yakamaisi metoya odalela Eberaam deli availa availa yokomi gala mina Yudia kututapwarorusi baisa Yaubada, ka! Yaubada leiwitali bigala katumova baisa yakidasi.[101]

²⁷Paila matausina tolesi Yerusalem deli tuvaila si tokwaraiwaga gala inikolaisi kidamwa matauna Yesu Tokwatumova, e gala ikatetasi livalesi tovitoubobuta avaka sabate sabate ikikalawasi. Mitaga ikamogaisi Yesu e mapaila ivigakaisi tovitoubobuta si biga gala bisala.

²⁸Ilagoli gala gagabila bibanaisi uula paila bikatumataisi Yesu mesinaku wala inigadaisi Pailato bikamogi Yesu bikaliga.

²⁹E tutala leivigimkulovaisi komwaidona avaka Buki Pilabumaboma eigini paila matauna, oluvi ivabwaisi metoya makaina korosi ibakwaisi matauna wa laka.

³⁰Mitaga Yaubada eitokowoi matauna e imovavau.

³¹E matausina leibokulaisi matauna tutala eisilavi Galili eila Yerusalem, matausina goli igisaisi matauna tomomova paila yam bidubadu. E tuta baisa matausina kala tosola baisa mina Isireli.

³²E yakamaisi katotusi baisa mwada bakamiakaimi Bulogala Bwaina. Paila komwaidona avaka Yaubada ikatotilabogwa baisa tubudoiasi bogwa leivigimkulovi baisa yakidasi tubusia.[102] Baisa makawala, itokowoi Yesu imovavau. E Sam piliyuwela kala ginigini makawala. ‘Yokula Latugu, yam lagaila launaim.’

³³

³⁴E baisa avaka Yaubada leikaibiga paila leitokowoi matauna imovavau, e gala tuvaila bitumgeyai. Kawala, ‘Bogwa basakaimi avaka lakatotila baisa Debida, bogwa bamitukwaiyaimi vavagi kwebumaboma, e bukusibwabwailasi goli.’

³⁵E tuvaila ikaibiga mapilana ituwoli, ‘Gala bukutugwalaigu, yeigu m towotetila tovigabau, kidamwa baboda tumgeyai.’

³⁶Paila Debida iuwotetila ola tuta avaka bibodi Yaubada nanola. E oluvi ikaliga ibakwaisi matauna otalisi tubula e wowola iboda tumgeyai.

³⁷Mitaga matauwena Yaubada leitokowoi eimovavau, gala iboda tumgeyai.

³⁸Baisa tuta kakamitulaisi Bulogala Bwaina baisa yokomi kidamwa Yaubada gagabila biligaiwa mi mitugaga. E budagwa ibodaimi komwaidomi bukunikolaisi mokwita kidamwa kamatula makwaina uulela matauna Yesu.

³⁹E komwaidona mitugaga makwaisina gala gagabila la Karaiwaga Mosese bitanekwaidasi. Mitaga availa availa leidubumaisi matauna Yesu, e Yaubada bogwa leitaneku matausina metoya mitugaga makwaisina.

⁴⁰Mapaila kuyamataimi taga bukubodaisi baisa avaka tovitoubobuta leilivalaisi; kawasi,

⁴¹‘Ka, mina kakayuwa yokomi, kugisaisi. Biyowa lupomi oluvi bukukwaligasi! Paila vavagi makwaisina auvagi omitami tuta baisa, gala goli bukudubumaisi, ilagoli availa bikatumiki makwaina.’”

⁴²Paulo deli Banaba isusunapulasi bwala tapwaroru e tomota inigadasi mwada sabate bima bikaimilavausi bilivalasi tuvaila paila makwaisina vavagi.

⁴³Isunapulasi komwaidosi. E isisuaisi baisa mina Yudia deli mimilisi tomota gala mina Yudia leiluvapelasi eidubumaisi mina Yudia si tapwaroru. E bidubadu matausina ibokulaisi Paulo deli Banaba. E aposetolo ibigatonasi deli matausina ikatululutaisi bipwaitukulaisi keda makadana metoya baisa Yaubada ola mitakwai.

⁴⁴Igau leima sabate kwaiyuwela komwaidosi mapilana valu imaisi mwada bilagaisi bigala Guyau.

⁴⁵Mitaga tutala mina Yudia igisaisi tobobawa, ipugipogisi sainela, e iuvataisi ibigigagaisi la biga Paulo deli ikaluwouwaisi matauna.

⁴⁶Mitaga Paulo deli Banaba ikawotasi deli si tuvaluwa sainela, kawasi, “Ibodi bakalukibogwimi Yaubada la biga. Mitaga yokomi lokupakaisi e kaina kudokaisi gala bibodaimi bukumovagasisi - mapaila desi wala, kaligaiwa! Bakasilavaimi bakalokaiasi matausina gala mina Yudia.

⁴⁷Paila Guyau leisakaimasi karaiwaga makwaina, kawala, ‘Lawitalaimi bukulosi bukumila kaitapasi paila matausina gala mina Yudia, kidamwa komwaidosi mina watanawa bibodasi kasi katumova.’”

⁴⁸E tutala matausina gala mina Yudia ilagaisi baisa imwasawasi e iyakawolaisi Guyau la biga. E availa availa Yaubada leinagi paila bimovagasisi, matausina idubumaisi.

⁴⁹Mapaila Guyau la biga ikaligiaki ambaisa ambaisa mapilasina valu.

⁵⁰Mitaga mina Yudia ikasalaisi matausina valu kala tokugwa deli minasina gala mina Yudia giyouvilela ititemmalaisi Yaubada.[103] E matausina ivitouulasi bilamidadaisi Paulo deli Banaba, e iyabaisi matausina kasitaiyu metoya osi valu mapilasina.

⁵¹E aposetolo ikatusisapaisi pwaipwaia[104] okaikesi paila si kabutuvatusi, e isaitaulasi ilosi mapilana Ikonium.

⁵²E toligalega tolesi Anitioki saina imwasawasi deli ivakasau Baloma Tobumaboma.