Read Kilivila SI VAVAGI APOSETOLO 2 Bible Online

SI VAVAGI APOSETOLO 2 - Kilivila bible

SI VAVAGI APOSETOLO 2

¹Tutala yam Penitikosi[10] ikaloubusi, komwaidosi todubumi isigugulasi kwaitala bwala.

²E gala imomwa, ilagaisi butula metoya wa labuma luluwala makawala utuyagila bikoulusa, e ililiku bwala makwaiwena matausina isisikaisi.

³E igisaisi avaka kala gigisa makawala mayela kova mlimwalila ipepela, e ititola baisa taitala taitala.

⁴E komwaidosi ivakasau Baloma Tobumaboma e matausina ivitouulasi biwawailasi bonavau, makawala Baloma Tobumaboma la peula eisaiki ikikaibigasi.

⁵E bidubadu mina Yudia tosisula Yerusalem totapwaroru leimaisi metoyasi mapilasina valu watanawa komwaidona.[11]

⁶Tutala ilagaisi butula makwaina saina tobobawa ititogugulasi. Komwaidosi itutu uwosi, paila taitala taitala ililagi bonala titoulela, uula matausina todubumi ililivalasi makawala.

⁷Iyowa luposi kawasi, “Wi! Matausina tauwau ililivalasi baisa, mitaga ka, komwaidosi wala mina Galili.

⁸Ammakawala baisa? Taga komwaidodasi wala talilagaisi matausina ililivalasi obonadasi wala, kadai?

⁹Paila yakidasi mina Paridia, mina Midia, mina Ilam, mina Mesopotemia, mina Yudia, mina Kapadosia, mina Ponito, mina Esia,

¹⁰mina Pirigia, mina Pampilia, mina Itipita, deli Libia viluwela mapilasina katitaikina Sairini. Mimilisi mina Roum,

¹¹e budoyu boda - mina Yudia, deli matausina gala mina Yudia tosivila iluvapelasi osi tapwaroru mina Yudia; e deli mimilisi mina Kiriti deli mina Arebia. Mitaga komwaidodasi yakidasi talilagaisi matausina ililivalasi obonadasi paila makwaisina vavagi siligaga avaka Yaubada bogwa leivagi!”

¹²E komwaidosi iyowa luposi e deli si ninayuwa ititamapusi taitala baisa taitala, kawasi, “Wi! Avai vavagi baisa, ke?”

¹³Mitaga mimilisi ikikovilaisi todubumi, kawasi, “Wa! Ka, matausina eimomsi sopi kaipeula leiwaiya botutu!”

¹⁴E oluvi Pita itomalaula deli matausina sala tailuwotala taitala aposetolo, ikawota kaigala kaigaveka ilivala baisa tobobawa, kawala. “E segwaia mina Yudia, deli komwaidomi tosisula Yerusalem, bitalapula ninami. Ka, kulagaisi kaigagu avaka balivala.

¹⁵Ki, kudokaisi paila yakamaisi leiwaimasi botutu? Gala makawala, paila kaukwau baisa eipokala valu.

¹⁶E mitaga vavagi makwaisina baisa avaka tovitoubobuta Yoweli leikaibigi, kawala.

¹⁷‘Yaubada ikaibiga, Baisa makawala bavagi, tovana valu okala vigimkovila: igau baligabu ulo Baloma baisa tomota komwaidosi. Litumia tauwau deli vivila igau bikamitulaisi nanogu, tubovau bigisaisi kilisala deli tommoya mimi[12] bimimisi.

¹⁸E ka, wa yam makwaisina baligabu ulo Baloma baisa matausina ulo touwata goli, tauwau deli vivila, e matausina deli bikamitulaisi nanogu.

¹⁹Igau bavituloki vavagi siligaga odabala labuma, deli ovalu watanawa bisim kabovituvitusila, baisa makawala, buyavi deli kova, deli mseu kubowala.

²⁰Kalasia igau bidavila bidudubila, deli tubukona bikulubweyani makawala buyavi, igau gala bivitoulai la yam Guyau. Yam makwaiwena tubulela yam saina bwainigaga.

²¹Mapaila yam makwaiwena kidamwa availa availa bidousi baisa Guyau, bogwa bikoli matausina.’

²²“E segwaia mina Isireli, kulagaisi biga baisa. Yesu guma Nasaredi[13] matauna leima metoya baisa Yaubada, e bitanikoli kala mimilakatila baisa paila uula makwaisina vavagi siligaga deli kaboyowalula deli kabutuvatusi avaka Yaubada leivagi metoya baisa matauna. E yokomi kukwatetasi baisa paila iyoulapula baisa oluwalaidasi.

²³Mitaga Yaubada leinigibogwi tomota bikasalaisi matauna Yesu bukuyosisi, baisa nanola Yaubada leinigibogwi makawala. E yokomi lokukwatumataisi paila lokukwasalaisi baisa tomitugaga[14] e leikatukorosaisi matauna.

²⁴Mitaga Yaubada bogwa itokowoi matauna imovavau, e eitaneku metoya okaliga kala peula, paila gala gagabila kaliga biyuwoli matauna.

²⁵Paila Debida ilivilibogwi paila matauna, kawala, ‘Omatagu tuta komwaidona lagisi Guyau, paila matauna katitaikina ogu kakata, mapaila gala goli bayega.

²⁶Baisa uula nanogu imwamwasila deli ulo biga ivakasau mwasawa. Mokwita yeigu tomota wala e igau bakaliga, mitaga gala baninayuwa, bapikwaku goli,

²⁷paila yoku gala bukusilavaigu wa Edesi,[15] e gala bukutugwalaigu, yeigu m towotetila tokimadagi, kidamwa baboda tumgeyai.

²⁸E yoku lokuvitulokaigu makadasina keda bilosi baisa omomova, e baisa bukuyomwasalaigu paila deli bitasivaduli.’

²⁹“Budagwa, ibodaigu bakamlili baisa yokomi bigala tubudaisi Debida. Matauna bogwa leikaliga e leibakwaisi[16] e baisa tuta kala laka eitotu omitadaisi.

³⁰Matauna taitala tovitoubobuta, deli bogwa inikoli Yaubada la biga katotila baisa matauna. E baisa makawala - Yaubada ikatotila mokwita binagi taitala tabula Debida igau bisiligalaguva e biguyau, makawala Debida.

³¹Debida igisibogwi avaka Yaubada igau bivagi, mapaila ikaibigibogwi paila Mesaia[17] la movavau, kawala, ‘Yoku gala lokusilavi matauna wa Edesi, e wowola gala leitumgeyai.’

³²Yaubada leitokowoi matauwena Yesu imovavau, mapaila yakamaisi komwaidomasi kala tosola paila vavagi baisa.

³³E Yesu bogwa leisiligalaguva baisa Yaubada ola kakata[18] deli Yaubada isaiki Baloma Tobumaboma baisa matauna makawala Tamala la biga katotila. Baisa tuta lokugisaisi deli lokulagaisi baisa la bobwailila leiligabu baisa yakamaisi.

³⁴Paila Debida titoulela gala bilaguva wa labuma; mitaga eikaibiga, kawala, ‘Matauna Guyau iluki ulo Guyau. kusili baisa ogu kwakata

³⁵igau bavigakaim bukukwalisuwoli matausina kam tilaula.’

³⁶“Mapaila komwaidodasi mina Isireli gala bitaninayuwasi, bitakatetasi mokwita kidamwa Yaubada bogwa leivigaki matauna Yesu Guyau deli Mesaia, matauwena goli lokukwatukorosaisi.”

³⁷E tutala tomota leilagaisi baisa, ikiuta ninasi sainela e ilukwaisi Pita deli sala aposetolo, kawasi, “Wi! Tuwamaiasʹo! Avaka bakavagaisi?”

³⁸Pita iluki matausina kawala, “Taitala taitala yokomi bukuninavilasi metoya omi mitugaga, e bukubapitaisasi oyagala Yesu Keriso, kidamwa biligaiwa mi mitugaga; e, bukubanaisi Yaubada la semakavi, baisa Baloma Tobumaboma.

³⁹Paila Yaubada bogwa leikatotila makawala baisa yokomi deli litumia, deli baisa komwaidosi tosikaduwonaku,[19] komwaidosi availa availa Guyau da Yaubadasi leididou bimakaiasi.”

⁴⁰Pita ikikamitabubula tuvaila e saina bidubadu biga ililivala baisa matausina, kawala, “Titoulemi bukukolaimi metoya okabomipuki igau bima baisa matausina tomitugaga.”

⁴¹E saina bidubadu matausina idubumaisi la biga e ibapitaisasi; e wa yam makwaiwena kasi boda ikatumkulovaisi kala bawa ikalawaisi lakatuluwotolu tomota.

⁴²E matausina ipwaitukulasi takutu baisa aposetolo deli ikikalubailasi, ikamkwamsi gulitinidesi,[20] e deli ininigadasi.

⁴³Baisa saina bidubadu vavagi siligaga deli kaboyowalula ikaloubusisi metoya oyumasi aposetolo, baisa uula komwaidosi ibulukukoli oninasi.

⁴⁴Komwaidosi todubumi ikommolaisi matausina e ikalubailisi, ivilabwailasi si guguwa baisa taitala taitala.

⁴⁵E si bubunela baisa makawala. Bigimolaisi si baleku deli si guguwa e komwaidona mapusi ivilabwailasi baisa komwaidosi, avaka bibodi wala kasi pilasi taitala taitala.

⁴⁶E yumyambwata matausina isigugulasi gulitinidesi wa Bwala Kwebumaboma. Deli isisigugulasi poulotala paila kamkwam osi bwala, kwaimanum ikamkwamsi deli si mwasawa.

⁴⁷Iiyakawolaisi Yaubada, deli tomota komwaidosi ikikamiabaisi matausina. E yumyambwata Guyau ikikatumkulovi kasi boda metoya baisa availa availa bogwa ikikatumovi goli.