Read Kilivila PILIPAI 2 Bible Online

PILIPAI 2 - Kilivila bible

PILIPAI 2

¹E kaina Keriso la vasosu ikatupewolaimi? Kaina la yebwaili bivisimolaimi? Ki, bukukwabikuwolaisi deli Baloma Tobumaboma? Ki, bukulumkolaisi mitakwai deli nokapisi paila taitala baisa taitala?

²Akatululutaimi paila bukuyomwasalaigusi bukunanamsasi makawala wala, bukuyebwailimi makawala wala, kami lumkola makawala wala, e komwaidomi bukuninitinidesisi goli.

³Taga kuvagaisi avai vavagi metoya mi kayapila, kaina paila uula magimi bukukwaluvalovasi. Mitaga bukumanumsi taitala baisa taitala, e tuta komwaidona bukudokaisi semia ikalisauwaimi wala.

⁴Deli bukuyamataisi avaka bipilasi taitala baisa taitala semia si kaisisu. Gala goli bukuyamataisi avaka bipilasi mi kaisisu titoulemi wala.

⁵Ibodi bukuyosisi ninami makawala Keriso Yesu nanola.

⁶E tuta komwaidona matauna Yesu eikuli Yaubada tomwaidona olumoulela titoulela. Mitaga matauna gala inanamsa biyosikikiti mwada biyovitavatasi sola Yaubada.

⁷Kaimapula, iligaiwa la kaisisu walakaiwa, e iligabu titoulela, e matauna imila towotetila. Matauna imila tomota, e ikaloubusi migila makawala tomota.

⁸Matauna iyominum titoulela, e ililoula okedala kabikaula makadana bilokaia okaliga, e la kaliga baisa wa korosi.

⁹E baisa uula Yaubada ilupi matauna mapilana odabala walakaiwa sainela, e idoki yagala igaveka ikalisuwoli avai yegila tuwoli tuwoli.

¹⁰Kidamwa komwaidosi bikamiabaisi Yesu yagala, komwaidosi mina labuma, deli mina watanawa, deli goli matausina ovalu watanawa osikowala.[6] Komwaidosi bikavaginasi,

¹¹deli bikamitulaisi mimilakatila kidamwa Yesu Keriso matauna Guyau, baisa kala yakaula Yaubada Tamadasi.

¹²Mapaila segwaia mina mbwailigu yokomi. Tuta komwaidona lokukwabikuwolaigusi tutala tasisuaisi deli. Mitaga baisa tuta goli kala siligaga baisa yokomi kukwabikuwolaigusi tutala asikaduwonaku metoya baisa yokomi. E bukuvigimkulovaisi mi katumova titoulemi, deli kami kokola e mi tatuva.

¹³Paila Yaubada tuta komwaidona ipupaisewa oninami, ivigakaimi totagwala deli tokwabikaula paila avaka magila.

¹⁴Bukuvagaisi vavagi komwaidona gala deli tamapu kaina deli kominimani.

¹⁵Kidamwa yokomi tobumaboma deli tomigileu bukusisuaisi baisa ovalu watanawa, yokomi goli Yaubada litula bwainigaga oluwalaisi toyodoudoga deli tommeikita. E ibodi bukuyuwoulasi[7] oluwalaisi matausina makawala utuyam ipipisisi walakaiwa,

¹⁶e bukutugwalaisi baisa matausina bigala momova. Kidamwa bukuvagaisi makawala, bogwa bisim uula bakamnomwana paila yokomi ola Yam[8] Keriso. Paila baisa bikimitali kidamwa komwaidona ulo wotetila deli ulo paisewa gala wala ayomadaigu.

¹⁷Kaina makateki goli buyavigu bibusi, e kaina makawala baligabu basemakavi omatala Yaubada, e bakatumkulovi mi dubumi la wotetila baisa matauna. E kidamwa makawala, yeigu bamwasawa e komwaidomi bukulumkolaisi ulo mwasawa.

¹⁸E makawala goli yokomi deli, ibodaimi bukumwasawasi, e yeigu balumkoli mi mwasawa.

¹⁹Apikwaku baisa Guyau Yesu kidamwa makateki gagabila bawitali Timoti[9] biwokaiami, kidamwa bulogami biyomwasalaigu.

²⁰Mesinaku matauna Timoti wala kala lumkola makawala agu lumkola. Matauna wala gagabila binanamsa avaka bibodaimi.

²¹Komwaidosi goli ininanamsasi paila titoulesi avaka iuvagaisi, e gala ininanamsasi paila uvagila Yesu Keriso.

²²Mapaila yokomi titoulemi kunikolaisi ammakawala mtona eikimitali kala bwaina. Paila matauna deli yeigu, makawala tau sola latula gulitinidesi kawotetila paila wala Bulogala Bwaina bisiniveka.

²³Mapaila apikwaku makateki bawitali matauna biwokaiami, igau goli avai tuta banikoli avai vavagi yeigu baboda.

²⁴Paila adubumi Guyau kidamwa yeigu titoulegu gagabila bananakwa bawokaiami.

²⁵E yeigu ladoki ibodi wala bawitali sodasi Epapiradaito[10] biwokaiami. E matauna eiwotetila deli eikabilia otaligu. E yokomi lokuvigakaisi matauna mi touwata e ipilasaigu.

²⁶E matauna saina magila bigisaimi komwaidomi e saina inokubukubu paila uula yokomi lokulagaisi kala katoula.

²⁷E mokwita eikatoula, e makateki bikaliga. Mitaga Yaubada bogwa inokapisi matauna, e gala inokapisi wala matauna mitaga yeigu tuvaila, mwada gala balumkoli nanogu kala mmayuyu sainela.

²⁸E yeigu asalau mwada bawitali matauna biwokaiami, kidamwa yokomi bukumwasawasi tuvaila avai tuta bukugisaisi matauna, e yeigu nanogu kala mmayuyu bitamwau wala.

²⁹E bukubodaisi matauna deli mi mwasawa, paila matauna sami metoya ola vasosu Guyau. Availa availa makawala matauna bukukwamiabaisi wala,

³⁰uula matauna ikasali titoulela la momova baisa katitaikina bikaliga, paila uula kala wotetila Keriso. Paila matauna magila wala bisakaigu pilasi makwaina avaka gala igagabila yokomi titoulemi bukusakaigusi.