Read Kilivila YOSUWA 15 Bible Online

YOSUWA 15 - Kilivila bible

YOSUWA 15

¹E baisa makawala livalela Yuda dalela eikauwaisi si valu. Valu mapilana iuvalutu wala ila opilibolimila okabulumwaisala viloupakala yagala Sini, okasi kaligei mina Edom.

²E kaligei makaina opilibolimila isakaula metoya Milaveta Pilamata opilibolimila,

³e iluvipeili metoya Akarabim Kadaula ila opilibolimila itobu mapilana Sini. Oluvi ila katitaikina mavilouna Kadesi Bania opilibolimila opapala Esironi itotu goli ila Adara, iuwovila isakauloki Kaka,

⁴e isaitaula wala ila Asimoni, e isai wala kaduyotala waya makaina mina Itipita kasi kaligei iuvalutu wala ila ikayabusi Bolita Kwaiveka, e baisa meitobu kaligei makaina. Baisa makawala kala gigisa Yuda kaligeila mapilana opilibolimila.

⁵Kaligei makaina opilibomatu baisa Milaveta Pilamata, iuvalutu goli ila oyeyuna Waya Yoridani. E metoya baisa kaligei makaina opiliyavata eivitouula;

⁶iuvalutu goli ila Beta Ogila, e isuwa opiliyavatela koya makwaina silisalili bilokaia Yoridani Itayatila. Oluvi isuwa wala ila makwaina Dakuna yagala Bowani (Bowani matauna taitala Rubeni latula).

⁷E metoya Pakula Itayatila goli ila Debira, e iuwovila isuwa opiliyavata ila Giligali, mavilouna matala eitovilaki Adummim Kadaula mapilana itayatila opilibolimila. Oluvi isaitaula wala ila Enisemesi outuwotula, e iuyeya wala ila Enirogeli,

⁸e metoya baisa isakauloki wala Itayatila Inom mapilana opilibolimila makwaina koya ambaisa mavilouna Yerusalem eititoki, mavilouna goli mina Yebusi si valu. Oluvi kaligei makaina isuwa wala imwena ila odubiliwotala makwaina koya opilikwaibwagela Itayatila Inom, mapilana okala vigimkovila Itayatila Repaim opiliyavatela.

⁹Metoya baisa isakaula isuwa ila mapilana Utuwotula Nepatowa e iuyeya wala ila ovalu mavilousina katitaikinela Koya Epironi. E metoya baisa iuwovila isuwa ila ikibuboti Baala (igiyuwela eididokaisi Kiriati Yearim).

¹⁰E baisa ikatukwaidoga wala isuwa opilikwaibwagela Baala iuyeya wala mapilana koyala Seira, isaitaula wala ila opiliyavatela wa Koya Yearim (igiyuwela eididokaisi Kesaloni), isaliliki ila Beti Semesi, e iligaim Timnai isaitaula goli.

¹¹E kaligei isuwa wala ila wa koya makwaina leitotu opiliyavatela Ekironi, iuwovila isuwa ila Sikeroni, iligaim Koya Baala, e isaitaula wala ila Yamnia. E ila wala ikayabusi Bolita Kwaiveka.

¹²E kaligei makaina opilikwaibwaga isakauloki wala lumata. E kaligei makaisina leitavina leitapatu baisa Yuda wala dalela si valu.

¹³Katupotala Yuda viluwela Yosuwa eisaiki Keleba matauna Yepunei latula metoya odalela Yuda, makawala goli Guyau leikaraiwogi Yosuwa. Matauna ikau la valu Ebironi, mavilouna la valu Aba matauna Anaki tamala.

¹⁴Keleba ibokavili matausina tubula Anaki isakaulasi isunapulasi metoya valu mavilouna, matausina dalesi Sesai, Aimani deli Talimai.

¹⁵E metoya baisa isaitaula ila mwada bikabilia deli tomotala Debira. (E valu mavilouna omitibogwa eidokaisi Kiriati Sepera.)

¹⁶E Keleba ikaibiga, kawala, “Ka, avai tau topeula biyouli mapilana Kiriati Sepera, bogwa batugwali latugu vivila Akasa bivaiya matauna.”

¹⁷E taitala Keleba bodala Kenasi latula yagala Otaniela, matauna iyouli mapilana valu, mapaila Keleba iyovaiya latula Akasa baisa matauna.

¹⁸Wa yam makwaina kasitaiyu ivaisi, Otaniela imnabi minana binigadi sitana pwaipwaia metoya baisa tamala. E minana itobusi metoya ola ase ikavagina omatala Keleba, e ikatupoi avaka magila.

¹⁹E minana ikaibiga kawala, “Magigu kwaivila agu utuwotu, paila pwaipwaia lokusakaigu isisu oviloupakala.” Mapaila Keleba isaiki minana makwaisina utuwotu walakaiwa deli otilawa.

²⁰Mapilana valu mina Yuda ikauwaisi si valu tatousi.

²¹Mavilousina si valu opilibolimila, mavilousina katitaikina kaligeila Edom, mavilousina Kabiseeli, Ederi, Yagura,

²²Kina, Dimona, Adada,

²³Kedesi, Asora, Itinani,

²⁴Sipa, Telem, Bealoti,

²⁵Asora Adata, Keriota Esironi, (igiyuwela Asora),

²⁶Amam, Sema, Molada,

²⁷Asari Gada, Esimoni, Betipeleti,

²⁸Asari Suwali, Biasiba, Bisiotia,

²⁹Baala, Iim, Esem,

³⁰Elitoladi, Kesili, Oma,

³¹Sikilagi, Madimana, Sanisana,

³²Lebawota, Silim, Aini deli Rimoni, komwaidona kasi bawa kwailuwoyu kwailima kwaivasi valu, deli goli mavilousina valu viloukikekita opapasi mavilousina.

³³Mavilousina wa koya osilisalili baisa Esitauli, Sora, Asina,

³⁴Sanewa, Eniganim, Tapuwa, Enam,

³⁵Yamti, Adulam, Sokou, Aseka,

³⁶Saaraim, Aditaim, Gedera deli Gederotaim, komwaidona kasi bawa kwailuwotala kwaivasi, deli goli mavilousina valu viloukikekita opapasi mavilousina.

³⁷E mimilisi tuvaila yagasi Senani, Adasa, Migidaligadi,

³⁸Dileani, Misipa, Yokiteeli,

³⁹Lakisi, Bosikata, Egiloni,

⁴⁰Kaboni, Lamam, Kitilisi,

⁴¹Gederoti, Betidagoni, Naama deli Makeda, komwaidona kasi bawa kwailuwotala kwailima kwaitala, deli goli mavilousina valu viloukikekita opapasi mavilousina.

⁴²E mimilisi tuvaila yagasi Libina, Eteri, Asani,

⁴³Ipita, Asina, Nesibi,

⁴⁴Keila, Akisibi, deli Maresa, komwaidona kasi bawa kwailima kwaivasi, deli goli mavilousina valu viloukikekita opapasi.

⁴⁵Tuvaila mapilana Ekironi viluwela opapasi vilouvakaveka deli viloukikekita,

⁴⁶deli goli komwaidona vilouvakaveka deli viloukikekita katitaikinela Asidodi, metoya Ekironi iuvalutu goli ila Bolita Kwaiveka.

⁴⁷Tuvaila mavilousina Asidodi deli Gasa, deli goli valu mavilousina vilouvakaveka deli viloukikekita eitodadelisi, iuvalutu eila wa waya makaduyona mina Itipita kasi kaligei e iuyeiya wala ila Bolita Kwaiveka olumata.

⁴⁸E mapilana wa koya valu mavilousina yagasi, Samira, Yatira, Sokou,

⁴⁹Dana, Kiriati Sepera (igiyuwela Debira),

⁵⁰Anabi, Esitemowa, Anim,

⁵¹Goseni, Oloni, deli Giloi. komwaidona kasi bawa kweluwotala kwaitala deli goli mavilousina viloukikekita opapasi mavilousina.

⁵²Tuvaila mavilousina Arebia, Duma, Esani,

⁵³Yanim, Beta Tapuwa, Apeka,

⁵⁴Umta, Ebironi, deli Siori; komwaidona valu mavilousina kasi bawa kwailima kwaivasi deli goli mavilousina viloukikekita opapasi mavilousina.

⁵⁵Tuvaila mavilousina Maoni, Kamela, Sipa, Yuta,

⁵⁶Yesireeli, Yokideyam, Sanowa,

⁵⁷Kaini, Gibia, deli Timnai. komwaidona valu mavilousina kasi bawa kweluwotala deli goli mavilousina viloukikekita opapasi mavilousina.

⁵⁸Tuvaila valu mavilousina Aluli, Betisuri, Gedori,

⁵⁹Maarata, Betanoti, deli Elitekoni. valu mavilousina kasi bawa kwailima kwaitala deli goli viloukikekita opapasi mavilousina.

⁶⁰Tuvaila valu mavilousina Kiriati Beali (igiyuwela Kiriati Yearim) deli Raba, valu vilouvakaveka kwaiyu wala, deli viloukikekita opapasi mavilousina.

⁶¹E mavilousina oviloupakala Beta Araba, Midini, Sekaka,

⁶²Nibisani, viluwela Yona, deli Enigedi. valu mavilousina kasi bawa kwailima kwaitala, deli viloukikekita opapasi mavilousina.

⁶³Mitaga tomotala Yuda gala wala gagabila bibokavilaisi mina Yebusi, leisisuaisi Yerusalem. Omitibogwa leima lagaila mina Yebusi leisisuaisi wala mapilana Yerusalem.