Read Kilivila YOSUWA 16 Bible Online

YOSUWA 16 - Kilivila bible

YOSUWA 16

¹Valu mapilana leisakaisi Yosepa dalela kaligeila makaina opilibolimila ivitouula metoya kwaitala kabulu Waya Yoridani katitaikinela Yeriko, opilibomatula outuwotula Yeriko, e ila oviloupakala. Metoya Yeriko imwena wa koya iuvalutu wala ila itobu Beteli.

²Metoya Beteli isuwa ila Lusi, e isaitaula ila Ataroti Adari, ambaisa mina Aka si valu.

³Oluvi iuwovila isuwa opilikwaibwaga ila osi valu mina Yapileti, iuvalutu ila mapilana Betorona Otalawa. E metoya baisa isaitaula wala ila Gesera e ila ikayabusi Bolita Kwaiveka.

⁴E tubula Yosepa, metoya dalesi Epereim deli Manasa opilikwaibwaga, iyosisi valu mapilana ivigakaisi si vavagi tatousi.

⁵Baisa makawala leisakaisi Epereim dalela si valu; matausina kasi kaligei ivitouula metoya Ataroti Adari e isuwa wala opilibomatu ila Betorona Walakaiwa,

⁶e metoya baisa isaitaula wala ila ikayabusi Bolita Kwaiveka. E mavilouna Mikametati eitotu opiliyavata. Metoya opilibomatu kaligei makaina iuwovila isakauloki Taanati Sailo, iligaim mavilouna opilibomatula isaitaula wala ila Yanowa.

⁷Metoya Yanowa isalili isuwa ila Atarota deli Naara, ila Yeriko e ila itobu Waya Yoridani.

⁸Kaligei makaina isuwa opilikwaibwaga e ila Tapuwa e isaitaula wala ila wa Waya Kana e iuyeiya wala ila ikayabusi Bolita Kwaiveka. Pwaipwaia makwaisina eisakaisi mabudosina dalela Epereim bivigakaisi si vavagi tatousi,

⁹deli mimilisi valu eitotusi olumoulela kaligeila mavilouna Manasa bogwa leisakaisi Epereim dalela.

¹⁰Mitaga matausina gala wala ibokavilaisi mina Kenani leisisuaisi Gesera, e mapaila matausina leisivagasisi wala deli mina Epereim omitibogwa leima lagaila, e ivigakaisi matausina si ula.