Read Kilivila YOSUWA 3 Bible Online

YOSUWA 3 - Kilivila bible

YOSUWA 3

¹E eiyam kaukwau Yosuwa deli komwaidona mina Isireli itokaiasi kaukwau pikekita e isilavaisi makwaina valu eisisikaisi mapilana Akakia e ilosi mapilana Waya Yoridani, e baisa ibudaisi valu igauga itulotulasi paila biluvapelasi.

²Kwaitolu yam iwokuva, matausina tokugwa isukwaisi si valu

³e ilulukwaisi tomota kawasi, “Ka, avai tuta bukugisaisi tolula bikauwaisi Guyau mi Yaubada la Kabutu Didawogala,[5] e bukusoguguwasi e bukubokulaisi matausina.

⁴Paila ka, gala sitana kuliloutalasi baisa, mapaila matausina bivitulokaimi keda e bitalosi. Mitaga gala bukulosi katitaikinela makwaina Kabutu Didawogala, mitaga bukuloulasi oluvi sitana miloutala.”

⁵Yosuwa iluki tomota kawala, “Kukikilaimi titoulemi, paila nabwaia Guyau bivagi mimilisi kabutuvatusi oluwalaimi.”

⁶Oluvi iluki tolula bikauwaisi Kabutu Didawogala e bikugwaiyaisi omitasi tomota. E ikabikaulasi.

⁷E Guyau iluki Yosuwa, kawala, “Baisa avaka bavagi yam lagaila bivigaki mina Isireli komwaidosi bivitouulasi bitemmalaimsi mwada yoku taitala toveka, e matausina bivitusaisi kidamwa yeigu asikailim, makawala goli lavigaki Mosese.

⁸Bukuluki tolula matausina eikokeulasi Kabutu Didawogala kidamwa avai tuta bisakailasi waya bivabusisi wala wa sopi e bitolisi opapala.”

⁹Oluvi Yosuwa iluki tomota kawala, “Kumaisi baisa e kulagaisi avaka Guyau da Yaubadasi bilukwaidasi.

¹⁰Ka, avai tuta bukusuvaisi kulumi, matauna bogwa wala eimati bilobogwa e bikatusunupuloi mina Kenani, mina Itai, mina Ibai, mina Peresi, mina Giragasa, mina Amora, deli mina Yebusi. E bukunikolaisi goli kidamwa Yaubada tomomova bogwa isisu oluwalaimi tuta makwaina Guyoula valu watanawa komwaidona la Kabutu Didawogala biluvapela Waya Yoridani e bikugwai omitami.

¹²Tuta baisa kunagaisi tailuwotala taiyu tauwau, makawala taitala metoya dala kwaitala kwaitala olopola Isireli.

¹³E tuta makwaina tolula matausina eikokeulasi Guyoula valu watanawa komwaidona la Kabutu Didawogala bisailisi kaikesi olumoulela sopi, e Waya Yoridani bogwa wala bisim tayelu, e sopi baisa eititayelu metoya okununa leimaima bogwa wala bikouguguli bila poulotala.”

¹⁴Bogwa la tuta tayoyuwa mapaila waya bogwa eikasewa sopi e ititayelu saina peula. Avai tuta tomota isilavaisi si kabosisu paila biluvapelasi Waya Yoridani, e matausina tolula ikugwasi wala omitasi tomota, deli ikikauwaisi Kabutu Didawogala. Tuta makwaina tolula ivitauwaisi kaikesi olumoulela waya,

¹⁶sopi bogwa wala isim tayelu e ikouguguli okununa mapilana valu yagala Adam okaipapala mapilana valu Saretana. E baisaga ititayelu eiloula Milaveta Pilamata ipakala wala e tomota gagabila biluvapelasi bilosi katitaikinela Yeriko.

¹⁷Igau tomota ililoulasi wala oitayatila biluvapelasi wa waya, e matausina tolula eikokeulasi Kabutu Didawogala itolisi oitayatila wala oluwalela Waya Yoridani. E itotusi wala avai tuta tomota komwaidosi ilosi piliyuwela.