Read Kilivila YOSUWA 5 Bible Online

YOSUWA 5 - Kilivila bible

YOSUWA 5

¹Komwaidosi guyousi mina Amora mapilana opilikwaibwaga mapilana Yoridani, tuvaila komwaidosi guyousi mina Kenani metoyasi mapilana Bolita Kwaiveka ilagaisi Guyau eivigaki sopi imada wa Waya Yoridani igauga komwaidosi mina Isireli eivalaguvasi, e matausina gweguya bogwa ikokolasi e si tuvaluwa itamwau paila wala mina Isireli.

²Oluvi Guyau iluki Yosuwa, kawala, “Kububuli kaivila memetu e kubobu tauwau[7] mina Isireli.”

³Mapaila Yosuwa ivagi makawala Guyau bogwa eikaraiwogi, ibobu tauwau mina Isireli makwaina valu yagala Koyala Bobu.

⁴Avai tuta mina Isireli eisilavaisi Itipita, komwaidosi tauwau tobobobu wala. Mitaga olopola kweluwovasi taitu tomota eiwowausi oviloupakala, e gala guditala pwapwawa tauwau ibobwaisi. Tuvaila, bogwa leima kala vigimkovila tuta matutona, e komwaidosi tauwau matausina kasi boda tokwabilia tutala eisilavaisi Itipita bogwa goli eikaligasi, paila eikoulovaisi Guyau. E makawala goli Guyau bogwa eikatotila saina peula, gala itagwala bigisaisi makubilana kubilumalala avaka bogwa eikatotila baisa tubusia omitibogwa.

⁷Litusia tokwabilia matausina gala wala eibobwaisi omitibogwa, e mauula matubona tubwa Yosuwa ibobu matausina.

⁸Avai tuta bobu bogwa leiwokuva, viloumwaidona wala isitotaulasi wala igauga ibwainasi kasi tatavi.

⁹E Guyau ikaibiga baisa Yosuwa, “Ka, lagaila bogwa lakau kami mmosila avai tuta lokuulasi mapilana Itipita.” Baisa uula idokaisi makatupona valu yagala Giligali,[8] e yegila maigana eikanuvagasi.

¹⁰Mina Isireli igau wala isisuaisi mapilana Giligali okabayatila katitaikinela Yeriko, e tubukona minana wala kala yam kweluwotala kwaivasi koyavila ivagaisi Luvapela Pakala.

¹¹Eiyam eivitouulasi kamkwam kalagila Kenani baisa kwegubugabu waituna deli beredi gala deli kala yisi.

¹²E mana gala tuvaila ididebwali, e mina Isireli gala tuvaila ibanaisi. Metoya makwaina tuta ikamsi kalagila Kenani.

¹³Avai tuta Yosuwa bogwa eivakatitaikina Yeriko, e nanakwa igisi taitala tau itotu omatala, e kaitala puluta oyamala eiyosi. Yosuwa ilokaia matauna e ikatupoi, kawala, “Availa yoku? Taitala ma tokwabiliasi, kaina yoku taitala tilaula?”

¹⁴Tau matauna ikaibiga, kawala, “Gala. Mitaga yeigu lasisu baisa paila Guyau la tokwabilia si kumatoula yeigu.” Yosuwa ikapusi opwaipwaia itemmali, e ilivala, kawala, “Yeigu m touwata. Avaka magim bavagi?”

¹⁵E matauna Guyau la tokwabilia si kumatoula iluki matauna, “Kuvilili katubukolela kaikem kuligaim. Paila makwaina pwaipwaia lokutitoki kwebumaboma.” E Yosuwa ivagi makawala kala karaiwaga.