Read Kilivila 1 TIMOTI 3 Bible Online

1 TIMOTI 3 - Kilivila bible

1 TIMOTI 3

¹Biga baisa bigala goli mokwita[8] - kidamwa avai tau iiyamwasi mwada igau bikau tokugwa ekalesia la guyau, matauna magila la wotetila saina kwevakaigaga.

²Paila tokugwa ekalesia ibodi gala bisim pikolela wowola. Gala ibodi bivilayawa,[9] bikudibwaila, gala tokwatudewa matauna, e bininatala; ibodi bivakawoli mitawasi ola valu; ibodi bikabitutuki vituloki;

³gala ibodi matauna tomom waini kaipeula, kaina tokominimani; mitaga tomanum deli tobigabwaila. Gala ibodi biyebwaili mani.

⁴Ibodi la bwala tatoula kala tosisu biyamati bwaina, deli litula bikabikuwolaisi deli bikamiabaisi matauna.

⁵Paila kidamwa matauna gala ikikateta ammakawala biyamati availa availa matausina eivauli bibwaina, e ammakawala matauna bivigaki kidamwa biyamati la ekalesia Yaubada?

⁶Gala ibodi bukunagaisi availa toekalesia tovau kaina igau bikaiveka nanola deli biyouloveka la kaluvalova e biboda kala kamwaga, makawala goli Diabolo.

⁷E ibodi bukunagaisi avai tau tosipayumila ikikamiabaisi mwada taga biboda kala kalawou e biwai okala sikula Diabolo.

⁸Makawala goli ekalesia kala towotetila deli, ibodi matausina bibubunasi bwainawokuva kidamwa kasi vatusi bimilakatila; gala bibodi matausina bimomsi waini sainela, kaina bigugovekasi.

⁹Ibodi matausina bikatetasi uvagila tapwaroru kwemomwau deli ninasi kala mimilakatila.

¹⁰Ikugwa ibodi bukuwakolaisi, e kidamwa bogwa bipeulasi, bwaina wala ibodi biwotetilasi.

¹¹E ekalesia kala towotetila si kukova[10] deli, ibodi bibubunasi bwaina, e taga bisilapulusi; ibodi tuvaila avaka avaka bivagaisi, gala nakatudewa, e nakamokwita minasina.

¹²E ekalesia kala towotetila gala ibodi bivilayawa,[11] e gagabila biyamati litula deli la ula bibwaina.

¹³E towotetila matausina, availa availa itobwabwailasi bogwa bitomatalasi deli gagabila bilivalasi tuvaluwa, paila dubumi makwaina avaka talumkolaisi okala vasosu Keriso Yesu.

¹⁴Baisa tuta laginigini miyana m leta, e lapikwakwaim makateki bawokaiam kidamwa deli bitakayakusi.

¹⁵Mitaga kaina bayobali. E kidamwa makawala, miyana leta biyoluluwaiyaim avaka avaka bibodaidasi yakidasi Yaubada la tomota. E boda makwaina bitadokaisi Yaubada Tomomova la ekalesia; e mabudona ekalesia baisa biga kwekamokwita kala kokola deli kala kalidaga.

¹⁶E gala availa bininayuwa, da tapwarorusi uvagila kwemomwau kala katupwana saina vakaigaga. Matauna imili tomota, Baloma Tobumaboma ivitububoti kala duwosisia, e anelosi igigisaisi matauna. Tomota ikamitulaisi matauna oluwalaisi mina watanawa, tolesi watanawa idubumaisi matauna, e ila walakaiwa wa labuma.