Read Kilivila 2 TIMOTI 4 Bible Online

2 TIMOTI 4 - Kilivila bible

2 TIMOTI 4

¹E mwa! Omatala Yaubada deli Keriso Yesu adidouwaim. Paila matauna kada toyakalasi komwaidodasi mina watanawa tommomova deli tomata, e matauna igau bima biguyoi baisa ovalu watanawa. E omatala matauwena amnabaim

²mwada bukukwamituli Bulogala Bwaina. E bukusalau makwaina kamatula kaina isim tutala kaina gala, paila toninayuwa bukuvigaki bininatalasi paila mabigana. Mapaila bukupwadeda; kukwatululuti matausina; e metoya om peuloki sainela bukuuvituloki.

³Paila igau tuta makwaina bima tomota gala bilagaisi vituloki kwekamokwita, mitaga itobudokaisi avai vituloki eikau ninasi. E saina binainevisi tovituloki tuwoli tuwoli paila avai vituloki bogwa ituliki taigasi iligalegasi.

⁴E bogwa bitotubulokaisi kwekamokwita gala bilagaisi, mitaga bibokulaisi avai liliu avai liliu.

⁵Mitaga yoku ibodaim bukukikilaim tuta komwaidona. Kaina bukuboda mmayuyu, desi wala kupeuloki; e bukuvagi kala paisewa tokamatula Bulogala Bwaina. E bukuvigimkulovi komwaidona avaka bibodaim bukuvagi, paila yoku la towotetila Yaubada.

⁶E yeigu, ammakawagu? Makateki baligabwaigu baisa okaliga, paila ulo tuta bogwa leima basilavi valu watanawa.

⁷Bogwa lavigibau kala uvalaku Yaubada, lasakawoli komwaidona la douligavi, e layamati uvagila tapwaroru.[10]

⁸E bogwa latomgwaga, mapaila tuta baisa babodi agu mapu baisa agu butia paila bubunela duwosisia, igau matauna Guyau kada toyakalasi toduwosisia bisakaigu yam makwaiwena. E gala goli yeigu wala bisakaigu, mitaga bisakaidasi komwaidodasi availa availa tombwailidasi Guyau tatutulaisi matauna igau avai tuta biyoumatila.

⁹Kuvigimamalu nani kumakaiagu.

¹⁰E Dimasi[11] bogwa isilavaigu leila Tesalonaika, paila saina mbwailila uvagila valu watanawa. Keresikeni leila Galetia deli Taito[12] leila Dalimatia.

¹¹Luka wala kalamwaguta kamataiyu lakasisu. E kuvakouli Maka kumai, paila matauna gagabila bipilasi da paisewa.

¹²Taikiko lawitali leila Epeso.

¹³Kidamwa avai tuta bukuma, e kumai agu kwakapula, miyana laligaiwa mapilana Tiroasa baisa matauna Kapo. E tuvaila kumai mpasi buki, mitaga saina magigu mapilasina pilaminibwaita.

¹⁴Alekisana tobubuli tanumnumta iyogagaigu saina vakaigaga; mitaga desi wala Guyau bogwa biyuwoli yamala matauna.

¹⁵Yoku goli deli bukuyamataim paila matauna, paila matauna togigasisi iyogagi da kamatulasi paila Bulogala Bwaina.

¹⁶E tuta matutona kabovitouula ulo yakala, gala availa itokailigu tuta makwaina. Gala taitala ipilasaigu; komwaidosi wala ibutusi. Ulo nigada baisa Yaubada taga bikau lugwagu.

¹⁷Mitaga Guyau isikailigu bogwa isakaigu peula mapaila bogwa gagabila wala bakamituli Bulogala Bwaina komwaidona baisa matausina gala mina Yudia, e komwaidosi iligalegasi. E Guyau ikolaigu metoya owodola laiyoni.

¹⁸E deli Guyau bikolaigu metoya vavagi gaga komwaidona, bilauwaigu oKaraiwogala labuma kidamwa basibwabwaila. E bitasakaisi matauna kala yakaula metoya tuta baisa e tuta gala kala vigimkovila. Emeni.

¹⁹Awitali kasi biga bobwailila kasitaiyu Pirisila sola Akila, e deli matausina Onesiporo la ula.

²⁰Mtona Erasito eisigaga mapilana Korinita e lasilavi matauna Tiropimo isisu wala mapilana Mileto paila uula tokwatoula matauna.

²¹Bukuvigimamalu kumakaiagu igau gala bikaloubusi kweluvala tula.[13] E matausina sedaiasi Yubulo, Pudenisi, Lino deli Kolodia iwitalaisi kam biga bobwailila, e deli goli komwaidosi sedaiasi.

²²E ulo nigada baisa Guyau kidamwa bisikailim onanom. Yaubada bimitukwaiyaimi komwaidomi.