Read Kilivila TAITO 3 Bible Online

TAITO 3 - Kilivila bible

TAITO 3

¹E kukwatululuti m tomota bikamiabaisi deli bikabikuwolaisi si gweguya deli kasi tokwaraiwaga, deli bitagwalasi paila bivagaisi vavagi bwaina komwaidona.

²Kuluki matausina taga bibigigagaisi sesia, mitaga biveyawasi bisibwabwailasi, kidamwa biyomitalaisi bubunela manum baisa tomota komwaidosi.

³Paila omitibogwa yakidasi toninagowa tokowolova tosulosula. Paila isipulokaidasi kala bubunela komwaidona valu watanawa. Oda tutasi komwaidona tobigautu deli topugipogi yakidasi. Mapaila ninadaisi igaga taitala baisa taitala.

⁴Mitaga avai tuta Yaubada kada Tokwalasi la mitakwai deli la yebwaili iyoulapulasi,

⁵ikatumovaidasi. Gala goli ikatumovaidasi paila uula tavagaisi avai vavagi bwaina, mitaga uulotoula la nokapisi, e mapaila ikatumovaidasi. Paila iwinisauwaidasi,[5] e metoya ola winisewa Baloma Tobumaboma ivigivauwaidasi, takaloubusivausi baisa momova kwaivau.

⁶Paila Yaubada ivigibau bogwa iligabu Baloma Tobumaboma baisa yakidasi metoya baisa Yesu Keriso kada Tokwalasi.

⁷Makawala goli Yesu eimitukwaiyaidasi, kidamwa Yaubada bikabwailidasi, e bisakaidasi momova kwekanigaga, makwaina goli tapikwakwaisi.

⁸Baisaga biga mokwita. Magigu vavagi makwaisina saina peula bukuvituloki tuta tuta. Paila ibodi matausina kala todubumi Yaubada bisalausi kidamwa bivagaisi vavagi bwaina tuta komwaidona. Ka, vavagi makwaisina goli bwaina e bipilasaisi tomota.

⁹Mitaga bukupaiki tobubeikam si kominimani gaga, kasi liliu tubusia,[6] vatai, e deli kominimani paila mina Yudia si Karaiwaga.[7] Paila makwaisina vavagi gala bipilasaisi tomota, e gala avaka dimlesi.

¹⁰Kidamwa taitala isisu totavilevi boda, ibodi sivayu bukubuyoyu matauna, e oluvi bukuligaiwa matauna.

¹¹Paila bogwa kunikoli tau matauna tau gaga, e la mitugaga ikibuboti kidamwa bogwa eisula.

¹²Avai tuta bawitali Atemasa kaina Taikiko biwokaiam, kuyomamalu bukumakaiagu mapilana Nikopoli; paila bogwa lanagi basisu baisa okweluvala tula.

¹³Bukuyomamalu bukupilasi Sinasi matauna tokabitam paila karaiwaga, deli Apolo, kidamwa bivitouulasi si kwaidadina. E kumitakavati matausina kidamwa bogwa iyosisi avaka ibodi matausina bubwaiasi.

¹⁴E ibodi da tomotasi binevisi ammakawala bivagaisi vavagi bwaina osi tuta komwaidona, e kidamwa bisakaisi sesia avaka bibudoki si kaisisu. Gala goli bibodi bivigimakavaisi avaka avaka.

¹⁵Komwaidosi segwaia iwitalaisi kam biga bobwailila. Kuluki ma bigasi bobwailila baisa sedaiasi todubumi. Yaubada la mitakwai bisikailimi komwaidomi.