Read Kilivila IBERU 1 Bible Online

IBERU 1 - Kilivila bible

IBERU 1

¹Omitibogwa, tuta bidubadu Yaubada ililivala baisa tubudoiasi[1] wa keda tuwoli tuwoli metoya oudosi tovitoubobuta.[2]

²Mitaga tuta makwaina, yam kala vigimkovila[3] goli, leilivala baisa yakidasi metoya baisa Latula. Yaubada leibubuli valu valu komwaidona metoya oyamala Latula, e matauwena goli Yaubada leinagi biyosi vavagi komwaidona tovana valu okala vigimkovila.

³Matauna visigala kala guyugwayu[4] e baisa Yaubada la guyugwayu. Kidamwa bitagisi matauna, tomwaidona goli makawala Yaubada. E valu valu komwaidona walakaiwa deli watanawa ikikatupewoli metoya ola biga kwepeuligaga. Igau bogwa eikatumigileu tomitugaga, isili wa labuma ola kakata[5] Yaubada Topeuligaga.

⁴Matauna Yaubada Latula ikalisuwoli anelosi, e makawala goli maigana[6] avaka Yaubada isaiki matauna ikalisuwoli anelosi yagasi.

⁵Paila gala kwaitala tuta Yaubada ikalatula baisa taitala la anelosi, kawala, “Yokula Latugu. Yam lagaila lamili Tamam.” E gala ilivala paila avai anelosi, kawala, “Yeigu bamili Tamala, e matauna bimili Latugu.”

⁶Igau makateki tuta makwaina Yaubada biwitali Latula molitomoya[7] bima baisa ovalu watanawa, ikaibiga, kawala, “Ibodi Yaubada la anelosi komwaidosi bikavaginasi baisa matauna.”

⁷Baisa goli Yaubada leikaibiga paila matausina anelosi, kawala, “Yaubada eivigaki la anelosi bimila yagilasi, e la towotetila ivigaki bimila kovasi bilululusi.”

⁸Mitaga baisa leikaibiga paila Latula, kawala, “Mwa, yoku Yaubada m takaikaia bikanigaga wala. Bukukwaraiwaga om kwabokwaraiwaga deli nona duwosisia.

⁹Kuyebwaili avaka duwosisia, e kukoulovi avaka doudoga. Baisa uula Yaubada, m Yaubada goli, inagaim; e mauula bimwamwasila nanom, kam naga bikikalisuwoli kasi naga samwa.”

¹⁰E tuvaila ikaibiga, kawala, “E Guyau, ikugwa yoku kububuli valu watanawa, deli oyamam kububuli valu walakaiwa.

¹¹Valu komwaidona baisa bitamwau, mitaga yoku bukusivagasi. Komwaidona goli bipwasa makawala moi kala pwasa.

¹²Bukukwatubili valu makawala mokanunuva, e valu komwaidona bidavila makawala moi kala katupwa. Mitaga yoku gala makawala, paila tosivagasi yoku, e kam tuta gala kala vigimkovila.”

¹³Gala kwaitala tuta Yaubada ikaibiga baisa taitala la anelosi, kawala, “Kusili baisa ogu kakata,[8] igau bavigakaim bukukwalisuwoli matausina kam tilaula.”

¹⁴E ammakawala anelosi? Matausina komwaidosi goli baloma iuwotetilasi baisa Yaubada; e Yaubada biuwitali la anelosi kidamwa bipilasaisi matausina availa availa bibodaisi katumova.