Read Kilivila IBERU 2 Bible Online

IBERU 2 - Kilivila bible

IBERU 2

¹E baisa uula ibodaidasi saina bitayosikikitaisi mabigasina biga kwekamokwita avaka bogwa talagaisi. Gala bibodi avai vavagi biwovilaidasi metoya baisa.

²Mina watanawa eibanaisi kidamwa vavagi makwaisina avaka anelosi eikamitulaisi[9] baisa kamatula kwekamokwita, e kidamwa availa gala ibokuli kaina ikabikuwoli, bogwa eibani kala mapu mipuki.

³E ammakawala bitavigaki paila bitasakaula kidamwa bitasilavi kwevakaigaga kada katumova? Guyau tatoula wala ikamitulibogwi katumova makwaina e matausina bogwa leilagaisi goli ikamokwitasi makwaina katumova baisa yakidasi.

⁴Makawala goli Yaubada ikatumkulovi si silasola iyomitali la kamatula metoya ola kabutuvatusi deli kaboyowalula deli bidubadu vavagi siligaga. E tuvaila ipati peula makwaisina avaka Baloma Tobumaboma isisaiki tomota, e ipitapata goli makawala nanola.

⁵Paila igau gala bibubuli valu watanawa Yaubada gala ivigaki anelosi kidamwa bikaraiwogaisi makwaina valu. Paila makwaiwena goli valu leitalilivalaisi.

⁶Baisa makawala taitala ikikamituli Buki Pilabumaboma olopola kawala, “Mwa, Yaubada! Yoku kuninamsi mina watanawa e ammakawasi matausina? Yoku goli kuyamati matausina, e ammakawasi mina watanawa?

⁷Paila tuta pikekita[10] lokuvabu matausina kabasi osikowasi anelosi, e bogwa kusaiki matausina kasi yakaula deli kasi taimamila bivigakaisi kasi kulupaipi.

⁸E lokuvigaki matausina bikaraiwogaisi vavagi komwaidona.” Buki Pilabumaboma kala ginigini kidamwa Yaubada leivigaki tomota “kidamwa bikaraiwogaisi vavagi komwaidona”. E metoya baisa bitanikoli kidamwa tomota bikaraiwagasi paila vavagi komwaidona ambaisa ambaisa. Mitaga gala goli tagisaisi tomota ikikaraiwogaisi vavagi komwaidona tuta baisa.

⁹E mitaga baisa tuta gagabila bitagisaisi Yesu. Paila tuta pikekita Yaubada eivabu matauna osikowasi anelosi, kidamwa bikaliga paila tomota komwaidosi. Baisa iyomitali Yaubada la mitakwai. E mauula tuta baisa bitagisaisi matauna Yesu isikam kala kulupaipi baisa kala yakaula deli kala taimamila.

¹⁰E Yaubada ibubuli deli iiyamati vavagi komwaidona. Mapaila ikwani wala Yaubada titoulela bikabwaili Yesu, paila ibodi mmayuyu e gala isim la sula. Mapaila Yaubada gagabila bimai bidubadu litula[11] kidamwa bipataisi Yesu kala kalugologusa. Paila Yesu goli bivakadi tomota bibanaisi katumova.

¹¹Paila matauna ikatumigileu tomota metoya osi mitugaga. E mapaila matauna Yesu deli matausina eikatumigileu komwaidosi goli Tamasi taitala wala. Baisa uula Yesu gala immosila paila ikabodala baisa matausina.

¹²Makawala leilivala, kawala, “Mwa, Yaubada! Balivala paila yoku baisa budagwa. Kam yakaula bawosi omitasi baisa mabudona.”

¹³Tuvaila matauna eikaibiga, kawala, “Yeigu badubumi baisa Yaubada.” Deli goli matauna eikaibiga, kawala, “Ka, yeigu deli litugwa matausina Yaubada bogwa isakaigu.”

¹⁴E matausina availa availa leidoki litula tomota wala. Baisa uula Yesu titoulela imili tomota e ivigaki guma watanawa. E ivagi makawala kidamwa bikaliga, e metoya ola kaliga bikatudidaimi Diabolo. Paila matauna Diabolo ikikaraiwogi kaliga.

¹⁵E mapaila Yesu bitaneku matausina availa isim kasi katupipi, paila matausina ikukolaisi kaliga tuta komwaidona goli.

¹⁶Ka, baisa saina mimilakatila, gala eivagi baisa mwada bipilasi matausina anelosi. Mitaga makawala Buki Pilabumaboma[12] kala ginigini isisu, “Eipilasi matausina Eberaam tubula.”

¹⁷Metoya baisa bitagisi kidamwa ibodi wala bimili tomota mokwita makawala budala.[13] Paila matauna Yesu si tolula toveka,[14] la bubunela saina madagi, deli goli la nokapisi. E makawala gagabila bivigibau la wotetila baisa Yaubada, kidamwa bogwa biligaiwa tomota si mitugaga.

¹⁸E baisa tuta gagabila bipilasi matausina eibodasi kasi tamnabi, uula paila titoulela bogwa leilumkoli tamnabi deli mmayuyu.