Read Kilivila IBERU 3 Bible Online

IBERU 3 - Kilivila bible

IBERU 3

¹E segwaia mina bumaboma. Yokomi kami dou bogwa kubanaisi metoya baisa Yaubada. E bukumitakavataisi availa matauna Yaubada leiwitali, da tapwarorusi kala Tolula Toveka,[15] matauwena goli Yesu.

²Matauna iwotetila saina madagi baisa Yaubada, paila leinagi matauna biwotetila makawala. Makawala goli Mosese iwotetila saina madagi olopola Yaubada la bwala.[16]

³Ka, taitala tokwaliai bwala ibodi bisim kala kamaiaba sainela, mitaga bwala makwaina kala kamaiaba sitana wala. Makawala goli, matauna Yesu ibodi bisim kala yakaula sainela, mitaga Mosese sitana wala.

⁴Bwala kwaitala kwaitala isim kala tokaliai. Mitaga Yaubada wala kala tokwaliai vavagi komwaidona.

⁵Mosese saina madagi iwotetila olopola Yaubada la bwala. E uula towotetila matauna eililivala paila vavagi makwaisina Yaubada bilivala igau tuta bima.

⁶Mitaga Keriso saina madagi iwotetila paila matauna Guyoula Yaubada la bwala. E uula matauna Yaubada Latula. E Yaubada la bwala baisa goli yakidasi, kidamwa deli da tuvaluwasi da salausi paila da kabopikwakusi.[17]

⁷Makawala goli Baloma Tobumaboma eikaibiga, kawala, “Kidamwa lagaila bukulagaisi Yaubada kaigala,

⁸taga kukwatukubonasi, makawala tuta makwaina tubumia eikwatumwalaisi Yaubada. Makawala yam makwaina oviloupakala mwada biwakolaisi matauna.

⁹Mapilana valu, tubumia iwakolaigusi mwada bitamnabaigusi, ilagoli kweluwovasi taitu eigisaisi avaka lauvagi.

¹⁰E mauula imwau nanogu baisa tomota matausina. E kawagu, ‘Tuta tuta isulosulasi metoya oninasi, deli goli ulo kidakeda gala kwaitala tuta itapuloki ninasi.’

¹¹Lalivala ulo biga katotila metoya ogu ninamwau, kawagu, ‘Gala kwaitala tuta bisuvisi ogu kwabovaiwasi.’”

¹²E segwaia, kuyamataimi kidamwa gala taitala yokomi nanola gaga deli tokowolova, mapaila kaina bitotubuloki Yaubada matauna Tomomova.

¹³Buki Pilabumaboma kala ginigini isisu kawala “lagaila”, e baisa kala katumiki, “yamla katumova”. Mapaila taitala baisa taitala bukukwatulututaimi yam yam, e avai yam goli ibodi bitadokaisi yamla katumova. Mwada gala taitala baisa yokomi tokwatukubona uula mitugaga nanola eisipuloki.

¹⁴Bukululuwaisi tuta makwaina tavitouulasi tadubumaisi Keriso, gala taninayuwasi paila matauna. E deli Keriso bitasibwabwailasi kidamwa da dubumaisi makwaina bitayosikikitaisi bila okala vigimkovila.

¹⁵Makawala goli Buki Pilabumaboma kala ginigini, “Kidamwa lagaila bukulagaisi Yaubada kaigala, taga bukukwatukubonasi, makawala tuta makwaina lokukwatumwalaisi Yaubada.”

¹⁶Availaga tuta makwaina ilagaisi Yaubada kaigala e ikatumwalaisi?

¹⁷Baisa matausina isilavaisi Itipita deli goli kasi tokugwa Mosese. E Yaubada nanola imwau kweluwovasi taitu paila mimilisi tomota. Ki, availaga matausina? Matauna nanola imwau baisa matausina eimitugagasi e ikaligasi mapilana oviloupakala.

¹⁸E tutala Yaubada eilivala la biga katotila, kawala, “Gala kwaitala tuta bisuvisi ogu kwabovaiwasi” - e, availaga iluluki? Ka, iluluki matausina eikatumwalaisi Yaubada.

¹⁹E, tavitusaisi gala wala gagabila bisuvisi mapilana[18] paila gala si dubumi.