Read Kilivila TOKWARAIWAGA 17 Bible Online

TOKWARAIWAGA 17 - Kilivila bible

TOKWARAIWAGA 17

¹Isisu taitala tau yagala Maika. Matauna mesisiki wa koya mapilana Epereim.

²Matauna iluki inala kawala, “Avai tuta taitala tomota eiveilau makwaisina lakatuluwotala lakatutala siliba metoya baisa yoku, e yoku lokubuloti matauna toveilau. Yeigu lanakaigalaim kuvagi makawala. Ka, mani magulona laiyosi. Mayeigula lakau magulona.” E inala ikaibiga kawala, “Latugu, ibodi Guyau bimitukwaiyaim!”

³Mapaila matauna ikaimilivau magulona isaiki inala, e inala ikaibiga kawala, “Ibodi bakatotila mokwita bakabomi mani magulona paila Guyau, e taga bolata makwaina bikapilaki latugu. Magulona bivigaki kala katububula natana tokolu kai. Mapaila baisa tuta yeigu bakamilivau siliba magulona baisa yoku.”

⁴E oluvi matauna ikaimilivau isaiki inala. E minana ikau lakatuyu siliba iuyoki taitala tanumnumta topaisewala, e matauna ilaleya natana tokolu metoya wa kai itaki, e siliba baisa ikatububuli namwaidona iwokuva. E ilauwaisi ivitauwaisi ola bwala Maika.

⁵E matoulela Maika isim la kabotapwaroru titoulela. Matauna iyouduli mimilisi tokolu deli yatala epodi e inagi taitala latula tau ivigaki la tolula.

⁶Wa tuta matutona Isireli gala wala guyoula, mapaila tomota ivavagisi wala avaka ititaki ninasi titoulesi.

⁷E wa tuta matutona wala taitala totubovau guma Libai mesisiki Bedeliem mapilana Yuda.

⁸Matauna isilavi Bedeliem ila binevi vilouvau valu paila bisili. Matauna ililoula, e iviloubusi Maika ola bwala wa koya mapilana Epereim.

⁹Maika ikatupoi matauna kawala, “Ambaisa tolem?” Matauna ivitakauloki kawala, “Yeigu guma Libai tolegu Bedeliem mapilana Yuda. Yeigu lanainevi valu paila basili.”

¹⁰Maika ikaibiga kawala, “Kuma tasim. Yoku bukuvagi ulo tokatayuvisa deli ulo tolula, e taitu kwaitala kwaitala yeigu bamapwaim kweluwotala siliba, e mimilisi karekwa deli kʹam.”

¹¹E totubovau guma Libai ikabwaili paila bisikaim Maika, e isisu kala lumkola makawala latula goli.

¹²Maika ivigaki matauna la tolula, e matauna isivagasi wala Maika ola bwala.

¹³E Maika ikaibiga kawala, “Ka, baisa tuta bogwa layosi guma Libai ulo tolula, e mapaila anikoli Guyau bikabwailigu.”