Read Kilivila TOKWARAIWAGA 5 Bible Online

TOKWARAIWAGA 5 - Kilivila bible

TOKWARAIWAGA 5

¹E yam makwaina Debora sola Baraki, matauna Abinowam latula, pilatala kasi wosi iwosisi.

²Kala yakaula Guyau. Matausina mina Isireli bogwa ininatotilasi kidamwa bikabiliasi. Tomota itugwalaisi titoulesi deli si mwasawa.

³Kulagaisi, yokomi gweguya. Kunakaigalaigusi yokomi tokwaraiwaga. Yeigu bawosi, deli bawai gita baisa Isireli si Yaubada, matauna wala Guyau.

⁴Mwa Guyau! Avai tuta yoku kusilavi makwaisina koya mapilana Seiri, e avai tuta yoku kusilavi mapilana Edom, e pwaipwaia ilikuliku deli ikuna metoya wa labuma. E mitaga, sopi eikapusi metoya wala olowalowa.

⁵E koya eilikuliku omatala Guyoula Sinai, e omatala Guyau, mina Isireli si Yaubada.

⁶Ola tuta Samga, matauna Anati latula, e ola tuta Yaela, togigimwala deli si mauna minasina ikokeulasi si guguwa gala tuvaila biluvipeilisi mapilana valu. Mitaga tokaidadina isumwaisi wala okadavapwala.

⁷Ve, Debora! Viluwela Isireli iviloububu wala eitotusi, mavilousina eititomakavasi wala vilouukuwokuva kileta yoku lokuma, e yoku makawala natana mina Isireli inasi.

⁸E tuta matutona kabilia eitokaia valu mapilana, avai tuta mina Isireli inagaisi nauwovau si yaubada. E matausina mina Isireli kasi bawa tauwau 40,000. Ki, availaga matausina eikokeulasi vayoula kaina kaiyala?

⁹Nanogu komwaidona isisu deli mina Isireli si kumatoula, deli goli matausina eitugwalaisi titoulesi paila kabilia deli si mwasawa. Kala yakaula Guyau!

¹⁰E tauwau, yokomi lokusisilaisi ase napupwakau otupwasi okabosisula lokusisilaisi, e kulilivalasi paila baisa, deli goli yokomi toloula, bukulivalasi makawala.

¹¹E ka! Kunakaigali tobobawa si mogega ititogugulasi outuwotu, e ililivalasi paila Guyau saina totomgwaga, deli goli paila mina Isireli eitomgwagasi. Oluvi Guyau la tomota ivautuutusi wala isunapulasi metoya osi valu.

¹²Ve! Kukwalimitali. E Debora, kukwalimitali. Kuvitau wosi, e deli wosim kukugwai! Mwa! Baraki, yoku Abinowam latula, kuvasali kaikem, e kuvakumgwai tokatupipi bukulau.

¹³E oluvi matausina tokamaiaba ibusisi imakaiasi baisa kasi tokugwa. Guyau la tomota imakaiasi matauna deli ikatubaiasasi paila kabilia.

¹⁴Matausina leimaisi metoyasi Epereim e isuvisi oitayatila otuboulosi dala Beniamina deli la tomota. Kumatoula ibusisi imaisi metoya Makira, e tokwabilia tovakaveka ibusisi metoyasi Sebuloni.

¹⁵E kala tokugwa Isaka imaisi deli Debora. E Isaka ima deli goli Baraki, e ibokulaisi matauna ilosi oitayatila. Mitaga Rubeni dalela ikovaisi, e gala bitobu ninasi kaina bimaisi.

¹⁶Avaka paila eisiwaisi deli si sipi? Ki, paila uula bilagaisi toyamata sipi ididouwaisi mayuwosina? Mokwita goli, Rubeni dalela ikovaisi, e gala bitobu ninasi kaina bimaisi.

¹⁷Gada dalela isisuaisi opilibomatu mapilana Waya Yoridani. E Dani dalela isikuvatasi wala osi waga. Asera dalela isisuaisi olumata, e matausina isikuvatasi wala okawolawa.

¹⁸Mitaga Sebuloni deli Napitalai dalesi ikasalaisi si momova metoya okawakali.

¹⁹Mapilana Taanaki katitaikinela wa Waya Megido gweguya leimaisi ikabiliasi. E guyoula Kenani deli wala ikabiliasi, mitaga matausina gala wala ikauwaisi avai siliba.

²⁰Minasina utuyam ikikabiliasi metoya wa labuma, e tutala ititopelasi walakaiwa minasina ikikabiliasi deli matauna Sisera.

²¹Kisoni dadoyala eidumyelu matausina ilau, waya makaduyona Kisoni kaduyobogwa wala. Kawala, “Yeigu baloula saina minimani e bavautuutu deli ulo peula.”

²²Oluvi minasina wosa isisakaulasi imaisi, e deli kwaibakwaisi ivabutubutusi opwaipwaia goli.

²³Guyau la anelosi ikaibiga, kawala, “Kubulotaisi Merose, e kubulotaisi availa availa eisisuaisi baisa. Ka! Kubulotaisi. Matausina gala leimaisi paila bipilasaisi Guyau, e gala leimaisi makawala tokwabilia mwada bikabiliasi paila matauna.”

²⁴E komwaidona vivila si tuta paila yubwaila, kalamwaleta wala Yaela, minana Ebera la kwava, matauna guma Kenani. E vivila komwaidosi isisuaisi obuliyoyova, kalamwaleta wala Yaela iyubwaila.

²⁵Sisera inigada paila sopi mitaga isaiki nunu imom. Minana imiaki nunu kwekulokula isewoya okaboma saina kaiminabwaita sainela.

²⁶Minana iyosi kaiwawela buliyoyova kweyatala yamala, e toiyoudila si kaigilagela iyosi kweyayuwela yamala. Minana iwaki Sisera ikatumkumku wala busubosala, e minana ibasi matauna opwanetala wala.

²⁷Matauna itapoi kwaitutula e ikapusi. Ila ikanawa okaikela minana gala wala motatina. E metoya okaikela minana, matauna itapoi kwaitutula ikapusi. Matauna ikapusi ila opwaipwaia bogwa wala tokwaliga.

²⁸Sisera inala itadoyai metoya oponanela bwala. Minana imitikipwana wala opapala yoyu. E minana ikatupoi, kawala, “Avaka paila la waga kaibibiu saina yobali paila bimaisi? E avaka paila la wosa komwaidosi gala nani ikaimilavausi?”

²⁹E minasina nunumoya naninitalapula ilukwaisi minana, e tuta komwaidona ililivala wala baisa titoulela.

³⁰Kawala, “Igau wala inainevisi avai vavagi bilebwaisi e bivilaisi. Kaina si vivila natana kaina goli nayu paila taitala tokwabilia, kaina kwama yaminabwaita paila Sisera, kaina kala kuwa giyouvila bivisikomasi.”

³¹Mwa Guyau! Bibodi kam tilaula komwaidosi bikaligasi makawala baisa, mitaga ibodi lubaimwa si peula bikatumkulovi makawala kalasia la yuwoula! E mapaila baisa vakota isisu wala valu komwaidona kala kaduwonaku kweluwovasi taitu.