Read Kilivila YONI IGISIMLILI 1 Bible Online

YONI IGISIMLILI 1 - Kilivila bible

YONI IGISIMLILI 1

¹Mapilana buki isisu kala ginigini vavagi makwaisina avaka Yesu Keriso ikimitali. Yaubada magila bivituloki matausina la touwata avaka katitaikina igau bivitoulai, mapaila isaiki Yesu vavagi makwaisina. E Yesu iwitali taitala la anelosi baisa la touwata Yoni kidamwa bikimitali vavagi makwaisina.

²Mauula Yoni isilasola komwaidona avaka leigisi. E mapilana buki Yoni ikamituli avaka Yaubada iluki deli mabigana biga mokwita avaka Yesu Keriso ikimitali.

³E availa bikikalawa[1] mapilana buki bimwamwasila nanola; e bimwamwasila ninasi matausina availa availa bililagaisi[2] mapilana avaka eivitububoti, deli bikabikuwolaisi avaka eigini mapilana buki. Paila tuta bogwa leimamalu komwaidona vavagi makwaisina bivitoulaisi.

⁴Yeigu Yoni lagini baisa yokomi ekalesia kwailima kwaiyu[3] mapilana Esia. Ulo nigada baisa Yaubada kidamwa matauna e la baloma tailima taiyu e deli Yesu Keriso bimitukwaiyaimi, e bitalaguva lupomi. Ka, matauna Yaubada eisibogwa, tuta baisa isisu e bisigaga. Tuvaila matausina baloma tailima taiyu isisuaisi omatala ola takaikaia Yaubada. E Yesu Keriso ikimadagi la silasola. Matauna goli kasi kuluta matausina tokwaliga availa availa eitokaiasi imovavausi, deli guyousi valu watanawa si Giyouveka matauna. Matauna Yesu iyebwailidasi, e metoya ola kaliga matauna eitanekwaidasi metoya oda mitugagasi,

⁶e eivigakaidasi bitaguyausi bitalulasi, kidamwa bitawotitalaisi la Yaubada, matauna goli Tamala. Tayakawolaisi Yesu Keriso, kala kalugologusa deli la guyau bikanigaga. Emeni.

⁷E ka! Kugisi, matauna olowalowa leimaima. Komwaidosi bigisaisi matauna, deli goli availa availa leibasaisi matauna. Komwaidosi mina watanawa bivalamsi paila uula matauna. Mokwita goli! Emeni.

⁸Guyau Yaubada Topeuligaga leikaibiga, kawala, “Yeigu Alipa deli Omega.”[4] Matauna eisibogwa, tuta baisa isisu, e bisigaga.

⁹Yeigu tuwami Yoni. Ka, deli Yesu talumkolaisi mmayuyu, deli Yesu tasisuaisi olumoulela ola guyau, e deli matauna tapeulokaisi. Ikatupipaigusi ilauwaigusi makwaina simla yagala Patimo,[5] paila uula lakamituli Yaubada la biga deli lakamlili biga mokwita avaka Yesu leikimitali.

¹⁰Ola yam Guyau,[6] Baloma Tobumaboma iviyelu nanogu e alagi kaigaveka kaigila butula makawala tauya eililivala metoya otuboulogu.

¹¹Ikaibiga, kawala, “Kugini avaka bukugisi, e mapilana buki bukuwitali bilokaia makwaisina ekalesia kwailima kwaiyu, mapilasina yagasi Epeso, Simona, Pegam, Taiatira, Sadisi, Piladepia, Lewodisia.”

¹²E atovila mwada bagisi availa eilukwaimaigu. Mitaga tutala latovila agisi kwailima kwaiyu si kabototu kaitapa goula leitotusi.

¹³Oluwalaisi makwaisina leitotu taitala kala gigisa makawala tomota, eisikoma kala kakapula yawonaku ila okaikela deli kala katububula goula isipu ovitakola.

¹⁴Kulula pupwakaula makawala pwaim, kaina makawala takivi mwaipou, deli matala ikavikavila makawala kova ilululu.

¹⁵Kaikela ivivivila makawala barasi eivakasosu kala migileu makawala bogwa kala waikisi, e kaigala butula makawala luma kala kaipolu bipaisaga.

¹⁶Oyamala kakata iiyosi nalima nayu utuyam, e wodola eisusunapula kaitala puluta isimataisi pilayu wala. Migila visigala makawala kalasia itowota visigala.

¹⁷E tutala bogwa lagisi akapusi okaikela makawala tokwaliga yeigu. Mitaga yamala kakata ikabikonaigu, e ikaibiga, kawala, “Taga kukokola. Yeigu kabovitouula deli kabovigimkovila.

¹⁸E yeigu matauwena tomomova. Lakaliga, mitaga ka! kugisa, yeigu tomomova tosivagasi. E yeigu aiyosi karaiwaga paila kaliga deli paila tokukwaliga[7] si valu.

¹⁹Mapaila kugini vavagi baisa avaka bogwa bukugisi, kwaiyu wala, makwaisina vavagi tuta baisa, deli makwaisina igau makateki bivitoulaisi.

²⁰Baisa kasi katumiki vavagi kwekatupwana. Ka, minasina utuyam nalima nayu ogu kwakata lokugisi, e kwailima kwaiyu si kabototu goula kaitapa. Nalima nayu utuyam baisa tailima taiyu ekalesia si anelosi,[8] deli kwailima kwaiyu si kabototu kaitapa baisa kwailima kwaiyu ekalesia.