Read Kilivila YONI IGISIMLILI 2 Bible Online

YONI IGISIMLILI 2 - Kilivila bible

YONI IGISIMLILI 2

¹“Kugini baisa ekalesia si anelosi mapilana Epeso. “Biga mabigasina metoya baisa matauna iiyosi nalima nayu utuyam ola kakata, matauna ililoula oluwalaisi kwailima kwaiyu kaitapa si kabototu goula.

²Anikoli avaka lokuuvagaisi. Anikoli ammakawala lokuwotetilasi saina peula deli ammakawala lokupeulokaisi. Anikoli gala gagabila bukutagwalasi tomitugaga bisisuaisi, e deli lokuwakolaisi matausina ikaponaisi mwada aposetolo mitaga gala, e lokubanaisi isisasopasi.

³Yokomi kupeulokaisi e lokulumkolaisi mwau paila yeigu, taga gala kuligaimwaisi mi tapwaroru, kupwaitukulasi wala.

⁴Mesinaku baisa aiyosi paila yokomi; gala kuyebwailigusi tuta baisa makawala lokuvigakaigusi wa tuta eikugwa.

⁵Bukululuwaisi ammakawala lokukwapusisi. Kuninavilasi metoya omi mitugaga e bukuvigakaisi makawala lokububunabogwasi. Kidamwa gala kuninavilasi metoya omi mitugaga, yeigu bawokaiami bakau mi kaitapa la kabototu metoya okabala.

⁶Mitaga baisa bakavisaimi, paila kukoulovaisi bubunesi kala tobwakuli Nikoleiyo,[9] makawala goli yeigu akoulovi.

⁷“Availa ilagi ibodi biligimlili avaka Baloma iluluki mabudosina ekalesia. “Baisa availa availa bitomgwagasi batugwali bikamsi kawailuwa makaina kaila momova itotu Yaubada ola bagula.

⁸“Kugini baisa ekalesia si anelosi mapilana Simona. “Biga mabigasina metoya baisa matauna kabovitouula deli kabovigimkovila, matauwena goli eikaliga mitaga eimovavau.

⁹Anikoli kukulaisi pakula; anikoli yokomi kutonamakavasi (mitaga saina bidubadu mi veiguwa). Anikoli vavagi pupagatu ilivalaisi paila yokomi, matausiwena ikayupalaisi[10] mwada mina Yudia, mitaga gala, paila mabudona Setani wala la boda.

¹⁰Taga gala bukukukolaisi avai pakula avai pakula makateki bukubodaisi. Ka, Diabolo makateki bilavaimi mimilimi bukusuvisi wa bwala katupipi mwada biwakolaimi, e bukubodaisi kami mwau kwailuwotala yam.[11] Mitaga ibodaimi bukukimadagaisi e kaina bukutugwalaimi baisa okaliga goli, e mapaila basakaimi momova paila kami butia.[12]

¹¹“Availa ilagi ibodi biligimlili avaka Baloma iluluki mabudosina ekalesia. “Baisa availa availa bitomgwagasi gala bibodaisi kaliga kwaiyuwela.

¹²“E kugini baisa ekalesia si anelosi mapilana Pegam. “Biga mabigasina metoya baisa matauna iiyosi puluta eisimataisi pilayu wala.

¹³Anikoli am mokusisikaisi, baisa wala Setani la takaikaia[13] isisu. Yokomi goli lokukimadagaisi baisa yeigu, e tuta makwaina Anitipasa agu tosola toduwosisia eikatumataisi oluwalaimi ola valu Setani, tuta matutona yokomi gala kuligaimwaisi mi dubumi goli.

¹⁴Mesinaku baisa mimilisi vavagi laiyosi paila yokomi. Oluwalaimi mimilisi eibokulaisi la vituloki Balam. Paila matauna eivituloki Balaki ammakawala bivakapusii mina Isireli; ivituloki goli mwada ibodi bikomasi kaula tomota leisemakavaisi baisa si tokolu, e deli ivituloki mwada ibodi bikailasisi.

¹⁵E makawala goli mimilisi yokomi ibokulaisi si vituloki kala tobwakuli Nikoleiyo.[14]

¹⁶Kuninavilasi metoya omi mitugaga. Kidamwa gala, makateki bawokaiami e bawaiya matausina deli makaina puluta isusunapula owodogu.

¹⁷“Availa ilagi ibodi biligimlili avaka Baloma iluluki mabudosina ekalesia. “Baisa availa availa bitomgwagasi basaiki sita kaula kwekatupwana makwaina yagala mana. E tuvaila goli basaiki taitala taitala kwepupwakau dakuna deli yegila igavau bogwa eiginisi opapala, baisa gala availa binikoli maigana mesinaku wala matauna ikokeula kala dakuna binikoli maigana.

¹⁸“Kugini baisa ekalesia si anelosi mapilana Taiatira. “Biga mabigasina metoya baisa Latula Yaubada, matauna matala ikavikavila makawala kova ilululu e kaikela makawala barasi kala waikisi ivivivila.

¹⁹Anikoli wala avaka kuuvagaisi. Anikoli mi yebwaili mi tagwala, mi wotetila deli mi peuloki. Anikoli mi wotetila bogwa isiniveka, gala makawala lokuvigakaisi omitibogwa.

²⁰Mesinaku wala baisa aiyosi paila yokomi, paila lokutagwalasi minana[15] Yesebela[16] bisisu, minana goli idoki titoulela Yaubada la nawotetila. Paila minana iuvituloki agu towotetila e imnabi mwada bikailasisi deli bikomasi kaula tomota leisemakavaisi baisa si tokolu.

²¹Bogwa laluvituti minana paila bininavila metoya ola mitugaga, mitaga gala wala magila bininavila metoya ola kailasi.

²²Mapaila balavi minana okabala, e baisa bibodi kala mmayuyu kwaiveka. E matausina deli leikikailasisi tuvaila bibodaisi kasi mmayuyu sainela. E bavigaki baisa tuta goli, kidamwa gala binanakwasi bininavilasi metoya makwaisina mitugaga leivagaisi deli minana.

²³E tuvaila kala tobwakuli bakatumati e mapaila komwaidosi mabudosina ekalesia binikolaigusi wala kidamwa yeigu akakateta tomota avaka ninasi deli avaka magisi. Ka, yeigu bamapuvigasi taitala taitala yokomi makawala avaka bogwa lokuvagaisi.

²⁴“Mitaga yokomi kesala mina Taiatira gala lokubokulaisi makwaina vituloki kwemigaga;[17] e gala lokunainevisi baisa avaka mimilisi idokaisi Setani la vavagi kwekikium. Alivala baisa yokomi gala kwaitala tuvaila koni mwau basakaimi.

²⁵Mitaga yokomi bukuyosikikitaisi avaka lokuiyosisi igau wala bawa.

²⁶Baisa availa availa bitomgwagasi e bisaitaulasi bivagaisi nanogu igau tuta kala vigimkovila, yeigu bakasali si karaiwaga makawala Tamagu leikasali ulo karaiwaga. Mapaila bikaraiwogaisi mina watanawa,

²⁷e bikaraiwagasi makawala giyougaga oyumasi gai kaipuwopuwa, e bikatumimisaisi makawala kulia senisenila pilakikekita.

²⁸E tuvaila basaiki matausina minana utuyam yagala Kubwanayam.[18]

²⁹“Availa ilagi ibodi biligimlili avaka Baloma iluluki makwaisina ekalesia.