Read Kilivila YONI IGISIMLILI 5 Bible Online

YONI IGISIMLILI 5 - Kilivila bible

YONI IGISIMLILI 5

¹E agisi pilatala buki pilakatubili oyamala kakata matauna isisu otakaikaia e kala ginigini isisu olopola deli otapwala mpana. E leisipukikitaisi mapilana kala sipu sipulima sipuyu gala gagabila availa bitanekumakavi.

²E agisi taitala anelosi saina topeula ikamituli kaigaveka, “Availa ibodi bitaneku kala sipu e biulaim mapilana?”

³Mitaga gala availa isisu wa labuma kaina odabala pwaipwaia kainaga osikowala pwaipwaia,[28] gala wala availa ibodi biulaim kaina bigisi olumoulela mapilana.

⁴E saina wala auvalam paila gala bibanaisi availa bibodi matauna biulaim mapilana kaina bigisi olumoulela.

⁵E taitala matausina tommoya ilukwaigu, kawala, “Kusimla. Kugisa, ka! Matauna tabula tatoula Giyoubogwa Debida, metoya odalela Yuda, idokaisi Laiyoni,[29] matauwena bogwa itomgwaga, e ibodi matauna bitaneku kala sipu sipulima sipuyu deli biulaim mapilana buki.”

⁶E omatala takaikaia agisi taitala migila makawala natana Lam itotu, deli minasina navasi nammomova toyo tommoya eitoulaisi matauna. E matauna Lam kala gigisa makawala bogwa availa eikatumati. E isim kala doga kailima kaiyu deli matala pilalima pilayu. Baisaga Yaubada la baloma tailima taiyu bogwa leiwitali leitavinaisi ovalu watanawa komwaidona.

⁷E matauna Lam ila ikau mapilana buki pilakatubili metoya oyamala kakata matauna isisu otakaikaia.

⁸Tutala ikokeula mapilana, e minasina navasi nammomova deli tommoya tailuwoyu taivasi ikikavaginasi omatala matauna Lam. Taitala taitala la gita oyamala deli iyosisi kaboma goula ivakasau bulami maiina simasimina e makaina bulami baisa totapwaroru si ninigada.

⁹E ivitauwaisi kasi wosi pilavau. Kawasi, “Ibodaim goli bukukwau mapilana pilakatubili, e bukutaneku kala sipu. Paila bogwa ikatumataimsi, e metoya obuyavim lokumapu tomota paila Yaubada, metoyasi ambaisa ambaisa, dala, bona, tomota, valu, matausina goli lokumapu.

¹⁰E bogwa kuvigaki matausina biguyausi bitolulasi, kidamwa biwotitalaimsi yoku ma Yaubadasi. E matausina bikaraiwagasi ovalu watanawa makwaina.”

¹¹E agisi e ka, saina bidugaga anelosi lakatuluwovila galaga gagabila bitakalau, ititoulaisi takaikaia makwaina deli minasina navasi nammomova toyo tommoya.

¹²E kaigasi kaigaveka iusiwosisi, kawasi, “Bogwa leikatumataisi matauna Lam, e ibodi matauna bikuli la karaiwaga, la veiguwa, la kabitam, la peula, kala kamaiaba, kala yakaula, kala kavisi.”

¹³E alagi komwaidosi tommomova wa labuma, odabala pwaipwaia, osikowala pwaipwaia, obolita - e komwaidosi tommomova goli iusiwosisi, kawasi, “Baisa matauna isisu otakaikaia deli matauna Lam, kausiwosisi kala yakaula, kala kamaiaba, kala katububula deli la peula, gala biwokuva e bikanigaga.”

¹⁴E minasina navasi nammomova ikaibigasi, “Emeni!” E tommoya itapopulasi ikavaginasi, e itapwarorusi baisa matauna.