Read Kilivila 1 SAMWELA 3 Bible Online

1 SAMWELA 3 - Kilivila bible

1 SAMWELA 3

¹Wa yam makwaisina, avai tuta monagwadi Samwela iuwotetila baisa Yaubada metoya ola vakeda Ilai, mimilisi wala biga leima metoya baisa Guyau, deli kilisala metoya baisa matauna gala ibawa.

²E Ilai baisa tuta katitaikina bikau matala. E bogi kwaitala matauna immasisi matabudona paila titoulela,

³e Samwela immasisi matabudona Bomikikila ambaisa Kabutu Didawogala[10] eisisu. Igau wala visiga e kaitapa eilululu[11] wala.

⁴E Guyau idou kawala, “Samwela! Samwelʹo!” E Samwela ivitakauloki, kawala, “Wo toboma!”

⁵deli isakaula baisa Ilai ikaibiga, kawala, “Lokudouwaigu e lamakaiam.” Mitaga Ilai ivitakauloki, kawala, “Gala adouwaim. Kula kukwenu.” Mapaila Samwela ila ikenu okabala.

⁶Guyau idouvau Samwela. Samwela gala inikoli baisa Guyau eidoudou, paila Guyau gala kwaitala tuta eibigitoni matauna. Mapaila itokaia ilokaia Ilai ikaibiga, kawala, “Lokudouwaigu e lamakaiam.” Mitaga Ilai ivitakauloki, kawala, “Latugu, gala adouwaim. Kula kukwenu.”

⁸Guyau idou Samwela sivitolula. Itokaia ilokaia Ilai ikaibiga, “Lokudouwaigu e lamakaiam.” E mauula Ilai bogwa eitapuloki nanola baisa Guyau ididou monagwadi,

⁹mapaila ikaibiga baisa matauna, kawala, “Kula kukwenu. E kidamwa bidouwaim tuvaila, bukukwaibiga kawam, ‘Mwa! Guyau kulivala! Yeigu m towotetila laninakaigila.’” Mapaila Samwela ila ikenu okabala.

¹⁰Guyau ima itowa baisa, deli idou makawala bogwa eivigibogwi, “Samwela! Samwelʹo!” E Samwela ivitakauloki kawala, “Kulivala. Yeigu m towotetila laninakaigila.”

¹¹Guyau ilivala baisa matauna kawala, “Avai yam wala yeigu bavagi kwaitala vavagi baisa mina Isireli saina kabokokola, e availa availa bilagaisi bogwa biyowa luposi.

¹²Wa yam makwaina bavagi komwaidona ulo vitukokola baisa Ilai litula, metoya okala vitouula bila okala vigimkovila.

¹³Bogwa lalukibogwi matauna mwada yeigu bamipuki veyala tuta gala biwokuva, paila litula eikoulovaigusi. Ilai bogwa inikoli matausina eiuvagaisi makawala mitaga gala ibuyoyu matausina.

¹⁴Mapaila lakamituli baisa Ilai veyala kidamwa gala avai lula kaina avai semakavi bikosuweu makwaina mitugaga.”

¹⁵Samwela ikanukwenu okabala tatoula iyambwabwaila, e itokaia iulaim yoyula la bwala Guyau. Ikokola biluki Ilai paila makwaina kilisala.

¹⁶E Ilai idou matauna, kawala, “Latugʹo, Samwela!” E Samwela ivitakauloki, kawala, “Wo, toboma!”

¹⁷Ilai ikatupoi, kawala, “Avaka Guyau eilukwaim? Taga bukukwatupwani avaka baisa yeigu. Yaubada bimipukwaim sainela kidamwa gala bukulukwaigu komwaidona vavagi makwaisina eilukwaim.”

¹⁸Mapaila Samwela iluki vavagi komwaidona; gala kwaitala vavagi ikatupwani. Ilai ikaibiga, kawala, “Matauna goli Guyau. Matauna bivagi wala avai vavagi bibudoki nanola.”

¹⁹Samwela bogwa eitoveka, e Guyau tuta komwaidona eisikaili matauna, e Guyau eivigaki komwaidona makwaisina eiluki Samwela gala wala bisala.

²⁰Mapaila mina Isireli komwaidona, metoya pilatala bila piliyuwela, bogwa einikolaisi Samwela matauna taitala Guyau la tovitoubobuta.

²¹Guyau iyovigasi wala iyoumatila titoulela mapilana Sailo, baisa goli eiviloubusi baisa Samwela, deli eibigatona deli matauna. Deli avai tuta Samwela bilivala e komwaidona mina Isireli bogwa binakaigalaisi.