Read NT LS 2005 – Инжил ЛС (2005 Mıyzamdı kaytaloo 19 Bible Online

Mıyzamdı kaytaloo 19 - NT LS 2005 – Инжил ЛС (2005 bible

Mıyzamdı kaytaloo 19

¹Kuday-Teŋiriŋ saga berip jatkan jerdegi elderdi jok kılganda, sen alardın jerlerin eelep, alardın şaarlarına, üylörünö oturuktaşkanıŋda,

²Kuday-Teŋiriŋ saga eelik kılışıŋ üçün berip jatkan jerdin ortosunan üç şaardı bölüp koy.

³Oşol şaarlarga barçu jol salıp, Kuday-Teŋiriŋ ençiŋe berip jatkan jerdi üçkö böl. Alar kişi öltürgön adamdar baş kalkalay turgan şaarlar bolot.

⁴Al şaarlarga tömönküdöy şartta kişi öltürgön adamdar kaçıp barıp tirüü kalışat: kim murun kas bolboy turup, öz jakının kokusunan öltürüp alsa,

⁵kim öz jakını menen otun kıyuuga tokoygo barıp, karagayga şiltegen baltanın başı çıgıp ketip, jakınına tiyip, al ölüp kalsa, anda al kişi tirüü kalış üçün, baş kalkalooçu şaarlardın birine kaçıp barsın.

⁶Egerde al şaarlarga jol alıs bolso, kan kuugan adam kişi öltürgön adamdın artınan kuup jetip, açuuga aldırıp, anı öltürüp koybosun. Antkeni al ölüm jazasına tartılbaşı kerek, sebebi öltürüp algan adamına murun kas bolgon emes.

⁷Oşonduktan men saga: “Iç şaardı bölüp koy”, – dep buyruk kılıp jatam.

⁸Kuday-Teŋiriŋ senin ata-babalarıŋa ubada kılganday, senin jeriŋdi keŋeytip, ata-babalarıŋa ubada kılgan jerlerdin bardıgın koluŋa bergende,

⁹ömürüŋ ötkönçö Kuday-Teŋiriŋdi süyüp, Anın jolunda jürüp, men bügün saga berip jatkan uşul osuyattardı atkaruuga arakettene turgan bolsoŋ, anda bul üç şaarga dagı üç şaar koşup al.

¹⁰Kuday-Teŋiriŋ senin ençiŋe berip jatkan jerde senin moynuŋda kan kalbas üçün, senin jeriŋde ayıpsız adamdardın kanı tögülbösün.

¹¹Kim öz jakınına kas bolup, jaşırınıp barıp, atayılap kol salıp anı öltürüp, baş kalkalooçu şaarlardın birine kaçıp barsa,

¹²anda şaar aksakaldarı anı al şaardan alıp kelüügö kişilerin jönötüp, anı kan kuugan adamdın koluna salıp berişsin, al ölüm jazasına tartılsın.

¹³Aga ırayım kılba. Israyıldan ayıpsızdın kanın juup sal, oşondo saga jakşı bolot.

¹⁴Kuday-Teŋiriŋ saga eelik kılışıŋ üçün bergen, saga tiygen jerde ata-babalarıŋ koygon jakınıŋdın çegin buzba.

¹⁵Ayıpka jıgılgan adamga, je kılmış kılgan adamga, je künöö kılgan adamga bir kübö jetişsiz. İş eki je üç kübönün sözü boyunça karalışı kerek.

¹⁶Kim biröönü kılmış kıldı dep ayıptap, jalgan kübö bolso,

¹⁷anda ortosunda talaş-tartışı bar eki kişi teŋ Teŋirdin aldına, oşol ubaktagı ıyık kızmat kıluuçular menen başkaruuçulardın aldına kelsin.

¹⁸Başkaruuçular jakşılap teriştirişsin. Egerde al kübö öz bir tuuganına jalgan jalaa japkan bolso,

¹⁹anda öz bir tuuganına oylogon jamandıktı anın özünö jasagıla. Öz içiŋdegi jamandıktı uşintip jok kıl.

²⁰Oşondo başkalar ugup, korkup kalışat da, oşondon kiyin senin içiŋde oşondoy jamandıktı kılışpayt.

²¹Aga booruŋ açıbasın. Janga jan, közgö köz, tişke tiş, kolgo kol, butka but bolsun.