Read Kishambala Mateyo 10 Bible Online

Mateyo 10 - Kishambala bible

Mateyo 10

¹Azaitanga waja wahina wakwe kumi na waili, azawainka ufuṅwa wa mpepo zekandana, wadaheziingata, kangi wadahehonya mahisho na manyonge yoshe.

²Mazina ya izi ntuṅwa kumi na mbili shaya: Ywa bosi ni Simoni mweitangwa Petelo na nduγuye Andeleya, Yakobo, ṅwana Zebedeyo, na nduγuye Yohana.

³Filipo, Balitolomeyo, Toma, Mateyo mngelu, Yakobo, ṅwana Alifeyo, Tadeyo,

⁴Simoni ywa Kana, Yuda Isikaliyota, ni yuja amwinkileye.

⁵Awa kumi na waili Yesu azawatuma na kuwalaγiliza akiwati: Mshehite na kwe sila za wamzimu, hata mwe muzi wa Wasamaliya msheingile!

⁶Hitai du kwe ngotongwa za mbali ya Isilayeli ziaγilezo!

⁷Hitai, mkabilikile kuti: Uzumbe wa lwingu u hehi!

⁸Wanyonge wahonyei! Wafilewo wainulei! Wakoma waushei ukoma! Mpepo ziingatei! Mzaviinkwa bule, viinkilei bule!

⁹Mshetoze zahabu ao feza ao senti mwe misipi yenyu!

¹⁰Funge du ya nkande za silai msheihaγate! Msheange na nkazu mbili ao du vilatu ao ngoda du! Hambu mndima aagiziγwa ni nkande zakwe.

¹¹Mwe muzi, ati ni mkulu, ati ni mdodo, ndimo mwingile, uzai, ati muna muntu mweagiziγwa ni kumifikiza! Ne ndimo mwikale, mpaka mkizamlawa.

¹²Mkiingila mwe nyumbangwa muluγushei!

¹³Ati iyo nyumba yamiagiza, mpolele yenyu itaiikaila; ati nkaimiagiza, ija mpolele itamiuyiya.

¹⁴Ndiye ashemihokele na kuteγeleza mbuli zenyu, mulawei mwe iyo nyumba na mwe uja muzi, muhuγute vumbi ja milundi yenyu!

¹⁵Kweli namiti: Masa ya shi ya Sodoma na ya Gomola yatahuha kuzinka ayo ya uja muzi, mushi wa mlaho ukizabula.

¹⁶Olelai! Imi namituma, viya mu ngoto, na kwe mashuwi gati; kwa ivyoho tendai minyanyi sa nyoka, kangi mshowe mambeza sa suwa!

¹⁷Miya kiγojei kwa mbuli za wantu! Hambu watazamiinkila kwe vitala, kangi nezewakamitowe mwe mavikilo yawe.

¹⁸Nezemuhunwe na kwa wafuṅwa na kwa wazumbe kwa mbuli ya imi, muwaγalukile waona waja, hata wamzimu.

¹⁹Aho ndiho nezewamiinkile, msheone sungu kwa mbuli ya milandwile! Hambu ija minga mtazainkwa, ndivyo mulandule.

²⁰Hambu si nywiyo mwelonga, miya ni mpehongwa ya ishe ywenyu yelonga na inywi.

²¹Wanduγu na wanduγu nezewainkilane kwa koṅwa, hata waishe nezewainkile wana wawe, hata wana nezewaiγaile wavyazi wawe nkondo, wawakome.

²²Nezemshukiziγwe ni wantu woshe kwa mbuli ya zina jangu; miya ndiwo wazizimize shuti bindilizo, awa ne ndiwo wahone.

²³Ndiho wamiγulushe mwe muzi muṅwe, nyilikai na mwe mtuhu! Kweli namiti: Nkemubinde mizi ya Isilayeli, ṅwanangwa ywa muntu aishilawile.

²⁴Mhina nkamzinka mfuzi ywakwe, mupuna nkamzinka baba yakwe.

²⁵Vyabesha, mhina akiγaluka, sa mfuzi ywakwe alivyo, ao du mupuna, sa baba yakwe alivyo; ati ṅwenye chengo wazamunka wazimu, lushe wanae nkewawaisiize ivyoho?

²⁶Miya mshewaogohe! Hambu nkakuna mbuli ifishiγweyo, ndiyo ishebunkuke; nkakuna vye njamanjama, ndivyo vishetailwe.

²⁷Nivyomilonga he lwiza, vibilikilei he langaila! Nivyominoṅoneza, vibilikilei lwazoi!

²⁸Msheogohe waja wekoma ṅwili du, washiwodaha kukoma moyo! Isiizai kumwogoha yuja mwedaha kubenta ṅwili, hata moyo uaγe kuzimu!

²⁹Vikwele vili nkaviγulwa kasenti kaṅwe? Kangi ṅwiyae ywawe muṅwe du nkakina na shi, ishe ywenyu aishikundile.

³⁰Hata swili za mitwi yenyu zoshe ziitazilwe.

³¹Ne nihomiti: Msheogohe! Inywi mwazinka vikwele vingi.

³²Kila ndiye nezealonge chasale kwa wantu, kuti ni ywangu, nami nezenilonge chasale kwa Tate mwe uko mwe lwingu kuti: Uyu ni ywangu.

³³Miya ndiye nezeanitowe hulu kwa wantu, nami nezenimtowe hulu kwa Tate mwe uko mwe lwingu.

³⁴Mshefanyanye, kuti nizaiza kwa gwisha utondolo mwe shi! Siizile kwe gwisha utondolo, niizile kwa gwisha nkondo.

³⁵Hambu nizaiza kwa banyanya muntu na ishe, ṅwana ywa kivyele na nine, mvyele na nine vyala;

³⁶muntu weyae, awona nawo nyumbai mwakwe, newamγalukile wankulu wakwe.

³⁷Mwemkundisha ishe ao nine kunizinka imi, nkanitala; kangi mwemkundisha ṅwanae ywa kiγoshi ao ywa kivyele kunizinka imi, nkanitala.

³⁸Ndiye asheinule muti wakwe wa kukomelwa na kunitongela, nkanitala.

³⁹Mwekihonya atazakiaza, miya mwekiaza kwa mbuli ya imi atazakihonya.

⁴⁰Mwemihokela inywi, anihokela imi, kangi mwenihokela imi, amhokela yuja anitumileye.

⁴¹Ndiye afikize mteγanyingwa, kuti aitangwa mteγanyi, atazainkwa kitumulo chetala mteγanyi; ndiye afikize mtanda, kuti aitangwa mtanda, atazainkwa kitumulo chetala mtanda.

⁴²Miya awa wadodo ndiye nezeamkomele ṅwiyae ywawe muṅwe nkilu na kumunka luγata lwa mazi du, kuti aitangwa mhina, kweli namiti: Kitumulo chakwe nkezechiaγe.