Read Kishambala Mateyo 11 Bible Online

Mateyo 11 - Kishambala bible

Mateyo 11

¹Yesu akibinda kulaγiliza waja wahina wakwe kumi na waili ivyoho, azahauka, akafuze na kubilikila mwe mizi yawe.

²Yohana akiiva mwe chumba ndima za Yesu azatuma wahina wakwe,

³azamwuza angwe: Iwe u yuja mweiza, hambu tiafize mtuhu?

⁴Yesu azalandula na kuwaγamba: Hitai, mumwukwile Yohana muvyoiva na muvyoona:

⁵Matuntu yaona, washiwodaha kuγenda waγenda, wakoma waushiγwa ukoma, washiwoiva waiva, wafilewo wafufulwa, wakiwa wabilikilwa nyemi; mwe nyemi ni ndiye asheihilwe ni miyo!

⁶Awa wakibinda kuhita, Yesu azaandiila kuwalonga wantu mbuli ya Yohana kuγamba: Kumbe aho mkizahita mwe nyika muhitile kwa olelai? Ni lasi jevuviγwa ni mpeho?

⁸Hambu muhitile kwa olelai? Ni muntu azwikileye shuke zedeeleka? Olelai! Wezwika shuke zedeeleka wa mwe nyumba za wazumbe.

⁹Miya lushe muhitilei? Kwa olela mteγanyingwa? Kweli namiti: Ni mkulu kuzinka mteγanyi.

¹⁰Uyu ne mwegondelwa kuγamba: Olelai! Nezenitume mlau ywangu, akakulongwele na kukutulila sila yako, ndiyo ugwile.

¹¹Kweli namiti: Woshe wavyelwewo ni wavyele nkakuoneke mkulu kumzinka Yohana Mubatizi; miya mweγaluka mdodo mwe uzumbe wa lwingu ni mkulu kumzinka.

¹²Kuandiila mwe mishi ya Yohana mpaka ivi lushe uzumbe wa lwingu uingilwa na nguvu, kangi wanguvu ne weugwila.

¹³Hambu wateγanyi woshe, hata mulomongwa wazateγanya, mpaka Yohana akilawila.

¹⁴Kangi, ati mwakunda kuiva, yuja ne Eliya mweunga kuiza.

¹⁵Mwena mashikilo yeiva neaive!

¹⁶Mbali inu niifanyanye na mbwai? Yafanana na wana wadodo weikala lwazoi, welonga weyae wawe angwe:

¹⁷Tizamitowela miluli, miya nkamvinile, tizamitumbwila ndilo, miya inywi nkamulizite!

¹⁸Hambu Yohana azaiza, nkajile, nkanywele, lushe wantu waγamba: Ana mpepo.

¹⁹Nwanangwa ywa muntu azaiza, aaja, aanywa, lushe waγamba: Shuyu muntu mwejilisha na kunywelesha mvinyo! Wangelu na wahuza ni ṅwiyae ywawe! Kweli kiyuγongwa chikanilwa ni viya viγosholwevyo ndicho.

²⁰Haja Yesu azaandiila kulana ija mizi muγosholwemo vilozo vyakwe vingi muno, kwa kuti nkawahitule ntongonyezi zawe, angwe:

²¹Ukatabanika, Kolazini! Ukatabanika, Betisayida! Hambu ati kuja Tilo na Sidoni kuzaγosholwa viya vilozo viγosholwevyo kwenyu, anga wavoteka kale na kukanta maguniya na kukigela zelu.

²²Ne nihomiti: Masa ya Tilo na ya Sidoni, ndiyo yagwe uja mushi wa mlaho yatahuha kuzinka yenyu.

²³Hata iwe Kapelinaumu, nkukweziγwe mpaka kwe lwingu?

²⁴Nezeushindikwe na uko kuzimu. Ati kuja Sodoma kuzaγosholwa viya vilozo viγosholwevyo kwako, anga uzaikala mpaka lelo. Ne nihokuti: Masa ya shi ya Sodoma, ndiyo yagwe uja mushi wa mlaho, yatahuha kuzinka yako.

²⁵Mishi Yesu azalonga kuγamba: Nakulaviliza ntogolo, iwe Tate, Zumbe ywa lwingu na ywa shi, kuti izi mbuli watalizi na waviyuγo uzaziwafishila, miya uzazifumbwila wankebe.

²⁶Kweli Tate ne vikutamilevyo. Vyoshe nizaviinkwa ni Tate; nkakuna mwemtaila ṅwanangwa, komo Tate, kangi nkakuna mwemtaila Tate, komo ṅwanangwa na yuja, ṅwanangwa ndiye akunde kumlaviliza.

²⁸Izai kwangu nyosheni mwepikapika na kuzwamilwa! Imi nitamishangalaza. Γuwai ngata yangu, muhinile mwangu!

²⁹Hambu imi ni mhozu, nakipunguza mwe moyo wangu, ne ndivyo mwonele myoyo yenyu luhemele.

³⁰Hambu ngata yangu ni yedi, kangi mziγo wangu wahuha.