Read Kishambala Mateyo 12 Bible Online

Mateyo 12 - Kishambala bible

Mateyo 12

¹Mishi ija Yesu azaanga mushi wa sabato kwe mbuwa za ngano; wahina wakwe wakiluṅwa ni sala wazaandiila kudahula maiswa ya ngano, wazaja.

²Mafaliseyo wakiviona wazamγamba: Olela, wahina wako waγoshola viya vishivyoγosholwa mushi wa sikunkulu.

³Azawati: Nkamfyomile, Dawidi aγosholevyo akiluṅwa ni sala haṅwe na weyae, awona nawo?

⁴Kuti azaingila mwe nyumba ya Mulungu, azaja migate ya ntogolo? Kangi ṅwenye na weyae, awona nawo, wana ṅwiko kuija, washinawo ṅwiko nayo ni wavikizi ike.

⁵Vituhu nkamfyomile mwe mlomongwa, kuti mushi wa sabato wavikizi waabana kitigo cha sabato muja mwe vikilongwa, kangi nkawana masa?

⁶Namiti: Aha hana mwekula kuzinka vikilongwa.

⁷Ati mwataila bontokelo ja iyo mbuli ya kuγamba: Nakunda mbazi, sikunda ṅombe za mviko, anga nkamkaalize awa washinawo masa.

⁸Hambu ṅwanangwa ywa muntu ni zumbe ywa mushi wa sabato.

⁹Akihauka azaingila mwe vikilo jawe.

¹⁰Ne mwina muntu mwena mkono unyulukewo. Wazamwuza kuγamba: Kumbe vina ṅwiko kuhonya mushi wa sabato? Kangwe waone lufyalimile.

¹¹Azawati: Ati kwenyu muntu ana ngoto ṅwenga, lushe ati yakina mwe lwina mushi wa sabato, asheitoze akiilavya?

¹²Muntu nkazinka ngoto hakulu? Kwa ivyoho nkavina ṅwiko kuγoshola vyetama mushi wa sabato.

¹³Ne ahomlonga yuja muntu: Kusula mkono wako! Azaukusula, uzauya ugima sa ṅwiyae

¹⁴Mafaliseyo wakimulawa wazalonga njama kwa mbuli yakwe, ndivyo waonele luhoseze.

¹⁵Yesu akivitaila azahauka; wantu wangi wazamtongela, azawahonya woshe,

¹⁶azawavaila, kangwe washezamubunkula,

¹⁷kangwe vibontoke viya vilongiγwevyo ni mteγanyi Yesaya, akiγamba:

¹⁸Shuyu ṅwanangu, nimshaγuleye! Shuyu mwombozi ywangu, mwetamila moyo wangu! Nezenimgele mpeho yangu, abilikile wamzimu, kuti wana masa.

¹⁹Nkeagwishe nkumbizi, nkeavunke, nkakuna ndiye aive kanwa chakwe he ndumi.

²⁰Luguγu lutunyukelo nkealubindilize, vungo jena moto hadodo nkeajizimye, mpaka masa, ndiyo agwishe, yavote.

²¹Zina jakwe ne ndijo wamzimu waalile.

²²Haja azaletelwa muntu ashiyeona, ashiyelonga kwa mbuli ya kuhuma mpepo. Azamhonya, ne yuja, ndiye ashilonga, aholonga, kangi ne ahoona.

²³Wantu woshe wazashentuka angwe: Uyu so ṅwana Dawidi?

²⁴Mafaliseyo wakiviiva wazaγamba: Uyu akiingata mpepo, so kwa nguvu ntuhu, ni kwa nguvu ya Mzuka, zumbe ywa mpepo.

²⁵Miya azataila ntongonyezi zawe, azawati: Kila uzumbe ukipangana ṅwenye wachakuka. Kila muzi, hata nyumba du ikipangana ṅwenye nkaiikala.

²⁶Ati Satani amwingata Satani ṅwiyae, azabinda kupangana ṅwenye; lushe uzumbe wakwe utatoγa zeze?

²⁷Ati imi niingata mpepo kwa nguvu ya Mzuka, wana wenyu waziingata kwa nguvu ya ndai? Kwa ivyoho awa watazamilaha.

²⁸Miya ati imi niingata mpepo kwa nguvu ya Mulungu, shivyo, uzumbe wa Mulungu uzabula kwenyu.

²⁹Hambu muntu adaha zeze kuingila mwenyumbaya mnguvu, amhoke ntanu zakwe? Bosi nkatamshunga yuja mnguvu, akibinda akadaha kumhoka ntanu ze mwe nyumba yakwe?

³⁰Ashiyeniambiza aniomanya, ashiyeunganyanya haṅwe na imi aasakanya.

³¹Ne vyeleka, nikimiti: Wantu waushiliziγwa uhuza na lwezo lwoshe, miya muntu akieza Mpehongwa nkaviushiliziγwa.

³²Ati muntu amubishiza ṅwanangwa ywa muntu nkani, aushiliziγwa, miya ati muntu amubishiza Mpeho mṅazi nkani, nkezeaushiliziγwe, ati ni mwe inu shi, ati ni mwe ija, ndiyo ilawile.

³³Mkihanda muti mtana, ne ndimo mwonele malunda matana; mkihanda muti mubada, ne ndimo mwonele ntunda mbada, hambu muti utailwa na ntunda zakwe.

³⁴Wana nyoka inywi! Mdaha zeze kulonga mbuli ntana, wenye mwi wabada? Hambu viya, moyo uvyogisa, ne kanwa chivyolonga.

³⁵Muntu mtana alavya mwe kitende chakwe kitana vintu vitana, kangi muntu mubada alavya mwe kitende chakwe kibada vintu vibada.

³⁶Miya namiti: Kila mbuli mbada, ndiyo wantu walonge, watazaiuziγwa mushi wa mlaho.

³⁷Hambu kwa milongele yako nezeuinkwe utanda, kangi kwa milongele yako nezeulahwe.

³⁸Ne watabaluwangwa na Mafaliseyo kuṅwe wahomlandula angwe: Mfuzi, takunda kuona lwitangilo kwako.

³⁹Azawalandula angwe: Inu mbali mbada yeγenyeza kilanga yalonda lwitangilo, kangi nkezewainkwe lutuhu, kushima luja lwa mteγanyi Yona.

⁴⁰Hambu sa Yona aikalevyo mwe ifu ja nyama ya bahali mishi mitatu na vilo vitatu, vivyoho ṅwanangwa ywa muntu atazaikala uko ndai mwe shanga mishi mitatu na vilo vitatu.

⁴¹Mushi wa mlaho wantu wa Niniwe watazainukila inu mbali, wailahe, kwa kuti wakibilikilwa ni Yona wazavoteka, kangi shivyo, kunu kuna mkulu kumzinka Yona.

⁴²Mushi wa mlaho zumbe ywa kivyele ywa ija shi ye lwazu lwegwila zuwa mishi ya vuli atazainukila inu mbali, hambu azalawa shi ikohelela, ateγeleze viyuγo vya Salomo, kangi shivyo, kunu kuna mkulu kumzinka Salomo.

⁴³Ati mpepo mbada yalawa mwe muntu, yaanga mwe shi ishinayo mazi, yalonda hemelo, yashejiona.

⁴⁴Ne ndiho ilonge kuγamba: Neniγotoke na mwe nyumba yangu, nilawilemo namo. Ikiiza yaibulila, iiashiγwe ṅwazi, iihaγilwe, iihambiγwe.

⁴⁵Ne ihohita kwa γuwa mpepo mfungate ntuhu mbada kuzinka ija ṅwenye, ziγaluke weyae, vikibinda zaiza, zaikala muja. Ivyoho bindilizo ja yuja muntu jitaiha kuzinka chandilo. Ne ndivyo mbuli ya inu mbali mbada iγende.

⁴⁶Akelonga na wantu, kuzaiza nine na wanduγuze, wazaγoloka se wakimlonda, walonge naye.

⁴⁷Kuna amγambileye: Olela, nyokwe na wanduγuzo waγoloka uko se, wakulonda, walonge na iwe.

⁴⁸Azamlandula yuja amlongileye, angwe: Mlala ywangu ni ndai? Wenetu ni wandai?

⁴⁹Azakuswila wahina wakwe mkono angwe: Shawa wamlala na wenetu! Hambu ndiye aγoshole,

⁵⁰Tate mweikala mwe lwingu avyokunda, uyu ne ṅwenetu na lumbu jangu na mlala.